ជាតិ
សង្គមជាតិ
ក្រសួងការងារ ត្រៀមប្រើយុទ្ធសាស្ត្រ៣ចំណុច ដើម្បីទប់ស្កាត់បញ្ហាគ្រោះថ្នាក់នៅតាមរោងចក្រ
× ភ្នំពេញ៖ ក្រសួងការងារ បានត្រៀមអនុវត្តយុទ្ធសាស្ត្រ៣ចំណុច ក្នុងគោលបំណងដើម្បីលុបបំបាត់បញ្ហាគ្រោះថ្នាក់ផ្សេងៗ នៅតាមសហគ្រាស និងរោងចក្រនានា។
យុទ្ធសាស្ត្រទាំង៣ចំណុចនេះ រួមមាន ការពង្រឹងការអនុវត្តច្បាប់ដោយចុះធ្វើអធិការកិច្ច នៅតាមរោងចក្រជាប្រចាំ ការបង្កើនលិខិតបទដ្ឋានគតិយុត្តស្តីពីសុខភាព និងសុវត្ថិភាពការងារ និងការចុះអប់រំបណ្តុះបណ្តាល ដល់កម្មករ និងកម្មការិនី នៅតាមរោងចក្រកាត់ដេរ និងស្បែកជើង។ នេះបើតាមការចេញផ្សាយព័ត៌មានដោយទីភ្នាក់ងារសារព័ត៌មានកម្ពុជា។
លោក ឡេង តុង ប្រធាននាយកដ្ឋានពេទ្យការងារ បានបញ្ជាក់ថា យុទ្ធសាស្ត្រទាំង៣នេះ នឹងលើកកម្ពស់ខាងសុវត្ថិភាពការងារ ដើម្បីឈានទៅរកការកាត់បន្ថយ បញ្ហាគ្រោះថ្នាក់ តាមរោងចក្រ។ ប្រធាននាយកដ្ឋានពេទ្យការងារ បានបន្តថា៖«ដើម្បីធានាបានសុវត្ថិភាពការងារ ក្រសួងក៏បង្កើតប្រព័ន្ធគ្រប់គ្រងសុខភាព ដែលតម្រូវឲ្យរោងចក្រត្រួតពិនិត្យ លើឧបករណ៍ បច្ចេកវិទ្យាណដែលគោរពទៅតាមល័ក្ខខណ្ឌការងារ និងអប់រំឲ្យកម្មករ និងកម្មការិនីមានអនាម័យក្នុងការហូបចុកចំណីអាហារផ្សេងៗ»។
បើតាមរបាយការណ៍របស់ក្រសូងការងារបណ្តុះបណ្តាលវិជ្ជាជីវៈ ក្នុងរយៈពេល៤ខែ ដើមឆ្នាំ២០១៨ នេះ ករណីដែលកម្មករដួលសន្លប់នៅក្នុងរោងចក្រដោយសារការបំពុលពីបរិស្ថាន និងខាងក្រៅរោងចក្រមានការចុះថយ មកត្រឹមតែជាង ៤០០ករណីតែប៉ុណ្ណោះ៕
© រក្សាសិទ្ធិដោយ thmeythmey.com