អន្តរជាតិ
នយោបាយអន្តរជាតិ
រូបភាព AP
×![]()
ថ្ងៃសុក្រទី ១១ ខែឧសភានេះ នាយករដ្ឋមន្ត្រីម៉ាឡេស៊ីថ្មីលោក មហាធៀ មហាម៉ាត់ បានបញ្ជាក់ថា មហាក្សត្រម៉ាឡេស៊ីឯកភាពលើកលែងទោសដល់មេដឹកនាំបក្សយុត្តិធម៌ប្រជាជន (PKR) លោក អាន់វ៉ា អ៊ីប្រាហ៊ីម ដែលកំពុងជាប់ពន្ធនាគារដោយសារពាក់ព័ន្ធការរួមភេទជាមួយមនុស្សប្រុសដូចគ្នា។
មហាក្សត្រម៉ាឡេស៊ី មូហាម៉ាត់ទីប្រាំ (Yang di Pertuan Agong) បានសន្យាលើកលែងទោសដល់លោក អាន់ វ៉ា អ៊ីប្រាហ៊ីម មេដឹកនាំបក្សយុត្តិធម៌ប្រជាជន (សមាជិកសម្ព័ន្ធបក្សប្រឆាំង Pakatan Harapan) ហើយការដោះលែងនោះនឹងចាប់ផ្តើមភ្លាមៗតែម្តង»។ នេះជាការបញ្ជាក់របស់នាយករដ្ឋមន្ត្រីម៉ាឡេស៊ីថ្មីលោក មហាធៀ មហាម៉ាត់នៅថ្ងៃសុក្រទី ១១ ខែឧសភានេះ។
យោងតាមសារព័ត៌មាន Malaysiankini ក្នុងសន្និសីទសារព័ត៌មាននៅទីក្រុងកូឡាឡាំពួរ លោក មហាធៀ បានបញ្ជាក់ដូច្នេះ៖« ក្នុងពេលពិភាក្សារវាងសមាជិកបក្សជាមួយព្រះមហាក្សត្រ ព្រះមហាក្សត្របានបង្ហាញឆន្ទៈទ្រង់ក្នុងការលើកលែងទោសដល់លោក អាន់វ៉ា ភ្លាមៗ »។
ក្រោយទទួលបានភ្លើងបៃតងពីព្រះមហាក្សត្រ លោក មហាធៀ បន្ថែមថា សម្ព័ន្ធគណបក្ស Pakatan Harapan នឹងចាប់ផ្តើមដំណើរការនីតិវិធីរបស់ខ្លួនតែម្តង។ វាជាការត្រួសត្រាយផ្លូវមួយសម្រាប់លោក អាន់វ៉ា ឲ្យត្រឡប់ចូលនយោបាយជាថ្មីទៀត និងឈានទៅទទួលអំណាចជានាយករដ្ឋមន្ត្រីពីលោក មហាធៀ នៅពេលខាងមុខផង។
មុនបង្កើនសម្ព័ន្ធភាពបក្សប្រឆាំង លោក មហាធៀ បានសន្យាហើយថា លោកនឹងផ្ទេរតំណែងឲ្យលោក អាន់វ៉ា វិញពេលចេញពីពន្ធនាគារនោះ។ ប៉ុន្តែលោកក៏បានពន្យល់ផងថា លោកត្រូវការពេលវេលាខ្លះដើម្បីដោះស្រាយបញ្ហាប្រឈមក្នុងនយោបាយម៉ាឡេស៊ី ព្រោះលោកមានបទពិសោធន៍ស្រាប់។
តាមពិតទៅ លោក អាន់វ៉ា នឹងត្រូវដោះលែងនៅថ្ងៃទី ១០ ខែមិថុនាខាងមុខ ដោយសារលោកជាប់ពន្ធនាគារអស់រយៈពេលមួយភាគបីនៃទោសសរុបហើយនោះ។ នេះជាការអះអាងរបស់ នាយកដ្ឋានពន្ធនាគារម៉ាឡេស៊ី កាលពីខែមីនាកន្លងមក។
តាមពិតទៅ លោក អាន់វ៉ា ធ្លាប់ជាអតីតឧបនាយករដ្ឋមន្ត្រីក្រោមអាណត្តិលោក មហាធៀ។ លោកត្រូវបានលោក មហាធៀ បណ្តេញចេញពីតំណែងឆ្នាំ ១៩៩៨ ហើយក្រោយមកត្រូវបានគេចាប់ដាក់ពន្ធនាគារដោយសារបទល្មើសរួមភេទជាមួយមនុស្សប្រុសដូចគ្នាថែមទៀត។ លោកត្រូវបានគេចាប់ដាក់ពន្ធនាគារម្តងទៀតកាលពីឆ្នាំ ២០១៥ ដោយលោករងការចោទប្រកាន់ជាថ្មីពាក់ព័ន្ធការរួមភេទជាមួយមនុស្សប្រុសដូចគ្នាទៀត ពេលលោក ណាជីប ធ្វើជានាយករដ្ឋមន្ត្រី។ លោក អាន់វ៉ា ហៅការចាប់ខ្លួនលោកថាជារឿងនយោបាយសុទ្ធសាធ៕
Tag:
មហាធៀ មហាម៉ាត់
អាន់វ៉ា អ៊ីប្រាហ៊ីម
ម៉ាឡេស៊ី
© រក្សាសិទ្ធិដោយ thmeythmey.com
