កម្ពុជាគ្រោងបញ្ជូនកីឡា១២ប្រភេទ ចូលរួមប្រជែងមេដាយកីឡាអាស៊ីនៅឥណ្ឌូណេស៊ី

កីឡាជាតិ

ជាតិ

កម្ពុជាគ្រោងបញ្ជូនកីឡា១២ប្រភេទ ចូលរួមប្រជែងមេដាយកីឡាអាស៊ីនៅឥណ្ឌូណេស៊ី

12, May 2018 , 12:13 pm

រូបភាព

ដោយ:

គណៈកម្មាធិការជាតិអូឡាំពិកកម្ពុជា និងក្រសួងអប់រំ យុវជននិងកីឡាបានឯកភាពគ្នា គ្រោងបញ្ជូនកីឡាចំនួន១២ប្រភេទ ចូលរួមប្រកួតប្រជែង ក្នុងព្រឹត្តិការណ៍កីឡាទ្វីបអាស៊ី(Asian Games) នៅទីក្រុងហ្សាកាតា ប្រទេសឥណ្ឌូណេស៊ី ក្នុងខែសីហាខាងមុខ។ កម្ពុជារំពឹងថា នឹងទទួលបានលទ្ធផលល្អសម្រាប់ការចូលរួមលើកនេះ ជាពិសេសលើប្រភេទកីឡាប្រយុទ្ធ។

ក្រោយត្រួតពិនិត្យ និងវាយតម្លៃពីសក្តានុពលនៃប្រភេទកីឡានីមួយៗ គណៈកម្មាធិការជាតិអូឡាំពិកកម្ពុជា និងក្រសួងអប់រំ យុវជននិងកីឡាបានឯកភាពគ្នាបញ្ជូនកីឡាចំនួន១២ប្រភេទ ដើម្បីចូលរួមប្រជែងដណ្តើមមេដាយពីព្រឹត្តិការណ៍កីឡាទ្វីបអាស៊ី ដែលប្រព្រឹត្តទៅចាប់ពីថ្ងៃទី១៨ សីហា ដល់ថ្ងៃទី២ កញ្ញា ឆ្នាំ២០១៨ ។

«យើងបានជ្រើសរើសជំហានដំបូងក្នុងអង្គប្រជុំដែលដឹកនាំដោយឯកឧត្តម ហង់ ជួនណារ៉ុន ដោយសម្រេចយកកីឡា១២ប្រភេទ ដើម្បីចូលរួមប្រកួតប្រជែងក្នុងព្រឹត្តិការណ៍កីឡាទ្វីបអាស៊ីនៅឥណ្ឌូណេស៊ី។ តែយ៉ាងណា ចំនួននេះមិនទាន់សម្រេចជាផ្លូវការនៅឡើយទេ ដោយយើងកំពុងរង់ចាំការសម្រេចចុងក្រោយរបស់ឯកឧត្តម ថោង ខុន និងឯកឧត្តម ហង់ ជួនណារ៉ុន»។ នេះជាការបញ្ចាក់របស់លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា។

អគ្គលេខាធិការរូបនេះបានអះអាងថា ក្នុងចំណោមប្រភេទកីឡាដែលគ្រោងបញ្ជូនទាំងនេះ សុទ្ធសឹងជាប្រភេទកីឡាសក្តានុពល ។ លោកសង្ឃឹមថា កីឡាខ្លះនឹងអាចឈានទៅរកមេដាយ ហើយប្រភេទកីឡាខ្លះ នឹងមានការប្រកួតប្រជែងខ្ពស់។

ដើម្បីត្រៀមប្រជែងដណ្តើមមេដាយពីព្រឹត្តិការណ៍នេះ គណៈកម្មាធិការជាតិអូឡាំពិកកម្ពុជានិងក្រសួងអប់រំ យុវជន និងកីឡា នឹងបញ្ជូនកីឡាករ-កីឡាការិនី ទៅហ្វឹកហាត់ពង្រឹងសមត្ថភាពនៅតាមបណ្តាប្រទេសសក្តានុពលនៃប្រភេទកីឡានីមួយៗ។ លោក វ៉ាត់ ចំរើន បាននិយាយថា៖«កីឡាទាំង១២ប្រភេទយើងចម្រាញ់បានកីឡាករសក្តានុពលចំនួន៤១នាក់។ យើងនឹងត្រៀមលក្ខណៈបញ្ជូនពួកគេទៅហ្វឹកហាត់នៅក្រៅប្រទេសឲ្យបានមុនពី១ទៅ២ខែនៃការប្រកួត និងត្រៀមលក្ខណៈហ្វឹកហាត់នៅក្នុងស្រុក»។

ទោះបីមានប្រភេទកីឡាមួយចំនួន បានដឹងពីលទ្ធផលមុនក៏ដោយ តែកម្ពុជារំពឹងថា នឹងអាចទទួលបានលទ្ធផលល្អ សម្រាប់ការចូលរួមព្រឹត្តិការណ៍កីឡាអាស៊ីលើកនេះ។ លោក វ៉ាត់ ចំរើន បង្ហាញក្តីសង្ឃឹមយ៉ាងដូច្នេះថា៖«ហែលទឹកនិងអត្តពលកម្មយើងបានពីដឹងលទ្ធផលមុនរួចទៅហើយ ព្រោះវាប្រភេទកីឡា Record។ ប៉ុន្តែយើងនៅតែអាចវាយតម្លៃថា នឹងមានកីឡាមួយចំនួនអាចឈានទៅរកមេដាយ ភាគច្រើនគឺកីឡាប្រយុទ្ធ ក្នុងនោះក៏មានសូហ្វតិន្នីសផងដែរ»។

កីឡាទាំង១២ប្រភេទដែលកម្ពុជាគ្រោងបញ្ជូនទៅរួមមាន អត្តពលកម្ម ហែលទឹក ចំបាប់ កាយសម្ព័ន្ធ ទូកក្តោង គុនដាវ តេក្វាន់ដូ ការ៉ាតេដូ យូដូ សូហ្វតិន្នីស Jet Ski និង Jujutsu។ ការប្រកួតជើងឯកទ្វីបអាស៊ីដែលឥណ្ឌូណេស៊ីធ្វើជាម្ចាស់ផ្ទះនឹងប្រព្រឹត្តទៅចាប់ពីថ្ងៃទី១៨ សីហា ដល់ថ្ងៃទី២ កញ្ញា ឆ្នាំ២០១៨៕