ជប៉ុន នៅតែទទូចឲ្យកម្ពុជា រៀបចំការបោះឆ្នោត ដែលឆ្លុះបញ្ចាំងពីឆន្ទៈពលរដ្ឋ

ជាតិ

នយោបាយជាតិ

ជប៉ុន នៅតែទទូចឲ្យកម្ពុជា រៀបចំការបោះឆ្នោត ដែលឆ្លុះបញ្ចាំងពីឆន្ទៈពលរដ្ឋ

14, May 2018 , 3:41 pm

រូបភាព

សម្តេច ហ៊ុន សែន ប្រធានគណបក្សប្រជាជនកម្ពុជា ទៅបោះឆ្នោតជ្រើសតាំងសមាជិកព្រឹទ្ធសភា កាលពីថ្ងៃទី២៥ ខែកុម្ភៈ ឆ្នាំ២០១៨។ រូបពីទំព័រហ្វេសបុកសម្តេច ហ៊ុន សែន

ដោយ: ថ្មីៗ

ខុសពីបណ្តាប្រទេសមួយចំនួន ជប៉ុន នៅតែបង្ហាញការគាំទ្រចំពោះដំណើរការបោះឆ្នោតនៅកម្ពុជា។ ប៉ុន្តែប្រទេស ដែលឧស្សាហ៍ផ្តល់ជំនួយឲ្យកម្ពុជាមួយនេះ ឆ្លៀតរំលេចពីបំណងរបស់ខ្លួន ដោយចង់ឲ្យការបោះឆ្នោតនោះ ឆ្លុះបញ្ចាំងពីឆន្ទៈរបស់ប្រជាពលរដ្ឋកម្ពុជា។

លោក Masato Otaka តំណាងក្រសួងការបរទេសជប៉ុន ជាអ្នកបង្ហាញពីបំណងនេះ នៅពេលលោក មកបំពេញទស្សនកិច្ចនៅកម្ពុជា ហើយបានជួបពិភាក្សាជាមួយលោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា កាលពីប៉ុន្មានថ្ងៃមុន។ សម្តីរបស់លោក Masato Otaka ដែលលើកឡើងក្នុងជំនួបជាមួយលោក កែវ រ៉េមី ត្រូវបានចុះផ្សាយដោយសារព័ត៌មានរបស់ជប៉ុនឈ្មោះ NHK។

សារព័ត៌មាននេះ បានសរសេរយ៉ាងដូច្នេះថា៖«ជប៉ុន អំពាវនាវឲ្យរដ្ឋាភិបាលកម្ពុជា រៀបចំការបោះឆ្នោតនៅពេលខាងមុខ ដោយឆ្លុះបញ្ចុះពីឆន្ទៈរបស់ប្រជាពលរដ្ឋ។ ជប៉ុន បានគាំទ្រលទ្ធិប្រជាធិបតេយ្យ នៅកម្ពុជាអស់រយៈពេលជាយូរមកហើយ»។

ការអំពាវនាវសាជាថ្មីរបស់ជប៉ុននៅពេលនេះ ស្ថិតក្នុងកាលៈទេសដែលសហគមន៍អន្តរជាតិមួយចំនួន កំពុងមើលមកការបោះឆ្នោតនៅកម្ពុជាក្នុងផ្លូវអវិជ្ជមាន។ សហគមន៍អន្តរជាតិទាំងនោះ យល់ថា ការបោះឆ្នោតនៅកម្ពុជា មិនអាចដំណើរការទៅតាមគន្លងប្រជាធិបតេយ្យ និងមិនមានភាពស្របច្បាប់ឡើយ បើគ្មានគណបក្សសង្គ្រោះជាតិ។

នៅថ្ងៃទី១៤ ខែឧសភានេះ គឺជាថ្ងៃចុងក្រោយហើយ សម្រាប់ការចុះឈ្មោះគណបក្សនៅគណៈកម្មាធិការជាតិរៀបចំការបោះឆ្នោត (គ.ជ.ប.) ដើម្បីត្រៀមចូលរួមប្រកួតប្រជែងការបោះឆ្នោត ខណៈគណបក្សសង្គ្រោះជាតិ នៅមិនទាន់រស់ឡើងវិញ។ មកដល់ពេលនេះ មានគណបក្សជាង១០ហើយ ដែលបានចុះឈ្មោះនៅគ.ជ.ប.។

អ្នកនាំពាក្យគ.ជ.ប. បញ្ជាក់ថា គណបក្សណា មិនបានចុះឈ្មោះ គឺស្មើនឹងគណបក្សនោះ មិនបានចូលរួមបោះឆ្នោត នៅថ្ងៃទី២៩ ខែកក្កដា ឆ្នាំ២០១៨៕