ជាតិ
សង្គមជាតិ
អាជ្ញាធរខេត្តក្រចេះ៖ ពលរដ្ឋជាង៤០នាក់ ដែលបានពុលនំអន្សមអាំងរួចផុតពីគ្រោះថ្នាក់
× ក្រចេះ៖ ប្រជាពលរដ្ឋ៤៤នាក់ ដែលរស់នៅក្នុងភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ បានជួបប្រទះបញ្ហាពុលនំអន្សមអាំង កាលពីថ្ងៃទី៦ ឧសភា។ ប៉ុន្តែករណីពុលនេះ មិនបណ្ដាលឲ្យមានអ្នកគ្រោះថ្នាក់ដល់ជីវិតឡើយ ក្រោយពីបានជួយសង្គ្រោះបន្ទាន់នៅមន្ទីរពេទ្យបង្អែកខេត្តក្រចេះ។
ប្រធានមន្ទីរសុខាភិបាលខេត្តក្រចេះ លោក ឈ្នាង សុវត្ថា បាននិយាយថា ករណីពុលនំអន្សមអាំងនេះ ខាងមន្ទីរសុខាភិបាល មិនទាន់ពិនិត្យរកឃើញមូលហេតុនៅឡើយទេ ខណៈអាជ្ញាធរកំពុងដំណើរការស្រាវជ្រាវ ទើបអាចបង្ហាញលទ្ធផលនៅពេលក្រោយ។ ចំពោះពលរដ្ឋរងគ្រោះវិញ លោក ឈ្នាង សុវត្ថា បានបញ្ជាក់ថា ពួកគេបានរួចផុតពីគ្រោះថ្នាក់ដល់ជីវិតហើយ។
ថ្លែងប្រាប់សារព័ត៌មានថ្មីៗ លោក ឈ្នាង សុវត្ថា បាននិយាយដូច្នេះថា៖«ប្រជាពលរដ្ឋជាង ៤០នាក់ដែលបានពុលនំអន្សមអាំងកាលពីព្រឹកមិញនេះ ឥឡូវពួកគាត់មានអាការធូរស្បើយទាំងអស់ មិនមានអ្នកណាម្នាក់មានសភាពធ្ងន់ធ្ងរទេ។
កាលពីពេលថ្មីៗនេះ ក៏មានប្រជាពលរដ្ឋជាង១៤០នាក់ បានរងគ្រោះដោយសារការពុលទឹកព្រែកទេរ និងស្រាផងដែរ។ ពលរដ្ឋទាំងនោះ រស់នៅភូមិស្រែនន និងភូមិអាលច ឃុំកន្ទួត ស្រុកចិត្របូរី នៅខេត្តក្រចេះ។ ក្នុងចំណោមពលរដ្ឋ១៤៩នាក់ ដែលបានពុលទឹកនិងស្រានេះ មានអ្នកស្លាប់ចំនួន ១១នាក់។ ចំណែកអ្នកជំងឺ ១៣៤នាក់ កំពុងតែសម្រាកព្យាបាលនៅមន្ទីរពេទ្យខេត្តក្រចេះ ខណៈដែលពលរដ្ឋ ១២នាក់ទៀត មានសភាពពុលធ្ងន់ធ្ងរ បានបញ្ជូនមកព្យាបាលនៅមន្ទីរពេទ្យភ្នំពេញ។ អ្នកជំងឺបញ្ជូនមកភ្នំពេញ គឺអ្នកពុលស្រាដែលមានជាតិមេតាណុលខ្ពស់។ នេះបើតាមសេចក្ដីជូនព័ត៌មានរបស់ ក្រសួងសុខាភិបាលចុះថ្ងៃទី៧ ខែឧសភានេះ ៕
Tag:
ឈ្នាង សុវត្ថា
ពុលនំអន្សម
ក្រចេះ
© រក្សាសិទ្ធិដោយ thmeythmey.com