លោក ហង់ ជួនណារ៉ុន ព្រមានដកគ្រូបង្វឹក និងកីឡាករ ដែលមិនគោរពវិន័យ

កីឡាជាតិ

ជាតិ

លោក ហង់ ជួនណារ៉ុន ព្រមានដកគ្រូបង្វឹក និងកីឡាករ ដែលមិនគោរពវិន័យ

11, May 2018 , 9:59 pm

រូបភាព

លោក ហង់ ជួនណារ៉ុន (កណ្តាល)ថ្លែងក្នុងកិច្ចប្រជុំត្រៀមលក្ខណៈមុនចូលរួមព្រឹត្តិការណ៍កីឡាអាស៊ីនៅឥណ្ឌូណេស៊ី, រូបភាពហ្វេសប៊ុកអគ្គនាយដ្ឋានកីឡា

ដោយ:

លោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ព្រមានដកគ្រូបង្វឹក និងកីឡាករ ដែលមិនគោរពវិន័យហ្វឹកហាត់ចេញពីក្របខណ្ឌជម្រើសជាតិ។ ការព្រមាននេះធ្វើឡើងពេល លោក ចូលរួមកិច្ចប្រជុំស្តីពីការត្រៀមលក្ខណៈចូលរួមការប្រកួតកីឡាទី្វបអាស៊ី(Asian Games) នៅប្រទេសឥណ្ឌូណេស៊ី កាលពីពេលថ្មីៗកន្លងទៅ។

គ្រូបង្វឹក គ្រូជំនួយ និងកីឡាករ អាចប្រឈមនឹងការកាត់ចេញពីក្របខណ្ឌជម្រើសជាតិ ក្នុងករណីរកឃើញថា ពួកគេមិនគោរពតាមផែនការហ្វឹកហាត់ ដែលដាក់ចេញដោយក្រសួងអប់រំ យុវជន និងកីឡា។ នេះជាការព្រមានរបស់ លោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ហើយលោកជំរុញឲ្យមជ្ឈមណ្ឌលហ្វឹកហ្វឺនកីឡា និងនាយកដ្ឋានកីឡាដែលជាសេនាធិការតាមដាននិងត្រួតពិនិត្យឲ្យម៉ត់ចត់។

«គេមិនដែលទុកគ្រូបង្វឹក កីឡាករ-កីឡាការិនីជម្រើសជាតិគ្មានសីលធម៌ មិនគោរពថ្នាក់ដឹកនាំ ដែលមកហ្វឹកលំៗយកតែប្រាក់ខែ មិនខ្វល់ពីកេរ្តិ៍ឈ្មោះប្រទេសជាតិនោះទេ។ យើងត្រូវការកីឡាករចេះស្រឡាញ់ខ្លួនឯង និងប្រទេសជាតិ ពិសេសយកចិត្តទុកដាក់ហ្វឹកហាត់ពង្រឹងសមត្ថភាព ដើម្បីដណ្តើមមេដាយមាស ប្រាក់ និងសំរឹទ្ធលើឆាកអន្តរជាតិជូនជាតិមាតុភូមិ»។ នេះជាការលើកឡើងរបស់ លោក ហង់ ជួនណារ៉ុន។

លោករដ្ឋមន្ត្រីរូបនេះបានបន្ថែមថា រាល់ការបញ្ជូនកីឡាករកីឡាការិនីទៅចូលរួមប្រកួតក្នុងព្រឹត្តិការណ៍អន្តរជាតិនានា គ្រប់សហព័ន្ធទាំងអស់ត្រូវឆ្លងកាត់ការប្រកួតចម្រាញ់រកកីឡាករកីឡាការិនីឆ្នើម ក្រោមការត្រួតពិនិត្យ និងវាយតម្លៃពីមជ្ឈមណ្ឌលហ្វឹកហ្វឺនកីឡានិងអគ្គនាយកដ្ឋានកីឡា៕