ជាតិ
សិល្បះ
ឧបករណ៍តន្ត្រី «អង្គួច»
× អង្គួច (Angkouch) គឺជាឧបករណ៍តន្ត្រីបុរាណខ្មែរមួយ ដែលកើតមាននៅក្នុងប្រទេសកម្ពុជាតាំងពីយូរយារណាស់មកហើយនៅតាមជនបទស្រុកស្រែចំការ។ ពេលក្មេងៗឃ្វាលគោក្របី កើតការអផ្សុកក៏នាំយកមែកឫស្សីមកបិតចិតជាឧបករណ៍នេះឡើង ហើយនាំគ្នាគោះលេង។ ជួបកាលគេគោះលេងម្នាក់ឯង ជួនកាលគេគោះលេងរួមគ្នាពីរ ឬបីនាក់ ជារៀងរហូតតៗគ្នាមក។
ឧបករណ៍អង្គួចធ្វើអំពីឫស្សី មានសំនៀងមិនសូវខ្លាំងដូចអង្គួចធ្វើអំពីដែកទេ។ ឧបករណ៍អង្គួចដែលគេនិយមប្រើប្រាស់ជាងគេ គឺអង្គួចធ្វើអំពីដែក ពីព្រោះអង្គួចដែកមានសំនៀងមូល សំនៀងខ្លាំង និងពិរោះទៀតផង។ គេមិនសូវនិយមយកឧបករណ៍អង្គួច ទៅប្រគំជាមួយឧបករណ៍ដទៃទៀតទេ។ ជួនកាលគេប្រគំរួមតែឧបករណ៍អង្គួចសុទ្ធមានពីរ បី ឬបួន ជួនកាលគេលេងទោលម្នាក់ៗឯង ហើយច្រើនតែលេងបទណាដែលជាបទតូចៗស្រួលៗ ដូចជា បទប្រជាប្រិយខ្មែរ បទមហោរីមួយជាន់ៗ។ល។
អង្គួចធ្វើអំពីឫស្សីមានរាងសំប៉ែតទ្រវែង រីឯអង្គួចធ្វើអំពីដែកមានរាងមូលស្រដៀងវង់ព្រះច័ន្ទផង និងរាងដូចស្លឹកឈើផង ប៉ុន្តែអង្គួចទាំងពីរបែបនេះពុំសូវសំបូរទេនៅប្រទេសកម្ពុជាសព្វថ្ងៃនេះ៕
សូមស្តាប់បងប្អូនជនជាតិកួយច្រៀងអង្គួច
https://soundcloud.com/user-382421332/1970-by-bernard-dupaigne
ដកស្រង់ពីសៀវភៅ «ឧបករណ៍តន្ត្រីបុរាណកម្ពុជា» (Traditional Musical Instrument of Cambodia) ដែលចេញផ្សាយដោយ អង្គការអប់រំវិទ្យាសាស្ត្រ និងវប្បធម៌នៃសហប្រជាជាតិ (UNESCO) ឆ្នាំ២០០៣
© រក្សាសិទ្ធិដោយ thmeythmey.com