ជាតិ
CPP ដកលោក ឡាយ វណ្ណៈ ចេញពីសមាជិកបក្ស រូបពីហ្វេសប៊ុកលោក ឡាយ វណ្ណៈ អតីតអភិបាលខេត្តតាកែវ
× ភ្នំពេញ៖ គណបក្សប្រជាជនកម្ពុជា បានសម្រេចដកលោក ឡាយ វណ្ណៈ អតីតអភិបាលខេត្តតាកែវ ដែលកំពុងជាប់ពាក់ព័ន្ធរឿងក្តីឃាតកម្ម ចេញពីគណបក្ស។
គណបក្សប្រជាជន បានបញ្ជាក់ថា ការសម្រេចនេះ អនុលោមតាមលក្ខន្តិកៈ និងបទបញ្ជាផ្ទៃក្នុងរបស់គណបក្សប្រជាជនកម្ពុជា។ សេចក្តីសម្រេចរបស់គណបក្សប្រជាជន ចុះថ្ងៃទី១៨ មេសា ដែលទើបចេញផ្សាយនេះ បានបញ្ជាក់ដូច្នេះថា៖«បញ្ចេញលោក ឡាយ វណ្ណៈ ពីសមាជិកគណបក្សប្រជាជនកម្ពុជា។ ខុទ្ទកាល័យ គណៈចាត់ចែងនៃគណៈកម្មាធិការកណ្ដាល គណៈកម្មាធិការគណបក្សខេត្តតាកែវ និងលោក ឡាយ វណ្ណៈ ត្រូវបានប្រតិបត្តិតាមសេចក្តីសម្រេចនេះ»។
សារព័ត៌មានថ្មីៗ មិនអាចទាក់ទងសុំការអត្ថាធិប្បាយបន្ថែមពីអ្នកនាំពាក្យគណបក្សប្រជាជន ជុំវិញសេចក្តីសម្រេចនេះឡើយ។
ប៉ុន្តែអ្វីដែលគួរឲ្យកត់សម្គាល់នោះ ការសម្រេចដកលោក ឡាយ វណ្ណៈ ចេញពីសមាជិកបក្សនេះ ធ្វើឡើងស្របពេលដែលអតីតអភិបាលខេត្តរូបនេះ និងបងប្រុសខ្លួនឈ្មោះ ឡាយ ណារិទ្ធ កំពុងជាប់ចោទពីបទ«ឃាតកម្ម»លើលោកស្រី ចេវ សុវឌ្ឍនា កាលពីខែមករាកន្លងមក។
ចំណែកមនុស្សពីរនាក់ទៀត ដែលជាអ្នកបើកបរ និងអ្នកបម្រើ ត្រូវបានចោទថា លាក់បាំងតម្រុយ ដើម្បីធ្វើឲ្យមានឧបសគ្គក្នុងការស្វែងរកការពិតក្នុងសំណុំរឿងនេះ៕
© រក្សាសិទ្ធិដោយ thmeythmey.com