អាជ្ញាធរវៀតណាមបង្ក្រាបផ្ទះផលិតកាហ្វេដែលផ្សំពីម្សៅថ្មពិលចាស់ៗ

អន្តរជាតិ

អាជ្ញាធរវៀតណាមបង្ក្រាបផ្ទះផលិតកាហ្វេដែលផ្សំពីម្សៅថ្មពិលចាស់ៗ

18, Apr 2018 , 4:04 pm

រូបភាព

ស្រ្តីវៀតណាម Nguyen Thi Loan ម្ចាស់អាជីវកម្មកាហ្វេដែលផ្សំចេញពីម្សៅថ្មពិល។ រូបថត tuoitrenews.vn

ដោយ: ធីតា

ប៉ូលិសខេត្ត Dak Nong និងក្រុមអធិការកិច្ចចំណីអាហាររបស់វៀតណាម កាលពីដើមសប្តាហ៍កន្លងមក បានបង្ក្រាបផ្ទះផលិតកាហ្វេមួយកន្លែង ដែលផ្សំពីសារធាតុដ៏គ្រោះថ្នាក់។ យោងតាមការផ្សាយរបស់កាសែត Tuoi Tre News កាហ្វេនោះ ធ្វើចេញពីម្សៅខ្មៅ នៃថ្មពិលដែលប្រើប្រាស់រួច រួមកម្ទេចថ្មកខ្វក់។

ពលរដ្ឋដែលរស់នៅមូលដ្ឋានក្នុងខេត្ត Dak Nong បានរាយការណ៍ទៅសមត្ថកិច្ចទាក់ទងនឹងសកម្មភាពអាជីវកម្មផលិតកាហ្វេដ៏គួរឲ្យសង្ស័យរបស់ស្ត្រីឈ្មោះ Nguyen Thi Loan និងគ្រួសាររបស់ខ្លួន។ ក្រោយការតាមដាន សមត្ថកិច្ចបានរកឃើញថា គ្រួសារមួយនេះ បានផលិតកាហ្វេដ៏កខ្វក់ ដើម្បីលក់នៅលើទីផ្សារ។

កាសែត Tuoi Tre News បានបញ្ជាក់ថា នាប្រតិបត្តិការបង្ក្រាប អាជ្ញាធរបានរកឃើញកាហ្វេជាច្រើនតោន ត្រូវបានផលិតរួចរាល់ រួមទាំងម្សៅខ្មៅ៣៥គីឡូក្រាមដែលលាយចេញថ្មពិលចាស់ និងទឹកខ្មៅកខ្វក់ប្រមាណ១០គីឡូក្រាមទៀត។

នាង Loan បានរៀបរាប់ថា គ្រួសាររបស់ខ្លួន បានទិញគ្រាប់កាហ្វេដែលគេត្រូវចោល ក្នុងតម្លៃថោក ហើយយកទៅផ្សំជាមួយសារធាតុផ្សេងទៀត ដូចជាកម្ទេចថ្ម និងម្សៅខ្មៅនៅក្នុងថ្មពិល (D batteries)។ នាងបានអះអាងថា ចាប់ផ្តើមអាជីវកម្មតាំងពីដើមឆ្នាំ២០១៨មក នាងបានលក់កាហ្វេនេះប្រមាណជាង៣តោនទៅលើទីផ្សារហើយ៕