កីឡាជាតិ
ជាតិ
កម្ពុជាជាប្រទេសគំរូ ដែលប្រធានប៉ារ៉ាឡាំពិកអាស៊ីហៅទៅចែករំលែកពីការអភិវឌ្ឍន៍កីឡាជនពិការ
×![]()
គណៈកម្មាធិការជាតិប៉ារ៉ាឡាំពិកកម្ពុជា ត្រូវបានប្រធានប៉ារ៉ាឡាំពិកអាស៊ី ជ្រើសរើសដើម្បីធ្វើបទបង្ហាញពីការអភិវឌ្ឍវិស័យកីឡាជនពិការដល់បណ្តាប្រទេសក្នុងទ្វីបអាស៊ី។ ការសម្រេចនេះ ធ្វើឡើងបន្ទាប់ពីប្រធានប៉ារ៉ាឡាំពិកអាស៊ីចាត់ទុកកម្ពុជាជាប្រទេសគំរូក្នុងក្របខណ្ឌប្រទេសកំពុងអភិវឌ្ឍន៍ ដែលយកចិត្តទុកដាក់ខ្លាំងជាងគេក្នុងការអភិវឌ្ឍកីឡាជនពិការ។ បទបង្ហាញនេះ គ្រោងឡើងក្នុងអំឡុងពេលកម្ពុជាចូលរួម Asian Para Games នៅប្រទេសឥណ្ឌូណេស៊ី នាពេលដ៏ខ្លីខាងមុខនេះ។
លោក យី វាសនា អគ្គលេខាធិការនៃគណៈកម្មាធិការជាតិប៉ារ៉ាឡាំពិកកម្ពុជាបានបញ្ជាក់ថា កម្ពុជាត្រូវប្រធានគណៈកម្មាធិការប៉ារ៉ាឡាំពិកអាស៊ី ជ្រើសរើសដើម្បីចែករំលែកបទពិសោធពីការអភិវឌ្ឍវិស័យកីឡាជនពិការនៅកម្ពុជាដល់ប្រទេសក្នុងតំបន់អាស៊ី។ ការផ្តល់សិទ្ធិដល់កម្ពុជានេះ ធ្វើឡើងបន្ទាប់ពីលោក Majid Abdullah Murshed Rashed ប្រធានគណៈកម្មាធិការប៉ារ៉ាឡាំពិកអាស៊ីមកបំពេញទស្សនកិច្ចនៅកម្ពុជាកាលពីថ្ងៃទី១៣-១៥ ឧសភា កន្លងទៅ។
ថ្លែងក្រោយកិច្ចប្រជុំជាមួយប្រធានប៉ារ៉ាឡាំពិកអាស៊ី លោក យី វាសនា បាននិយាយយ៉ាងដូច្នេះថា៖«លោក Majid ថា កម្ពុជាជាប្រទេសមួយដែលរួចផុតពីសង្គ្រាម មានសន្តិភាព និងបានធ្វើដំណើរក្នុងលក្ខខណ្ឌមួយដ៏ល្អប្រសើរ ហើយលោកបានចាត់ទុកកម្ពុជាជាគំរូ។ ដូច្នេះគាត់បានអញ្ជើញខ្ញុំ ឲ្យទៅធ្វើបទបង្ហាញពីការវិវត្តពីកម្រិតខ្សោយដល់កម្រិតខ្លាំងដូចរាល់ថ្ងៃរបស់កម្ពុជា ជូនដល់បណ្តាប្រទេសក្នុងទ្វីបអាស៊ីបានដឹង»។
អគ្គលេខាធិការរូបនេះ បានចាត់ទុកការសម្រេចរបស់ប្រធានប៉ារ៉ាឡាំពិកអាស៊ីជាកិត្តិយស និងជាឱកាសដ៏ល្អសម្រាប់កម្ពុជា ក្នុងការរៀបរាប់ពីស្ថានភាពលំបាកដែលបានជួបប្រទះនាអតីតកាល និងបច្ចុប្បន្នក្នុងការស្វែងរកការគាំទ្រ និងជួយឧបត្ថម្ភពីស្ថាប័នអន្តរជាតិផងដែរ។
លោក Majid Abdullah Murshed Rashed ប្រធានគណៈកម្មាធិការប៉ារ៉ាឡាំពិកអាស៊ីបានអះអាងថា ការណ៍ដែលលោកសម្រេចជ្រើសរើសកម្ពុជា ដោយសារកម្ពុជាជាប្រទេសកំពុងអភិវឌ្ឍន៍មានការខិតខំប្រឹងប្រែងខ្លាំងលើការអភិវឌ្ឍវិស័យកីឡាជនពិការបើធៀបនឹងបណ្តាប្រទេសកំពុងអភិវឌ្ឍន៍ផ្សេងទៀតក្នុងទ្វីបអាស៊ី។ ម្យ៉ាងទៀត លោកបានចាត់ទុកកម្ពុជាថា ជាប្រទេសគំរូ ដែលអាចឲ្យបណ្តាប្រទេសក្នុងតំបន់អាស៊ីយកតម្រាប់តាម។
«កម្ពុជាជាប្រទេសធ្វើការងារពិតប្រាកដ មានឆន្ទៈខិតខំប្រឹងប្រែងធ្វើការ មិនដូចបណ្តាប្រទេសមួយចំនួនដេកមិនធ្វើការ ហើយនយាយថា ខ្លួនជាប្រទេសកំពុងអភិវឌ្ឍន៍ គ្មានធនធានគ្រប់គ្រាន់ នេះជាកំហុសមួយដ៏ធ្ងន់ធ្ងរ។ ខុសពីកម្ពុជា ទោះបីមានការជួយជ្រោមជ្រែងតិចតួចពីរាជរដ្ឋាភិបាលកម្ពុជា នៅតែខិតខំពុះពារជម្នះរាល់ឧបសគ្គក្នុងការធ្វើការងារ នេះជាគំរូដែលប្រទេសដទៃគួរយកតម្រាប់តាម»។ នេះជាការលើកឡើងរបស់លោក Majid Abdullah Murshed Rashed។
ពាក់ព័ន្ធនឹងកាលបរិច្ឆេទនៃការធ្វើបទបង្ហាញនេះ មិនទានបញ្ជាក់ជាផ្លូវការនៅឡើយទេ។ តែបើតាមគម្រោងគ្រោងធ្វើឡើងក្នុងកិច្ចប្រជុំនៅប្រទេសឥណ្ឌូណេស៊ី ក្នុងអំឡុងពេលចូលរួមប្រកួតកីឡាប៉ារ៉ាឡាំពិកអាស៊ី(Asian Para Games)៕
Tag:
យី វាសនា
ប៉ារ៉ាឡាំពិក
© រក្សាសិទ្ធិដោយ thmeythmey.com
