ជាតិ
បទយកការណ៍ / បទសម្ភាសន៍
តើយុវជនស្ម័គ្រចិត្តក្នុងគម្រោងក្រមា១ពាន់ម៉ែត្រ បានរៀនសូត្រអ្វីខ្លះ ពីយុទ្ធនាការនេះ?
×![]()
ភ្នំពេញ៖ យុវជនស្ម័គ្រចិត្តជិត ៣០០នាក់ កំពុងចូលរួមយុទ្ធនាការ «បំបែកឯតទគ្គកម្មក្រមាវែងជាងគេលើពិភពលោក» នៅក្នុងបរិវេណវាលព្រះមេរុ។ ពួកគេជាអ្នកផ្ដល់ព័ត៌មាន, ចុះឈ្មោះអ្នកហាត់រៀន, អ្នកសម្របសម្រួលជាដើម។ នេះជាគម្រោងការងារស្ម័គ្រចិត្តរយៈពេលយូរមួយ ប៉ុន្តែពួកគេរីករាយនឹងគម្រោងមួយនេះ។ ពួកគេចង់ឃើញក្រមាវែងជាងគេលើពិភពលោក។
នៅច្រកចូលនៃបរិវេណព្រះមេរុ មានរោងផ្ដល់ព័ត៌មាននៅខាងឆ្វេងដៃមួយកន្លែង។ មានយុវជនស្ម័គ្រចិត្តមួយក្រុម កំពុងផ្ដល់ព័ត៌មានដល់អ្នកមកទស្សនាយុទ្ធនាការគម្រោងក្រមា១ពាន់ម៉ែត្ររបស់ក្រុមការងារ GoGo Cambodia។ កញ្ញា លឹម សុជាតា ជាយុវជនស្ម័គ្រចិត្តម្នាក់ ក្នុងចំណោមយុវជនស្ម័គ្រជាង ៣00នាក់ ដែលធ្វើការងារស្ម័គ្រចិត្តក្នុងយុទ្ធនាការក្រមា។ មានវ័យ ១៩ឆ្នាំ សុជាតាដែលមានតួនាទីជាអ្នកផ្ដល់ព័ត៌មាននៃកម្មវិធីក្រមានេះ លើកឡើងថា៖ «ការចូលរួមស្ម័គ្រចិត្តក្នុងយុទ្ធនាការនេះ គឺដើម្បីបំផុសគំនិតឲ្យពលរដ្ឋខ្មែរ ចេះសាមគ្គីគ្នាក្នុងការបង្កើតស្នាដៃអ្វីដែលថ្មី។ ពិសេសគឺត្រូវចាប់ផ្ដើមពីខ្លួនឯង ដើម្បីជាគំរូដល់អ្នកដទៃ»។
ជាយុវជស្ម័គ្រចិត្តនៃយុទ្ធនាការក្រមាអស់រយៈពេល៣ខែមកហើយ សុជាតា ត្រូវបានហ្វឹកហ្វឺនឲ្យមានភាពអត់ធ្មត់ជាងមុន និងធ្វើឲ្យនាងអាចស្វែងយល់ពីតម្លៃនៃក្រមាកាន់តែច្បាស់ផងដែរ។ យុវតីសម្បុរស្រអែមរូបនេះ បានបញ្ជាក់យ៉ាងដូច្នេះ៖ «ពេលមិនទាន់មកស្ម័គ្រចិត្តក្នុងយុទ្ធនាការនេះ ខ្ញុំគិតថាការត្បាញក្រមា មានភាពងាយស្រួល និងសាមញ្ញ។ ប៉ុន្តែនៅពេលឃើញជាក់ស្ដែង ទើបដឹងថាលំបាក ព្រោះទម្រាំចេញជាក្រមា ត្រូវឆ្លងកាត់ពីមួយដំណាក់កាលទៅមួយដំណាក់កាល»។
សុជាតា ក៏ជាមគ្គទេសក៍មួយរូបផងដែរ ដែលនាំភ្ញៀវទេសចរអន្តរជាតិ ស្វែងយល់ពីទីតាំងនេះ។ ជាគោលការណ៍ពីម៉ោង៨ព្រឹក ដល់ម៉ោង១២ថ្ងៃត្រង់ ជាវេនប្រចាំការរបស់នាង។ ប៉ុន្តែនាងមកទីនេះ ជាប្រចាំនៅពេលទំនេរពីការសិក្សា។ «វាមិនខាតពេលវេលានោះទេសម្រាប់ខ្ញុំ ដែលមកទីនេះញឹកញាប់នោះទេ។ ព្រោះវាជាផ្នែកមួយក្នុងការចូលរួមអភិវឌ្ឍប្រទេសយើង វាផ្ដើមចេញពីខ្លួនយើង ដែលជាពលរដ្ឋខ្មែរ»។ នេះជាការបញ្ជាក់របស់សុជាតា។
ងាកចេញពីទីតាំងផ្ដល់ព័ត៌មានដែលនៅច្រកចូល យើងក្រឡេកមើលនៅខាងឆ្វេងដៃវិញ នោះលោក-អ្នក នឹងឃើញរោងមួយ ដាក់ឈ្មោះថា «សាលាសម្ដែង»។ «សាលាសម្ដែង» នេះ បើកទ្វារពេញមួយសប្ដាហ៍ ពីម៉ោង ៦:៣០នាទីល្ងាច ដល់ម៉ោង ៧:៣០នាទីយប់ ដោយមានការសម្ដែងសិល្បៈជាច្រើនទម្រង់។
