ជាតិ
សង្គមជាតិ
រដ្ឋមន្ត្រីព័ត៌មានស្នើឲ្យចាត់ការម្ចាស់យានយន្តដែលបិទរូបភាព ឬសារជាអក្សរក្នុងន័យអសីលធម៌
× លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន នាថ្ងៃទី៧ ខែឧសភា នេះ បានសរសេរលិខិតទៅកាន់អភិបាលរាជធានី-ខេត្ត ប្រធានស្ថាប័ន និងអង្គភាពពាក់ព័ន្ធ ដើម្បីស្នើសហការចាត់វិធានការចំពោះម្ចាស់ក្រុមហ៊ុនដឹកជញ្ជូន ម្ចាស់រថយន្ត និងម្ចាស់យានយន្តគ្រប់ប្រភេទ ដែលបិទស្ទីកឃើរ (Sticker) ជារូបភាព ឬសារជាអក្សរ ក្នុងន័យអសីលធម៌។
បើតាមលោករដ្ឋមន្ត្រី ទង្វើទាំងនេះ ធ្វើឲ្យប៉ះពាល់យ៉ាងធ្ងន់ធ្ងរដល់កិត្តិយស សេចក្តីថ្លៃថ្នូរ និងសីលធម៌ សង្គម។
លោកបានស្នើយ៉ាងដូច្នេះថា៖ «ដើម្បីចៀសវាងផលអវិជ្ជមានមកលើប្រពៃណី ទំនៀមទម្លាប់ និងវប្បធម៌ ដ៏ល្អផូរផង់របស់ប្រជាជនខ្មែរយើងតាំងពីដើមរៀងមក ក្រសួងព័ត៌មាន សូមកិច្ចសហការជាមួយរដ្ឋបាលរាជធានី ខេត្ត និងស្ថាប័ន អង្គភាពពាក់ព័ន្ធចាត់វិធានការចំពោះម្ចាស់ក្រុមហ៊ុនដឹកជញ្ជូន ម្ចាស់រថយន្ត និងម្ចាស់យានយន្តគ្រប់ប្រភេទដែលប្រព្រឹត្តល្មើសទាំងនេះឲ្យបានតឹងរឹងបំផុត»៕
© រក្សាសិទ្ធិដោយ thmeythmey.com