ជាតិ
អាវុធហត្ថឃាត់ខ្លួនយុវជន៥នាក់ដែលលក់សម្ភារអាសអាភាសតាមអនឡាញ រូបពីអាវុធហត្ថរាជធានីភ្នំពេញ
× ភ្នំពេញ៖ កងរាជអាវុធហត្ថរាជធានីភ្នំពេញ បានឃាត់ខ្លួនយុវជនប្រុសស្រីចំនួន៥នាក់ បន្ទាប់ពីឃើញពួកគេផ្សព្វផ្សាយលក់ផលិតផល និងសម្ភារអាសអាភាស នៅតាមអនឡាញ។ នេះបើតាមទំព័រហ្វេសប៊ុកកងរាជអាវុធហត្ថរាជធានីភ្នំពេញ ដែលបញ្ជាក់ទៀតថា ការឃាត់ខ្លួននេះ បានធ្វើឡើងនៅក្នុងប្រតិបត្តិការចុះបង្ក្រាបទីតាំងមួយកន្លែង កាលថ្ងៃទី ១០ ខែឧសភា។
ក្នុងពេលចុះបង្ក្រាបនេះ កងរាជអាវុធហត្ថដកហូតសម្ភារអាសអាភាសជាច្រើនអវយវៈភេទសិប្បនិម្មិត វីដេអូអាសអាភាស ថ្នាំ និងប្រេងចម្រុះជាច្រើនដែលសង្ស័យជាសារធាតុជំនួយផ្លូវភេទ។ យុវជនប្រុសស្រីទាំង ៥ នាក់នេះ នឹងត្រូវបញ្ជូនទៅកាន់តុលាការ ដើម្បីអនុវត្តតាមនីតិវិធីច្បាប់។
លោក រ័ត្ន ស្រ៊ាង មេបញ្ជាកងរាជអាវុធហត្ថរាជធានីភ្នំពេញបញ្ជាក់ថា សម្ភារអាសអាភាសទាំងនេះ កំពុងធ្វើឲ្យយុវវ័យមួយចំនួនភ្លើតភ្លើន រហូតប្រព្រឹត្តខុសប្រពៃណី និងឈានដល់ការរំលោភសេពសន្ថវៈជាដើម។ លើសពីនេះ វាបានធ្វើឲ្យប៉ះពាល់វប្បធម៌ប្រពៃណីខ្មែរ និងបំពានច្បាប់។ នេះជាការបន្ថែមរបស់លោក រ័ត្ន ស្រ៊ាង៕
Tag:
សម្ភារអាសអាភាស
អនឡាញ
អាវុធហត្ថ
© រក្សាសិទ្ធិដោយ thmeythmey.com