ជាតិ
នយោបាយជាតិ
រ៉ូណា ស្មីត៖ មិនមែនជាការបោះឆ្នោតពិតប្រាកដទេ បើគ្មានបក្សប្រឆាំង លោក កឹម សុខា ជួបលោកស្រី រ៉ូណា ស្មីត កាលពីអំឡុងខែតុលា ឆ្នាំ២0១៦។ រូបពីទំព័រហ្វេសបុក Cambodian National Rescue Party
× ភ្នំពេញ៖ អ្នកជំនាញរបស់អង្គការសហប្រជាជាតិ យល់ថា ការបោះឆ្នោត មិនអាចយកជាការបានទេ ប្រសិនបើបក្សប្រឆាំង ត្រូវបានផាត់ចេញ។ អ្នកនាំពាក្យគ.ជ.ប. ឆ្លើយតបថា ការយល់ឃើញបែបនេះ មិនឆ្លុះបញ្ចាំងពីការពិតនៅកម្ពុជាឡើយ។ ឯមន្ត្រីបក្សកាន់អំណាច អះអាងថា ការបោះឆ្នោត នឹងត្រូវរៀបចំឡើងតាមច្បាប់ និងគោលការណ៍ប្រជាធិបតេយ្យ។
ខណៈគណបក្សកាន់អំណាច និងគណបក្សនានានៅកម្ពុជា កំពុងសម្រុកយកពាក្យទៅដាក់នៅគណៈកម្មាធិការជាតិរៀបចំការបោះឆ្នោត (គ.ជ.ប.) ដើម្បីចូលរួមប្រកួតប្រជែងក្នុងការបោះឆ្នោតថ្នាក់ជាតិនាពេលខាងមុខ លោកស្រី រ៉ូណា ស្មីត អ្នករាយការណ៍ពិសេសនៃអង្គការសហប្រជាជាតិ ក៏បានចេញសេចក្តីប្រកាសព័ត៌មានមួយ ពីទីក្រុងហ្សឺណែវ ប្រទេសស្វីស នៅថ្ងៃទី៣០ ខែមេសា ឆ្នាំ២០១៨ ដោយសំដៅមកកាន់រដ្ឋាភិបាលកម្ពុជា។
ខ្លឹមសារក្នុងសេចក្តីប្រកាសព័ត៌មាន បានបង្ហាញយ៉ាងច្បាស់ពីបំណងរបស់លោកស្រី ដែលចង់ឲ្យការបោះឆ្នោត មានវត្តមានរបស់អតីតគណបក្សសង្គ្រោះជាតិ ដែលជាគណបក្សប្រឆាំងធំជាងគេនៅកម្ពុជា។ លោកស្រី រ៉ូណា ស្មីត ដែលធ្លាប់មកកម្ពុជាចំនួន៥លើក ដើម្បីតាមដានស្ថានការនយោបាយ និងបញ្ហាសិទ្ធិមនុស្ស បានបញ្ជាក់ក្នុងសេចក្តីប្រកាសព័ត៌មានយ៉ាងដូច្នេះថា៖«ការបោះឆ្នោត មិនអាចក្លាយជាការបោះឆ្នោតពិតប្រាកដបានទេ ប្រសិនបើគណបក្សប្រឆាំងដ៏ធំមួយត្រូវបានរារាំងមិនឲ្យចូលរួម»។
លោកស្រី ថែមទាំងជំរុញឲ្យរដ្ឋាភិបាលកម្ពុជា ដោះលែងលោក កឹម សុខា ជាបន្ទាន់ និងបើកសិទ្ធិឲ្យថ្នាក់ដឹកនាំទាំង១១៨រូបនៃគណបក្សប្រឆាំងឡើងវិញ ដើម្បីបានចូលរួមប្រកួតប្រជែងក្នុងការបោះឆ្នោត។ លោកស្រី យល់ថា លក្ខខណ្ឌខាងលើដែលលោកស្រីស្នើឡើង គឺអាចធានាឲ្យមានប្រជាធិបតេយ្យ សេរីពហុបក្ស និងការគោរពសិទ្ធិរបស់ប្រជាពលរដ្ឋ ក្នុងការចូលរួមបោះឆ្នោត។
អ្នកជំនាញផ្នែកសិទ្ធិមនុស្សនៃអង្គការសហប្រជាជាតិរូបនេះ បន្ថែមចុងក្រោយថា រដ្ឋាភិបាលកម្ពុជា នៅមានឱកាស ដើម្បីងាកទៅរកគន្លងប្រជាធិបតេយ្យ និងការបោះឆ្នោតមួយ ដែលគណបក្សទាំងអស់ បានចូលរួមប្រកួតប្រជែងដោយស្មើភាពគ្នា ដូចមានចែងក្នុងរដ្ឋធម្មនុញ្ញ។
លោក ហង្ស ពុទ្ធា អ្នកនាំពាក្យគ.ជ.ប. បានហៅការលើកឡើងរបស់លោកស្រី រ៉ូណា ស្មីត ថាមិនស្របតាមទិដ្ឋភាពច្បាប់ និងទិដ្ឋភាពជាក់ស្តែងនៅកម្ពុជា។ លោក បកស្រាយថា គ.ជ.ប. ត្រូវតែរៀបចំការបោះឆ្នោតតាមការកំណត់របស់ច្បាប់ ដោយមិនគិតថាមានគណបក្សប្រឆាំង ឬគ្មាននោះទេ។
