ជាតិ
សេដ្ឋកិច្ច
ធនាគារជាតិ បញ្ចេញប្រាក់រៀលជាង ៧៦ ពាន់លានរៀលក្នុងការដេញថ្លៃខែនេះ
× ភ្នំពេញ៖ ធនាគារជាតិនៃកម្ពុជា បានបញ្ចេញប្រាក់រៀលសរុប ៧៦,២ ពាន់លានរៀល (ប្រហែល ១៩លានដុល្លារ) ក្នុងការដេញថ្លៃខែមេសានេះ ដែលមានឥណទានដេញថ្លៃ៣ប្រភេទ។ នេះបើតាមសេចក្ដីជូនដំណឹងរបស់ធនាគាជាតិ។
ក្នុងការដេញថ្លៃប្រាក់រៀលខែនេះ ធនាគារជាតិ (NBC) បានផ្ដល់ជម្រើសដេញថ្លៃ ៣ប្រភេទ ដែល NBC ទើបអនុវត្ត។ ការដេញថ្លៃសម្រាប់រយៈពេលសងត្រឡប់ ៣ខែ (ឥណប្រតិទាន៣ខែ), ៦ខែ និងការដេញថ្លៃសម្រាប់រយៈពេលសង ១ឆ្នាំ ដែលអនុវត្តកន្លងមក។
សម្រាប់ឥណប្រតិទាន៣ខែ NBC បញ្ចេញប្រាក់ ២៤,២ ពាន់លានរៀលលើការប្រាក់ ២,៦ភាគរយ ដែលមានគ្រឹះស្ថាន៣ចូលរួម។ រីឯឥណប្រតិទាន៦ខែ មានគ្រឹះស្ថាន២ចូលរួមដេញថ្លៃបានប្រាក់សរុប ២៨ ពាន់លានរៀលជាមួយការប្រាក់ ២,៨៥ភាគរយ។ ចំពោះឥណប្រតិទាន១ឆ្នាំ មានគ្រឹះស្ថានចូលរួមចំនួន២ ដេញថ្លៃបានប្រាក់សរុប ២៤ ពាន់លានរៀលក្នុងការប្រាក់ ៣,០៦ភាគរយ។
នេះគឺជាការដេញថ្លៃប្រាក់រៀល ដែលស្ថិតក្រោមប្រតិបតិ្តការផ្ដល់សន្ទនីយភាពដោយមានការធានា (LPCO) ដែល NBC ដាក់ឲ្យអនុវត្តចាប់ពីចុងឆ្នាំ២០១៦ មក ដើម្បីជំរុញការប្រើប្រាស់ប្រាក់រៀល៕
© រក្សាសិទ្ធិដោយ thmeythmey.com