បទយកការណ៍ / បទសម្ភាសន៍
សេដ្ឋកិច្ច
ពីអ្នកលក់តូចតាច រហូតបើកហាងបុកល្ហុងតម្លៃជាង១០ម៉ឺនដុល្លារ៣សាខា ភ្ញៀវ ណែនៗ
×![]()
ដោយ: ថ្មីៗ
ភ្នំពេញ៖ ខណៈដែលហាងមួយចំនួនបើកហើយបិទទៅវិញក្នុងវិស័យអាជីវកម្ម ហាងបុកល្ហុងយីហោ ត្បាល់ខ្មែរ នៅតែឈរជើងបានល្អ និងពង្រីកខ្លួនជាប្រចាំ។ តើកត្តាអ្វីខ្លះធ្វើឲ្យយីហោមួយនេះល្បីក្នុងរាជធានីភ្នំពេញ និងទាក់ទាញបានភ្ញៀវច្រើនកុះករជាប្រចាំ? 
សូមអញ្ជើញស្ដាប់កិច្ចសម្ភាសពីគន្លឹះជោគជ័យរបស់អ្នកស្រី ឆោម ឆលិកា ម្ចាស់ហាងបុកល្ហុង«ត្បាល់ខ្មែរ» និងលោក ញ៉ុង ហេង អ្នកកាសែតផ្នែកសេដ្ឋកិច្ចនៃសារព័ត៌មានអេឡិចត្រូនិកថ្មីៗ ដូចតទៅ៖
អ្នកស្រី ឆោម ឆលិកា ចាប់ផ្ដើមលក់បុកល្ហុងតាំងពីឆ្នាំ២០០៨ មកម្លេះ ដែលកាលនោះអ្នកស្រីលក់នៅលើច្រកផ្លូវតូចប៉ុណ្ណោះ។ ដល់ឆ្នាំ២០១០ អ្នកស្រីពង្រីកអាជីវកម្មនេះទៅជាលក់បុកល្ហុងនៅក្នុងផ្ទះល្វែង។ សព្វថ្ងៃអ្នកស្រី ឆលិកា បើកហាងបុកល្ហុងនេះចំនួន៣ទីតាំង។ សាខាបឹងកេងកង និងសាខាស៊ីសុវត្ថិ អ្នកស្រីបោះទុនបង្កើតហាងលក្ខណៈស្ដង់ដារតម្លៃជាង ១០ម៉ឺនដុល្លារក្នុងមួយទីតាំងៗ ខណៈសាខាទូលទំពូងនៅជាហាងតូចជាងនេះនៅឡើយ។
មុនចេញធ្វើអាជីវកម្មអ្នកស្រី ឆោម ឆលិកា បានសិក្សាបញ្ចប់បរិញ្ញាបត្រចំនួនពីរគឺផ្នែកច្បាប់ និងទេសចរណ៍ និងបានបម្រើការងារអស់រយៈពេលបួនប្រាំឆ្នាំ។
ខ្លួនអ្នកស្រីផ្ទាល់ ជាអ្នកចូលចិត្តបរិភោគបុកល្ហុង។ អ្នកស្រី ឆលិកា ឲ្យដឹងថា អ្នកស្រីធ្វើអាជីវកម្មនេះ ដោយក្ដីស្រលាញ់ចូលចិត្ត ដែលបង្កើតឲ្យមានការយកចិត្តទុកដាក់ខ្លាំងលើធុរកិច្ចមួយនេះ។
«អាជីវកម្មមួយ បើយើងមិន Update (កែលម្អជាប្រចាំ) ដោយទុកវាឲ្យនៅដដែលៗ នោះអាយុកាលរបស់វាអត់យូរទេ»។ នេះជាចក្ខុវិស័យដែលម្ចាស់ហាងបុកល្ហុងរូបនេះបានលើកឡើង ដើម្បីទាក់ទាញអតិថិជនឲ្យនៅតែគាំទ្រផលិតផល និងសេវាកម្មរបស់ខ្លួនជាប្រចាំ។ អ្នកស្រី ឆលិកា គូសបញ្ជាក់ថា អ្នកស្រីព្យាយាមស្វែងយល់ពីតម្រូវការ អារម្មណ៍របស់អតិថិជន និងបានកែលម្អគុណភាពរសជាតិ សេវាកម្ម អនាម័យ ការតុបតែង និងបន្ថែមមុខមុខម្ហូបថ្មីៗ។
មុខម្ហូបខ្លះ គឺចេញពីការស្រមើលស្រមៃរបស់អ្នកស្រីផ្ទាល់ និងច្នៃប្រតិដ្ឋវាឡើង ដើម្បីឲ្យអតិថិជនទទួលបានអ្វីដែលថ្មី។ អ្នកស្រី ឆលិកា ថ្លែងបែបនេះ។ ក្រៅពីបុកល្ហុង ហាងនេះមានលក់ដូចជា បបរ យ៉ាហន ស៊ុប ជាដើម។
ម្ចាស់ហាងបុកល្ហុងយីហោត្បាល់ខ្មែររូបនេះ អះអាងថា មុខម្ហូបបុកល្ហុងទាំងនេះ ជាស្នាដៃរបស់អ្នកស្រីផ្ទាល់ ដែលជាជំនាញចេះតពីសាច់ញាតិ ពោលគឺមិនមែនចម្លងពីប្រទេសថៃនោះទេ៕
Tag:
បុកល្ហុង
ឆោម ឆលិកា
startup
© រក្សាសិទ្ធិដោយ thmeythmey.com
