កីឡាជាតិ
ជាតិ
ព្រះមហាក្សត្រ នឹងប្រទានភ្លើងគប់បើកកីឡាជាតិលើកទី២ឆ្នាំនេះ
× ព្រះមហាក្សត្រ ព្រះករុណា ព្រះបាទសម្តេចព្រះបរមនាថ នរោត្តម សីហមុនី នឹងប្រទានភ្លើងគប់ដល់កីឡាករ ដើម្បីដង្ហែមកដុតបំភ្លឺគប់នៅពហុកីឡដ្ឋានជាតិ ដែលជាទីតាំងប្រារព្ធពិធីបើកកីឡាជាតិលើកទី២ នាថ្ងៃទី២៥ ឧសភា។ នេះបើយោងតាមលិខិតរបស់ក្រសួងព្រះបរមរាជវាំងចុះថ្ងៃទី១០ ឧសភា ឆ្នាំ២០១៨។
ព្រះករុណា ព្រះបាទសម្តេច ព្រះបរមនាថ នរោត្តម សីហមុនី បានសព្វព្រះរាជហឫទ័យប្រទានភ្លើងគប់ដល់កីឡាករ ដើម្បីដង្ហែមកដុតបំភ្លឺគប់បើកកីឡាជាតិលើកទី២ តបតាមការស្នើរបស់សម្តេច ហ៊ុន សែន នាយករដ្ឋមន្ត្រីកម្ពុជា។ ពិធីបើកកីឡាជាតិឆ្នាំនេះរៀបចំនៅពហុកីឡដ្ឋានជាតិ នាថ្ងៃទី២៥ ឧសភា ឆ្នាំ២០១៨ ក្រោមវត្តមានសម្តេចនាយករដ្ឋមន្ត្រី ហ៊ុន សែន និងសម្តេច ប៊ុនរ៉ានី ហ៊ុនសែន។
លិខិតដែលប្រថាប់ត្រាដោយសម្តេចចៅហ្វាវាំង គង់ សំអុល ឧបនាយករដ្ឋមន្ត្រី និងជារដ្ឋមន្ត្រីក្រសួងព្រះបរមរាជវាំងបានរៀបរាប់យ៉ាងដូច្នេះថា៖«ខ្ញុំបាទមានកិត្តិយស សូមគោរពជូនសម្តេចនាយករដ្ឋមន្ត្រី ហ៊ុន សែន ឲ្យបានជ្រាបថា ព្រះករុណាជាអម្ចាស់លើត្បូង ព្រះមហាក្សត្រនៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គសព្វព្រះរាជហឫទ័យនឹងព្រះរាជទានភ្លើងគប់នៅកើយខាងមុខព្រះទីនាំងទេវាវិន្និច្ឆ័យព្រះបរមរាជវាំងដល់កីឡាករ ដើម្បីដង្ហែយកទៅដុតបំភ្លឺគប់នៅពហុកីឡដ្ឋានជាតិ ដែលជាទីតាំងប្រារព្ធពិធីបើកកីឡាជាតិលើកទី២»។
សម្តេចនាយករដ្ឋមន្ត្រី ហ៊ុន សែន កាលពីថ្ងៃទី៧ ឧសភា កន្លងទៅ បានថ្វាយសំណើរទៅព្រះមហាក្សត្រ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ដើម្បីសុំឲ្យព្រះអង្គ ព្រះរាជប្រទានភ្លើងគប់ដល់កីឡាករ ដើម្បីដង្ហែយកទៅដុតបំភ្លឺគប់នៅពហុកីឡដ្ឋានជាតិ ជាកន្លែងប្រារព្ធពិធីបើកកីឡាជាតិលើកទី២។
ក្នុងលិខិតនោះដែរ ប្រមុខរដ្ឋាភិបាលកម្ពុជា បានទូលថ្វាយព្រះករុណា ព្រះមហាក្សត្រ ទាក់ទងនឹងការរៀបចំការប្រកួតកីឡាជាតិលើកទី២ ដែលប្រព្រឹត្តទៅចាប់ពីថ្ងៃទី២៥ ឧសភា ដល់ថ្ងៃទី៦ មិថុនា ឆ្នាំ២០១៨ ធ្វើឡើងក្រោមប្រធានបទ«កីឡាដើម្បីសន្តិភាពនិងការអភិវឌ្ឍ»។
ព្រឹត្តិការណ៍កីឡាជាតិនេះ ធ្វើឡើងដើម្បីពង្រឹងសមត្ថភាពមន្ត្រីរៀបចំការប្រកួត និងមន្ត្រីអាជ្ញាកណ្តាលចៅក្រម ដែលបានបណ្តុះបណ្តាលរួច ដើម្បីទទួលបានចំណេះដឹង និងបទពិសោធក្នុងការរៀបចំព្រឹត្តិការណកីឡាមានលក្ខណៈជាហ្គេម ក៏ដូចជាវាស់ស្ទង់សមត្ថភាពកីឡាករកីឡាការិនីតាមប្រភេទកីឡានីមួយៗ មុនឈានទៅធ្វើជាម្ចាស់ផ្ទះកីឡាស៊ីហ្គេមលើកទី៣២ នាឆ្នាំ២០២៣៕
Tag:
ព្រះមហាក្សត្រ នរោត្តម សីហមុនី
កីឡាជាតិលើកទី២
© រក្សាសិទ្ធិដោយ thmeythmey.com