ជាតិ
ទណ្ឌិត ២២៨នាក់ ត្រូវបានក្រសួងលើកទៅវាយតម្លៃ មុននឹងស្នើសុំលើកលែងនិងបន្ថយទោស ក្នុងថ្ងៃពិសាខបូជា លោក អង្គ វង្សវឌ្ឍនា រដ្ឋមន្រ្តីក្រសួងយុត្តិធម៌ ស្ថិតក្នុងកិច្ចប្រជុំនៅថ្ងៃទី២៣ ខែមេសា ឆ្នាំ២0១៨ ស្តីពីសំណើសុំលើកលែងនិងបន្ធូរបន្ថយទោសដល់ទណ្ឌិត ក្នុងថ្ងៃបុណ្យវិសាខបូជា។ រូបពីក្រសួងយុត្តធម៌
× រដ្ឋមន្ដ្រីក្រសួងយុត្តិធម៌ លោក អង្គ វង្សវឌ្ឍនា បានដឹកនាំកិច្ចប្រជុំគណៈកម្មការថា្នក់ជាតិ ពិនិត្យ និងវាយតម្លៃបញ្ជីឈ្មោះទណ្ឌិតស្នើសុំលើកលែងទោស និងបន្ធូរបន្ថយទោស នាឱកាសថ្ងៃបុណ្យវិសាខបូជា ដែលបានទទួលពីគណៈកម្មការថ្នាក់រាជធានី-ខេត្ត ពន្ធនាគារចំនួន ១៨ និងគណៈកម្មការក្រសួងមហាផ្ទៃ មណ្ឌលអប់រំចំនួន ៤ លើបញ្ជីទណ្ឌិតស្នើសុំសរុប ២២៨នាក់ (ស្រី១៨នាក់)។
លោក អង្គ វង្សវឌ្ឍនា ប្រធានគណៈកម្មការថ្នាក់ជាតិលើកលែងនិងបន្ធូរបន្ថយទោស ដឹកនាំកិច្ចប្រជុំដែលមានការចូលរួមពីស្ថានប័នពាក់ព័ន្ធដូចជា ក្រសួងមហាផ្ទៃតំណាងដោយអគ្គស្នងការនគរបាលជាតិ និងគណៈរដ្ឋមន្ត្រី។ លោក ស៊ុច វណ្ណារ៉ា អនុប្រធានលេខាធិការដ្ឋានគណៈកម្មការថ្នាក់ជាតិ លើកលែងនិងបន្ធូបន្ថយទោស បានប្រាប់អ្នកសារព័ត៌មានមុនកិច្ចប្រជុំ ថា កិច្ចប្រជុំការលើកលែងទោស និងបន្ធូបន្ថយទោស មើលទៅលើទណ្ឌិតណាដែលបានអនុវត្ដទោស ២ភាគបី នឹងមានការស្នើសុំលើកលែងទោស ហើយនិង១ភាគបីស្នើសុំបន្ធូរបន្ថយទោស។
ចំពោះការស្នើសុំនេះដែរ ពិនិត្យទៅលើទណ្ឌិតដែលបានស្នើសុំឡើង មានលក្ខណៈសម្បត្តិគ្រប់គ្រាន់ ក្នុងនោះដែរមានឯកសារគ្រប់គ្រាន់ដូចជា ស្រាលក្រមស្ថាពរ និងមានការវាយតម្លៃពីពន្ធនាគារថាបានកែប្រែខ្លួន ហើយនិងពិនិត្យមើលឲ្យបានល្អិតល្អន់ទៅលើទណ្ឌិតណាដែលមានស្រាលក្រមច្រើន(ពុំមានការរាងចាលទោសទណ្ឌ)។ នេះបើតាមការបន្ត លោក ស៊ុច វណ្ណារ៉ា ដោយលោកបន្ថែមថា ការពិនិត្យមើលភាពល្អិតល្អន់នេះ ស្ថិតលើលក្ខណៈសម្បត្តិគ្រប់គ្រាន់លើទណ្ឌិតណា ដែលបានកែប្រែខ្លួន ហើយបទល្មើសនោះគ្មានព្យសនៈកម្ម(មិនធ្វើឲ្យមានការខូចខាតធ្ងន់ធ្ងរដល់សង្គម)។
ឆ្លើយសំនួរអ្នកក្រុមអ្នកសារព័ត៌មាន តើមានឈ្មោះទណ្ឌិតអតីតគណបក្សCNRPឬអត់ អគ្គនាយករងនៃអគ្គនាយកដ្ឋានកិច្ចការតុលាការ លោក ស៊ុច សុវណ្ណារ៉ា និយាយថា ក្នុងបញ្ជីឈ្មោះ ទណ្ឌិតទាំង ២២៨នាក់ មិនទាន់ឃើញមានឈ្មោះពួកគេទេ៕
Tag:
ទណ្ឌិត
លើកលែង-បន្ថយទោស
© រក្សាសិទ្ធិដោយ thmeythmey.com