កីឡាអន្តរជាតិ
អន្តរជាតិ
មិនខ្វះក្លិបធំៗចង់បាន Wenger ឡើយ ក្រោយប្រកាសចេញពី Arsenal រូបភាពពី Reuters
× អ្នកចាត់ការទូទៅសញ្ជាតិបារាំងលោក Arsene Wenger បានប្រកាសពីការចាកចេញពីក្លិប Arsenal នៅចុងរដូវកាលនេះ កាលពីថ្ងៃទី២០ ខែមេសា បន្ទាប់ពីលោកបានកាន់តំណែងអស់រយៈពេលជិត២២ឆ្នាំ។
ក្រោយការប្រកាសនេះ លោក David Dein ជាអនុប្រធានក្លិប Arsenal បានលើកឡើងថា មិនខ្វះឡើយក្លិបធំៗដែលចាប់អារម្មណ៍ចង់បាន Wenger ទៅដឹកនាំក្រុម បន្ទាប់ពីលោកចាកចេញពីទឹកដី Emirates។ នេះបើតាមការផ្សារយរបស់ទីភ្នាក់ងារព័ត៌មាន Reuters។
លោក David Dein (ស្តាំ) ឈរក្បែលោក Arsene Wenger
«គាត់ (Wenger) នឹងឈានដល់អាយុ ៦៩ឆ្នាំ ក្នុងខែតុលា ឆ្នាំ២០១៨នេះ ហើយគាត់ជាអ្នកចាត់ការដ៏មានបទពិសោធន៍ និងសកម្មបំផុតស្ទើគ្រប់ការប្រកួត។ Dein បានប្រាប់ទូរទស្សន៍ Sky Sports យ៉ាងដូច្នេះ ហើយលោកបន្ថែមថា៖«ក្នុងរយៈពេលប៉ុន្មានឆ្នាំចុងក្រោយនេះខ្ញុំដឹងរឿងខ្លះៗដែលគាត់ត្រូវបានក្លិបធំៗមួយចំនួនទាក់ទងគាត់។ ហើយអ្វីដែលខ្ញុំដឹងនោះគឺក្លិប Real Madrid, Paris St Germain រួមទាំងជម្រើសជាតិអង់គ្លេសចង់បានគាត់ទៅដឹកនាំ»។
អ្នកចាត់ការសញ្ជាតិបារាំងវ័យ ៦៨ឆ្នាំរូបនេះ បានក្លាយជាអ្នកចាត់ការក្រុមរហស្សនាមកាំភ្លើងធំតាំងពីឆ្នាំ១៩៩៦មកម្លេះ។ ក្រោមការដឹកនាំ ជាង២ទសវត្សរ៍ Wenger បាននាំ Arsenal ឈ្នះជើងឯក Premier League ៣ដង និង FA Cup ៧លើក ប៉ុន្តែក្នុងរយៈពេលប៉ុន្មានឆ្នាំចុងក្រោយនេះក្រុមដែលមានមូលដ្ឋាននៅក្រុងឡុងដ៍ធ្វើមិនសូវបានល្អនោះទេ បើទោះចំណាយប្រាក់ច្រើនសន្ធឹកក៏ដោយ។
Arsenal ស្ថិតនៅចំណាត់ថ្នាក់ទី៦ ក្នុងតារាងនៃលីកលំដាប់ទីមួយអង់គ្លេស ជាមួយនឹងភាគរយខ្ពស់មិនបានលេងក្នុងក្របខណ្ឌកំពូលអឺរ៉ុប Champions League រដូវកាលក្រោយ តែនៅសល់សិទ្ធិដណ្តើមពាន Europa League ក្នុងដៃសម្រាប់រដូវកាលនេះ៕
Tag:
បាល់ទាត់
Arsene Wenger
Arsenal
David Dein
© រក្សាសិទ្ធិដោយ thmeythmey.com