កញ្ញា សន សំណាង ជាយុវជនស្ម័គ្រចិត្តមួយរូប ដែលមានតួនាទីជាអ្នកសម្របសម្រួល កម្មវិធីអមនៃសាលាសម្ដែង។ យុវតីរាងតូចច្រឡឹងរូបនេះបានប្រាប់ឲ្យដឹងថា៖ «ខ្ញុំពេញចិត្តនឹងការងារនេះ ទើបខ្ញុំមកស្ម័គ្រចិត្តនៅទីនេះ។ ការស្ម័គ្រចិត្តនៅទីនេះ បានបង្រៀនខ្ញុំ នូវការធ្វើការងារជាក្រុម, ចេះបត់បែន, ការរៀបចំឯកសារ និងទំនាក់ទំនងជាមួយប្រជាពលរដ្ឋជាដើម»។
ជាយុវជនស្ម័គ្រចិត្តដូចគ្នាក៏ពិតមែន ប៉ុន្តែការធ្វើការងារ គឺខុសគ្នា។ ជារៀងរាល់ថ្ងៃ សំណាង ត្រូវរៀបចំក្រុមការងារសម្ដែង ដែលនាងបានសហការជាមួយសមាគមមួយ ដើម្បីមកសម្ដែងជូនអ្នកទស្សនានៅក្នុងសាលាសម្ដែងនេះ។ បន្ថែមលើនេះ ទោះបីនាងកាន់ផ្នែកសាលាសម្ដែងក៏ដោយ ប៉ុន្តែនាង ក៏បានស្វែងយល់ពីសារៈប្រយោជន៍នៃក្រមាផងដែរ។
ក្នុងបរិវេណនេះ មានទីតាំងច្រើនផ្សេងៗគ្នា ដោយទីតាំងសាលាតម្បាញ នៅឆ្ងាយពីទីតាំងសាលាសម្ដែង និងទីតាំងផ្ដល់ព័ត៌មាន។ កញ្ញា ម៉េង ប៉េងស៊ីសៀង ជាយុវជនស្ម័គ្រចិត្តក្នុងទីតាំងសាលាតម្បាញ។ នាងមានតួនាទីជាអ្នកផ្ដល់លេខរៀងដល់អ្នកចូលរួមត្បាញក្រមា ១ពាន់ម៉ែត្រ។ ប៉េងស៊ីសៀង និយាយថា៖ «ខ្ញុំមកស្ម័គ្រចិត្តនៅទីនេះ ព្រោះខ្ញុំចាប់អារម្មណ៍យុទ្ធនាការនេះ ដែលនិយាយពីក្រមា។ ពិសេស ចូលរួមលើកស្ទួយក្រមាខ្មែរផង»។
ទីតាំងសាលាតម្បាញ ជាទីតាំងចុងក្រោយគេ ដែលអ្នកចូលរួមត្រូវមកត្បាញក្នុងកី១ពាន់ម៉ែត្រ។ យុវតីដែលជាកូនអ្នកខេត្តបន្ទាយមានជ័យរូបនេះ បន្ថែមថា ការស្ម័គ្រចិត្តធ្វើការងារនៅទីនេះ បានធ្វើឲ្យនាងដឹងច្រើនពីក្រមា ព្រោះនាងនៅជិតអ្នកមីងៗ ដែលមានឯកទេសត្បាញក្រមា។ នាងបានជួយការងាររបស់ពួកគាត់ និងស្គាល់ពីសម្ភារផ្សេងៗដើម្បីផលិតបានជាក្រមាផងដែរ។
ទាំងសុជាតា, សំណាង និងប៉េងស៊ីសៀង ពិតជាសប្បាយរីករាយជាមួយការងារស្ម័គ្រចិត្តនេះណាស់។ ពួកគេយល់ថា ការងារស្ម័គ្រចិត្ត អាចជួយកាត់បន្ថយភាពតានតឹងពីការសិក្សាបាន ហើយការស្ម័គ្រចិត្តនៅទីនេះ បានជួបមនុស្សថ្មីៗ ដែលជាការរៀនសូត្រមួយបែបផងដែរ។ ការស្ម័គ្រចិត្តរបស់ពួកគេ មិនមែនល្អឥតខ្ចោះនោះទេ។ មានពេលខ្លះ ក៏មានការស្ដីបន្ទោសពីក្រុមការងារផងដែរ ប៉ុន្តែពួកគេយល់ថា វាជាការណែនាំឲ្យពួកគេធ្វើការងារដោយភាពច្បាស់លាស់ប៉ុណ្ណោះ។
គួរបញ្ជាក់ថា យុទ្ធនាការ «បំបែកឯតទគ្គកម្មក្រមាវែងជាងគេលើពិភពលោក» ធ្វើឡើងដើម្បីលើកកម្ពស់មោទកភាពជាតិ តាមរយៈស្នាដៃមួយ ដែលនឹងមានការទទួលស្គាល់ជាអន្តរជាតិ និងការបង្កបរិយាកាសចូលរួមចំណែកពីប្រជាពលរដ្ឋ ដើម្បីរួមគ្នាថែរក្សា និងលើកស្ទួយ មរតកវប្បធម៌ខ្មែរ៕
Tag:
ស្ម័គ្រចិត្ត
យុវជន
ក្រមា
© រក្សាសិទ្ធិដោយ thmeythmey.com
