Liverpool នឹងបើកទ្វារកីឡដ្ឋាន Anfield ដើម្បីទទួលស្វាគមន៍ក្រុម AS Roma ក្នុងការប្រកួតពានរង្វាន់ UEFA Champions League ជើងទី១ វគ្គពាក់កណ្តាលផ្តាច់ព្រ័ត្រ នារាត្រីថ្ងៃទី ២៤ ខែមេសានេះ វេលាម៉ោង ១:៤៥នាទី [ម៉ោងនៅកម្ពុជា]។
មុនជំនួបនេះ លោក Jurgen Klopp អ្នកចាត់ការទូទៅក្រុមរហស្សនាមហង្សក្រហម បានព្រមានអ្នកគាំទ្រខ្លួនមិនឲ្យវាយប្រហារទៅលើរថយន្តដឹកកីឡាកររបស់គូប្រជែង Roma ដូចធ្វើដាក់ក្រុម Manchester City កាលពីជួបគ្នាជើងទី១ វគ្គ១/៤ផ្តាច់ព្រ័ត្រកាលពី៣សប្តាហ៍មុនឡើយ។
ទង្វើរបស់ក្រុមអ្នកគាំទ្រ Liverpool ដូចជា គប់ដបស្រា កំប៉ុង និងកាំជ្រួចជាដើមនោះបានធ្វើឲ្យខូចខាតរថយន្តរបស់កូនក្រុមលោក Pep Guardiola មួយចំនួន ហើយករណីនេះក៏ត្រូវបានសមាគមកីឡាបាល់ទាត់អឺរ៉ុប (UEFA) កំពុងស៊ើបអង្កេតផងដែរ។ ហើយម្យ៉ាងវិញទៀត ក្រុមប៉ូលិសក៏កំពុងដាក់ពង្រាយនៅតំបន់នោះដើម្បីការពារកុំឲ្យមានហេតុការណ៍បែបនេះជាលើកទី២ទៀត។
បន្ទាប់ពីមានករណីនេះ អ្នកចាត់ការសញ្ជាតិអាល្លឺម៉ង់បានព្រមានដូច្នេះថា៖«សូមបង្ហាញការគោរពចំពោះ Roma។ Liverpool មិនចង់ឃើញអំពើហិង្សានៅមុខកីឡដ្ឋាននោះទេ តែចង់ឃើញការគាំទ្រក្នុងទីលានដ៏អស្ចារ្យដើម្បីឲ្យពិភពលោកបានឃើញ។ ដូច្នេះត្រូវគោរពគូប្រជែងរបស់យើង»។