ជនណាដែលរារាំងពលរដ្ឋបោះឆ្នោត នឹងរងពិន័យពី៥ ទៅ២០លានរៀល ដោយពុំទាន់គិតទោសព្រហ្មទណ្ឌ

ជាតិ

នយោបាយជាតិ

ជនណាដែលរារាំងពលរដ្ឋបោះឆ្នោត នឹងរងពិន័យពី៥ ទៅ២០លានរៀល ដោយពុំទាន់គិតទោសព្រហ្មទណ្ឌ

06, May 2018 , 2:36 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ ជនណាដែលរារាំងពលរដ្ឋបោះឆ្នោត នឹងរងពិន័យពី៥ ទៅ២០លានរៀល ដោយពុំទាន់គិតទោសព្រហ្មទណ្ឌផ្សេងៗទៀត ។

ការផាកពិន័យនេះ មានចែងនៅក្នុងច្បាប់ស្តីពីការជ្រើសរើសតំណាងរាស្ត្រ ត្រង់ជំពូកទី១០ ស្តីពីទោសបញ្ញត្តិ នៃមាត្រា៤២ ចែងថា«ត្រូវផាកពិន័យជាប្រាក់ពី៥,០០០,០០០រៀល (ប្រាំលាន)រៀល ទៅ២០,០០០,០០០រៀល ដោយគណៈកម្មាធិការជាតិរៀបចំការបោះឆ្នោត ដោយពុំទាន់គិតដល់ទោសព្រហ្មទណ្ឌផ្សេងទៀត ចំពោះជនណា ដែលតាមគ្រប់មធ្យោបាយទុច្ចរិត»។

ចំណុច ដែលចាត់ទុកជាការល្មើសច្បាប់ ដែលត្រូវផាកពិន័យនោះ រួមមាន៖ រារាំងប្រជាពលរដ្ឋដែលមានសិទ្ធិបោះឆ្នោត មិនឲ្យទៅចុះឈ្មោះបោះឆ្នោត ឬរារាំងមិនឲ្យចុះឈ្មោះប្រជាពលរដ្ឋ ដែលមានសិទ្ធិបោះឆ្នោតក្នុងបញ្ជីបោះឆ្នោត និងសៀវភៅបញ្ជីបោះឆ្នោត។

-បង្កការអុកឡុក ឬរារាំងសកម្មភាពជាប្រក្រតី ក្នុងទីកន្លែងសម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោត នៅក្នុងអំឡុងពេលនៃការពិនិត្យបញ្ជី និងចុះឈ្មោះបោះឆ្នោត។

-ឲ្យអ្នកគាំទ្រ ឬអ្នកបោះឆ្នោត ប្រព្រឹត្តអំពើរំលោភបំពាន អំពើគំរាមកំហែង អំពើហិង្សា ទៅលើបេក្ខជន ឬទៅលើគណបក្សនយោបាយដទៃ។

-រារាំងប្រជាពលរដ្ឋដែលមានសិទ្ធិបោះឆ្នោត មិនឲ្យទៅបោះឆ្នោត។

-រារាំងបេក្ខជន ឬអ្នកគាំទ្រគណបក្សនយោបាយមិនឲ្យឃោសនាបោះឆ្នោតតាមការកំណត់។

-ធ្វើឲ្យបាត់ទំនុកចិត្តលើការសម្ងាត់នៃការបោះឆ្នោត។

-ធ្វើឲ្យមានការភាន់ច្រឡំនាំឲ្យបាត់បង់ទំនុកចិត្តលើការបោះឆ្នោត។

-បង្កការរំខានមិនឲ្យដំណើរការបោះឆ្នោតបាន។

-បង្កការរំខានមិនឲ្យរាប់សន្លឹកឆ្នោតបាន។

-ធ្វើឲ្យខូចរបៀបរៀបរយក្នុងពេលបោះឆ្នោត។

-ទិញសន្លឹកឆ្នោតដោយសម្ភារ ឬដោយប្រាក់កាស។

ត្រូវលុបឈ្មោះចេញពីបញ្ជីឈ្មោះបោះឆ្នោត ឬលុបបេក្ខភាពរបស់សាមីខ្លួន ដោយគណៈកម្មាធិការជាតិរៀបចំការបោះឆ្នោត បន្ថែមលើទណ្ឌកម្មដែលមានចែងក្នុងកថាខណ្ឌទី១ ខាងលើ ចំពោះជនដែលប្រព្រឹត្តអំពើល្មើសដូចមានចែងក្នុងកថាខណ្ឌទី១ ខាងលើនេះ។

ត្រង់ចំណុចនេះគណៈកម្មាធិការជាតិរៀបចំការបោះឆ្នោត (គ.ជ.ប) ស្នើឲ្យមេដឹកនាំ និងសកម្មជនគាំទ្រនយោបាយ កុំប្រព្រឹត្តសកម្មភាពមិនគប្បីណាមួយ ដែលប៉ះពាល់ដល់ដំណើរការបោះឆ្នោតខាងមុខនេះ។ បន្ថែមពីនេះ លោក ហង្ស ពុទ្ធា ក៏អំពាវនាវឲ្យប្រជាពលរដ្ឋ ចូលរួមការបោះឆ្នោត ដោយមិនត្រូវជឿលើការ អុចអាលរបស់អ្នកនយោបាយឡើយ។

មកដល់ពេលនេះ មានគណបក្សនយោបាយចំនួន៣ហើយ ដែលបានមកដាក់ពាក្យនៅគ.ជ.ប ដើម្បីចូលរួមឈរបោះឆ្នោតនៅថ្ងៃទី២៩ កក្កដាខាងមុខនេះ។ គណបក្សទាំង៣នេះ មានគណបក្សប្រជាជនកម្ពុជា គណបក្សយុវជនកម្ពុជា និងគណបក្សសញ្ជាតិកម្ពុជា៕