ជាតិ
អត្ថបទពាណិជ្ជកម្ម
និស្សិត AUPP ទទួលសញ្ញាបត្រពីសាកលវិទ្យាល័យដៃគូនៅសហរដ្ឋអាមេរិក ជាលើកដំបូង
×
សាកលវិទ្យាល័យអាមេរិកាំងភ្នំពេញ (AUPP) បានរៀបចំពិធីប្រគល់សញ្ញាបត្រ មកពីសហរដ្ឋអាមេរិក ដល់និសិត្សជ័យលាភីរបស់ខ្លួន ជាលើកដំបូង។ សញ្ញាបត្រមកពីសហរដ្ឋអាមេរិកនេះ ជាសញ្ញាបត្របន្ថែម លើសញ្ញាបត្ររបស់ AUPP ដែលបានប្រគល់ដល់និស្សិតដែលបានបញ្ចប់ការសិក្សា។ ឯកឧត្តមបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានអញ្ជើញជាអធិបតីដ៏ខ្ពង់ខ្ពស់ នៅក្នុងពិធីប្រគល់សញ្ញាបត្រដល់និសិត្សជ័យលាភីជំនាន់ទី២នេះ ដែលរៀបចំធ្វើនៅក្នុងសាកលវិទ្យាល័យ AUPP ដែលទើបសង់រួចលើផ្ទៃដី៧ហិកតា កាលពីថ្ងៃទី១៨ ខែឧសភានេះ។
តាមរយៈកិច្ចសហប្រតិបត្តិការអប់រំ រវាងសាកលវិទ្យាល័យអាមេរិកាំងភ្នំពេញ (AUPP) ជាមួយ សាកលវិទ្យាល័យធំៗពីររបស់អាមេរិក គឺសាកលវិទ្យាល័យអារីហ្សូណា (The University of Arizona-UA) និងសាកលវិទ្យាល័យរដ្ឋហ្វតហេស៍ (Fort Hays State University-FHSU) បានបង្កើតកម្មវិធីសិក្សាដ៏ពិសេស សម្រាប់និស្សិត ឲ្យទទួលបានសញ្ញាបត្រពីរ (Dual Degree Program)។ នេះ គឺជាឱកាសល្អសម្រាប់និស្សិតខ្មែរទាំងអស់ ដោយមិនចាំបាច់ត្រូវទៅសិក្សានៅសហរដ្ឋអាមេរិកឡើយ ហើយក៏មិនចាំបាច់ចំណាយថវិកាដ៏សន្ធឹកសន្ធាប់ទៀតនោះដែរ។
គួររំលឹកផងដែរថា ក្នុងចំណោមនិស្សិតជ័យលាភីទាំងអស់ និស្សិតជ័យលាភីភាគច្រើន នឹងបន្តការសិក្សាថ្នាក់បរិញ្ញាបត្រជាន់ខ្ពស់ និងបណ្ឌិត ហើយភាគច្រើនពួកគេទទួលបានអាហារូបករណ៍ពីសាកលវិទ្យាល័យ។ និស្សិតជ័យលាភីប្រមាណ ២៥ ភាគរយ នឹងប្រកបរបរអាជីវកម្មផ្ទាល់ខ្លួន ខណៈនិស្សិតជ័យលាភីផ្សេងទៀត បានទទួលឱកាសការងារ តាមជំនាញវិជ្ជាជីវៈ រៀងៗខ្លួន។
ឯកឧត្តមបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានមានប្រសាសន៍ក្នុងពិធីប្រគល់សញ្ញាបត្រនេះ ដូច្នេះថា៖«សាកលវិទ្យាល័យ AUPP បានចូលរួមចំណែកយ៉ាងសកម្ម ក្នុងការអភិវឌ្ឍវិស័យអប់រំ និងធនធានមនុស្សនៅកម្ពុជា តាមរយៈការផ្តល់ការអប់រំប្រកបដោយគុណភាពខ្ពស់ និងឱកាសសម្រាប់និស្សិត ក្នុងការទទួលបានសញ្ញាបត្រមកពីសាកលវិទ្យាល័យអាមេរិក»។ ឯកឧត្តម ហង់ ជួន ណារ៉ុន បានបន្តដោយសង្ឃឹមជឿជាក់ថ សាកលវិទ្យាល័យ AUPP នឹងក្លាយជាសាកលវិទ្យាល័យគំរូ សម្រាប់គ្រឹះស្ថានឧត្តមសិក្សាផ្សេងៗនៅកម្ពុជា និងក្នុងតំបន់។
លោកសាស្ត្រាចារ្យបណ្ឌិត Kenneth Dunn សាកលវិទ្យាធិការ AUPP ក៏បានចូលរួមអបអរសាទរ និងកោតសរសើរ ដល់និស្សិតជ័យលាភីទាំងអស់ ដែលទទួលបានជោគជ័យ ក្នុងការសិក្សានេះដែរ បន្ទាប់ពីបានខិតខំប្រឹងប្រែងរៀនសូត្រអស់រយៈពេលបួនឆ្នាំកន្លងមកនោះ។ ជាពិសេសនោះ គឺពួកគេទទួលបានសញ្ញាបត្រពី AUPP និងពីសាកលវិទ្យាល័យដៃគូ របស់AUPP ៕
© រក្សាសិទ្ធិដោយ thmeythmey.com