ជាតិ
លោក ហ៊ុន ម៉ាណែត ផ្តើមទស្សនកិច្ចនៅជប៉ុន និងជួបជាមួយនាយករដ្ឋមន្ត្រី អាបេ
× លោក ហ៊ុន ម៉ាណែតបានទៅដល់ប្រទេសជប៉ុនហើយនាព្រឹកថ្ងៃទី២៥ខែមេសា ដើម្បីផ្តើមទស្សនកិច្ចផ្លូវការរយៈពេល៥ថ្ងៃ។ នេះជាដំណើរទស្សនកិច្ចផ្លូវការលើកដំបូងរបស់លោក ហ៊ុន ម៉ាណែត ក្រោយពីមានការអញ្ជើញផ្ទាល់ពីប្រមុខរដ្ឋាភិបាលជប៉ុនលោក Shinzo Abe តាមរយៈសម្តេចនាយករដ្ឋមន្ត្រី ហ៊ុន សែន ក្នុងកិច្ចប្រជុំកំពូលអាស៊ី-អឺរ៉ុបនៅប្រទេសម៉ុងហ្គោលី កាលពីខែកក្កដាឆ្នាំ២០១៦។
លោក ហ៊ុន ម៉ាណែត នាយរងសេនាធិការចម្រុះនៃកងយោធពលខេមរភូមិន្ទ កំពុងបំពេញទស្សនកិច្ចផ្លូវការរយៈ៥ថ្ងៃ នៅក្នុងប្រទេសជប៉ុន។ ទស្សនកិច្ចនេះ ធ្វើឡើងតាមការអញ្ជើញរបស់រដ្ឋាភិបាលជប៉ុន ក្នុងគោលដៅពង្រឹង និងធ្វើឲ្យស៊ីជម្រៅលើការយល់ដឹងពីទំនាក់ទំនងទ្វេភាគីកម្ពុជា-ជប៉ុន ក្រោមកម្មវិធី«ផ្លាស់ប្តូរយុទ្ធសាស្ត្រកម្រិតអ្នកអនុវត្ត» (Program for Strategic Exchanges on Practical Level)។
ក្នុងពេលបំពេញទស្សនកិច្ចនៅក្នុងប្រទេសជប៉ុន លោក ហ៊ុន ម៉ាណែត នឹងជួបជាមួយលោកនាយករដ្ឋមន្ត្រីជប៉ុន Shinzo Abe។ នេះបើតាមការអះអាងពីប្រភពព័ត៌មានដ៏គួរឲ្យទុកចិត្ត។
បើគេអានការផ្តល់ព័ត៌មាននៅលើគណនីហ្វេសប៊ុករបស់លោក ហេង សួរ ដែលជាសមាជិកគណៈប្រតិភូរបស់លោក ហ៊ុន ម៉ាណែតដែរនោះ លោក ហ៊ុន ម៉ាណែត នឹងជួបសម្តែងការគួរសម ជាមួយថ្នាក់ដឹកនាំជាន់ខ្ពស់នៃរដ្ឋាភិបាល ក្រសួងការបរទេស ក្រសួងការពារជាតិ កងស្វ័យការពារ និងគណបក្សប្រជាធិបតេយ្យសេរី ព្រមទាំងជួបពិភាក្សាការងារជាមួយឥស្សរជន និងសមាជិកសភារបស់ជប៉ុនមួយចំនួនទៀតផង។
ទស្សនកិច្ចផ្លូវការរបស់លោក ហ៊ុន ម៉ាណែត ដែលជាកូនប្រុសច្បងរបស់ប្រមុខរដ្ឋាភិបាលកម្ពុជានៅពេលនេះ ទើបតែអាចកើតឡើងនៅពេលនេះ ក្រោយពីលោកនាយករដ្ឋមន្ត្រីជប៉ុន Shinzo Abe បានជម្រាបប្រាប់សម្តេចនាយករដ្ឋមន្ត្រី ហ៊ុន សែន កាលពីខែកក្កដាឆ្នាំ២០១៦ ថាលោកអញ្ជើញលោក ហ៊ុន ម៉ាណែត ទៅទស្សនកិច្ចនៅប្រទេសជប៉ុន។ ឯកអគ្គរាជទូតជប៉ុនធ្លាប់បានបញ្ជាក់ប្រាប់សារព័ត៌មានថ្មីៗថា លោក ហ៊ុន ម៉ាណែត ដែលជាកូនប្រុសច្បងរបស់ប្រមុខរដ្ឋាភិបាលកម្ពុជា គឺជាឥស្សរជនសំខាន់ ដែលជប៉ុនចាប់អារម្មណ៍៕
Tag:
ហ៊ុន ម៉ាណែត
ជប៉ុន
Shinzo Abe
© រក្សាសិទ្ធិដោយ thmeythmey.com