អ្នកនាំពាក្យគ.ជ.ប. បានប្រាប់សារព័ត៌មានថ្មីៗតាមទូរសព្ទ បែបនេះថា៖«ការលើកឡើងរបស់លោកស្រី គ្រាន់តែជាយោបល់ផ្ទាល់ខ្លួនប៉ុណ្ណោះ។ គេយល់យ៉ាងម៉េច គឺជារឿងរបស់គេ។ តែគ.ជ.ប. នៅតែខិតខំបំពេញតួនាទីរបស់ខ្លួន ឲ្យស្របតាមច្បាប់»។
លោក សុខ ឥសាន អ្នកនាំពាក្យគណបក្សប្រជាជនកម្ពុជា មិនទាន់បានឆ្លើយតបនឹងលោកស្រី រ៉ូណា ស្មីត ឡើយ។ ប៉ុន្តែ លោកបានលើកឡើងជាច្រើនលើកច្រើនសា ជុំវិញការបោះឆ្នោតនៅកម្ពុជា។
អ្នកនាំពាក្យគណបក្សកាន់អំណាច អះអាងថា ការបោះឆ្នោត នឹងមិនមានអតីតគណបក្សប្រឆាំងជាដាច់ខាត។ ប៉ុន្តែលោក មានសុទិដ្ឋិនិយមយ៉ាងខ្ពស់ថា ប្រជាជនកម្ពុជាជាង ៨៤ភាគរយ ដែលមានឈ្មោះនៅក្នុងបញ្ជីបោះឆ្នោត នឹងទៅបោះឆ្នោត។
មន្ត្រីជាន់ខ្ពស់គណបក្សកាន់អំណាចខាងលើ បានសរសេរសារទៅកាន់ក្រុមអ្នកកាសែតក្នុងបណ្តាញទំនាក់ទំនងតេឡេក្រាម នៅថ្ងៃទី១ ខែឧសភា ឆ្នាំ២០១៨នេះ យ៉ាងដូច្នេះថា៖«ដំណើរការបោះឆ្នោត និងការបោះឆ្នោត គឺស្របទៅតាមគោលការណ៏ច្បាប់ និងប្រជាធិបតេយ្យ ដោយមិនអាស្រ័យលើអតីតគណបក្សប្រឆាំង និងអ្នកវិភាគ និយាយថាស្របច្បាប់ ឬមិនស្របច្បាប់នោះទេ»។
មកដល់ពេលនេះ គណបក្សប្រជានកម្ពុជា ដែលកំពុងដឹកនាំរដ្ឋាភិបាល និងគណបក្សមួយចំនួន បានយកពាក្យទៅដាក់នៅគ.ជ.ប. រួចហើយ ដើម្បីចូលរួមប្រកួតប្រជែងក្នុងការបោះឆ្នោតជ្រើសតាំងតំណាងរាស្ត្រនីតិកាលទី៦ នៅថ្ងៃទី២៩ ខែកក្កដា ឆ្នាំ២០១៨។ ឯគណបក្សផ្សេងទៀត កំពុងតែរៀបចំឯកសារ ដើម្បីត្រៀមដាក់ពាក្យទៅគ.ជ.ប.។
ការបោះឆ្នោតនៅកម្ពុជា កំពុងស្ថិតក្នុងការយល់ឃើញផ្ទុយគ្នារវាងរដ្ឋាភិបាលកម្ពុជា និងសហគមន៍អន្តរជាតិ។ ប្រទេសមួយចំនួន ដូចជាសហរដ្ឋអាមេរិក និងសហភាពអឺរ៉ុបជាដើម ចាត់ទុកការបោះឆ្នោតនៅកម្ពុជា ថាមិនប្រព្រឹត្តទៅតាមគន្លងប្រជាធិបតេយ្យ និងមិនមានភាពស្របច្បាប់ឡើយ ប្រសិនបើបាត់គណបក្សសង្គ្រោះជាតិ រួមទាំងថ្នាក់ដឹកនាំនៃគណបក្សនេះ នៅតែត្រូវបានបិទសិទ្ធិនយោបាយ។
ប៉ុន្តែរដ្ឋាភិបាលកម្ពុជា និងគណបក្សកាន់អំណាច នៅតែប្រកាន់ជំហរថា ការបោះឆ្នោត នឹងដំណើរការជាប្រក្រតី ដោយមិនខ្វល់ពីការទទួលស្គាល់ឬមិនទទួលស្គាល់ពីសហគមន៍អន្តរជាតិឡើយ។ ចំណែកករណីក្រុមប្រឆាំង ក៏ត្រូវបានរដ្ឋាភិបាល លើកឡើងជាញឹកញាប់ដែរថា បានប្រព្រឹត្តបទល្មើសដោយខ្លួនឯង ដូច្នេះមិនអាចលើកលែងឲ្យបាននោះទេ៕
Tag:
បោះឆ្នោត
រ៉ូណា ស្មីត
ហង្ស ពុទ្ធា
សុខ ឥសាន
គជប
© រក្សាសិទ្ធិដោយ thmeythmey.com