សេដ្ឋកិច្ចអន្តរជាតិ
អន្តរជាតិ
អាវមានផែនទីចិនដីគោក តែអត់តៃវ៉ាន់ ធ្វើឲ្យក្រុមហ៊ុនផលិតអាវអាមេរិកសុំទោសចិនយ៉ាងប្រញាប់ អាវយឺតរបស់ក្រុមហ៊ុន GAP ដែលគ្មានផែនទីកោះតៃវ៉ាន់ (រូបភាព The Guardian)
× នៅថ្ងៃទី១៤ ខែឧសភា ក្រុមហ៊ុនផលិតអាវអាមេរិក GAP បានសុំទោសរដ្ឋាភិបាលក្រុងប៉េកាំងយ៉ាងប្រញាប់ បន្ទាប់ពីអាវរបស់ខ្លួនមិនបានបញ្ចូលកោះតៃវ៉ាន់ជាផ្នែកមួយនៃផែនទីចិន។ ក្រុមហ៊ុន GAP បានប្រមូលអាវទាំងនោះយកទៅកម្ទេចចោល និងសន្យាមិនឲ្យមានបញ្ហាបែបនេះកើតឡើងទៀតឡើយ។ កំហុសរបស់ក្រុមហ៊ុនអាមេរិក កើតឡើងចំពេលដែលចិនកំពុងទាមទារឲ្យក្រុមហ៊ុនបរទេសនានាគោរពអធិបតេយ្យរបស់ខ្លួន ជាពិសេសបញ្ហាកោះតៃវ៉ាន់ផ្ទាល់។
ក្នុងរូបភាពដែលបង្ហោះ Twitter របស់កាសែតចិន People’s Daily អាវរបស់ក្រុមហ៊ុនអាមេរិក GAP មានតែរូបផែនទីចិនដីគោកប៉ុណ្ណោះ និងមិនមានរូបកោះតៃវ៉ាន់នៅភាគអាគ្នេយ៍ឡើយ។ អាវដែលគ្មានផែនទីកោះតៃវ៉ាន់នេះ ត្រូវបានដាក់លក់លើគេហទំព័ររបស់ក្រុមហ៊ុនមួយនេះនៅទីផ្សារកាណាដា មិនមែននៅចិនឡើយ ប៉ុន្តែបង្កការមិនពេញចិត្តខ្លាំងក្នុងចំណោមជនជាតិចិន។ គណនី Weibo របស់ក្រុមហ៊ុន GAP ក្លាយជាគោលដៅនៃការតវ៉ារបស់អ្នកប្រើប្រាស់ជនជាតិចិនជាច្រើន។
បើតាមសារព័ត៌មានរដ្ឋចិន Global Times អាវដដែលនេះក៏មិនបានបញ្ចូលតំបន់ទីបេខាងត្បូង និងសមុទ្រចិនខាងត្បូងដែរ។ ជាមួយនឹងការមិនសប្បាយចិត្តរបស់ប្រជាជនចិន ក្រុមហ៊ុនអាវ GAP ក៏បានចេញមុខសុំទោសនៅក្នុងបណ្ដាញសង្គម Weibo ចំពោះកំហុសអចេតនានេះ និងអះអាងថា ខ្លួនគោរពបូរណភាពទឹកដី និងអធិបតេយ្យរបស់ចិន។ ក្រុមហ៊ុនក៏ត្រួតពិនិត្យផ្ទៃក្នុងដើម្បីកែកំហុសនេះឲ្យកាន់តែឆាប់ ព្រមទាំងប្រមូលអាវពីទីផ្សារដើម្បីកម្ទេចទៀតផង។
អ្នកនាំពាក្យក្រសួងការបរទេសចិន Lu Kang បានកត់សម្គាល់ពីការសុំទោសរបស់ក្រុមហ៊ុន GAP តែមិនបានបញ្ជាក់ថា រដ្ឋាភិបាលចិនបានតវ៉ានឹងកំហុសរបស់ក្រុមហ៊ុននេះឬអត់ឡើយ។ យ៉ាងណាមិញ អ្នកនាំពាក្យរូបនេះបានលើកឡើងថា រដ្ឋាភិបាលនឹងយកចិត្តទុកលើបញ្ហានេះឲ្យបានជិតដិត។ នេះបើតាមការផ្សាយរបស់ទីភ្នាក់ងារព័ត៌មាន AFP ។
បញ្ហាកោះតៃវ៉ាន់នេះ គឺជារឿងរសើបសម្រាប់ចិន ដែលចាត់ទុកកោះមួយនេះជាអាណាខេត្តមិនអាចកាត់ផ្ដាច់បានរបស់ខ្លួន។ មិនថាប្រទេស ឬក្រុមហ៊ុនឯកជនអ្វីឡើយ ចិនតែងទាមទារឲ្យមានការគោរពកម្មសិទ្ធិលើតៃវ៉ាន់ដាច់ខាត។ ក្រុមហ៊ុនសណ្ឋាគារអាមេរិក Marriott ក្រុមហ៊ុនផលិតអាវអេស្ប៉ាញ Zara និងក្រុមហ៊ុនអាកាសចរណ៍មួយចំនួនបានស្គាល់រសជាតិកំហឹងរបស់ចិនរួចហើយជុំវិញការមិនបញ្ចូលតៃវ៉ាន់ជាផ្នែករបស់ចិនក្នុងគេហទំព័ររបស់ពួកគេ។
អំឡុងខែមេសា ក្រុងប៉េកាំងបានផ្ញើលិខិតសម្គាល់មួយទៅឲ្យក្រុមហ៊ុនអាកាសចរណ៍៣៥ ដោយមានទាំងអាកាសចរណ៍អាមេរិកខ្លះផង ដោយទទូចឲ្យពួកគេទទួលស្គាល់នយោបាយចិនតែមួយ។ អាមេរិកមិនសប្បាយចិត្តនឹងការទាមទាររបស់ចិន និងចាត់ទុកជាទាមទារមិនល្អ។ កាលពីខែមករា ក្រុមហ៊ុនអាកាសចរណ៍អូស្ត្រាលី Qantas បានប្ដូរឋានៈរបស់ហុងកុង និងតៃវ៉ាន់ ពីទឹកដីដាច់ដោយឡែក ទៅជាផ្នែកមួយរបស់ចិនវិញដែរ៕
© រក្សាសិទ្ធិដោយ thmeythmey.com