ម៉ាឌូរ៉ូ ប្រកាសឈ្នះឆ្នោតទៀត ខណៈបក្សប្រឆាំងធ្វើពហិកា ហើយអ្នកបោះឆ្នោតមានត្រឹមជាង ៤០ភាគរយ

អន្តរជាតិ

ម៉ាឌូរ៉ូ ប្រកាសឈ្នះឆ្នោតទៀត ខណៈបក្សប្រឆាំងធ្វើពហិកា ហើយអ្នកបោះឆ្នោតមានត្រឹមជាង ៤០ភាគរយ

21, May 2018 , 3:49 pm

រូបភាព

ដោយ: ថ្មីៗ

ប្រធានាធិបតីវេណេស៊ុយអេឡាលោក នីកូឡាស ម៉ាឌូរ៉ូ បានប្រកាសជ័យជម្នះជាថ្មីក្នុងការបោះឆ្នោតប្រធានាធិបតីកាលពីថ្ងៃអាទិត្យទី ២០ ខែឧសភា។ គណបក្សប្រឆាំងបានប្រកាសបដិសេធលទ្ធផលបោះឆ្នោត ដោយលើកឡើងពីភាគរយនៃអ្នកទៅបោះឆ្នោតទាបបំផុត ភាពមិនប្រក្រតី និងការទិញសន្លឹកឆ្នោតដែលកើតឡើងក្នុងពេលបោះឆ្នោតនេះ។

អតីតអ្នកបើកឡានវ័យ ៥៥ឆ្នាំ និងជាអ្នកស្នងតំណែងលោក ហ៊ូហ្គោ ឆាវេស លោក នីកូឡាស ម៉ាឌូរ៉ូ ទទួលជ័យជម្នះក្នុងការបោះឆ្នោតប្រធាធិបតីជាថ្មី ហើយលោកនឹងបន្តកាន់អំណាចក្នុងអាណត្តិប្រាំមួយឆ្នាំទៀតដែរ។ លោកប្រាប់អ្នកគាំទ្រនៅរដ្ឋធានីការ៉ាកាសថា បក្សប្រឆាំងមើលស្រាលលោក ដោយគេមិនគិតថា លោកឈ្នះឆ្នោតជាថ្មីឡើយ។

បើតាមទីភ្នាក់ងារព័ត៌មាន Reuters គណៈកម្មការរៀបចំការបោះឆ្នោតវេណេស៊ុយអេឡា បានប្រកាសថា លោក ម៉ាឌូរ៉ូ ទទួលបានសំឡេងគាំទ្ររហូតដល់ ៥,៨ លានសំឡេង ខណៈដែលបេក្ខជនជាគូប្រជែងលោក Henri Falcon នោះបានត្រឹម ១,៨ លានសំឡេងប៉ុណ្ណោះ។ ជាអតីតអភិបាលក្រុង លោក Falcon សុខចិត្តចូលប្រកួតដោយដើរផ្លូវផ្សេងពីបក្សប្រឆាំងដែលនាំគ្នាធ្វើពហិកាចូលរួមនោះ។

បើតាមការឲ្យដឹងពីសំណាក់គណៈកម្មការបោះឆ្នោត អ្នកទៅបោះឆ្នោតសរុបមានត្រឹម ៤៦,១ ភាគរយប៉ុណ្ណោះ ដែលវាខុសឆ្ងាយពីឆ្នាំ ២០១៣ ដែលមានអ្នកទៅចុះឈ្មោះសរុបដល់ទៅ ៨០ភាគរយឯណោះ។ យ៉ាងណាមិញខាងបក្សប្រឆាំងបានអះអាងថា ចំនួននេះត្រូវគេបំប៉ោងប៉ុណ្ណោះ ហើយអ្នកទៅបោះឆ្នោតពិតប្រាកដមានប្រហែលជិត ៣០ភាគរយប៉ុណ្ណោះ។

លោក ម៉ាឌូរ៉ូ បានស្វាគមន៍ការចូលរួមរបស់លោក Falcon ក្នុងការប្រជែងតំណែងនេះព្រោះវាបានផ្តល់ភាពស្របច្បាប់ខ្លះដល់ការបោះឆ្នោត និងការរើសមេដឹកនាំរដ្ឋាភិបាលថ្មីដែលគេកំពុងថ្កោលទោសទាំងក្នុងនិងក្រៅប្រទេសនោះ។

ពាក់ព័ន្ធនឹងការបោះឆ្នោតនេះ លោក Falcon បានប្រកាសបដិសេធលទ្ធផលបោះឆ្នោតដែរ ដោយលោកបកស្រាយថា ដំណើរការបោះឆ្នោតខ្វះភាពស្របច្បាប់ សម្បូរភាពមិនប្រក្រតី និងការទិញសន្លឹកឆ្នោតជាដើម។

អ្នកនយោបាយរូបនេះបានលើកឡើងផងដែរថានៅថ្ងៃបោះឆ្នោតរដ្ឋាភិបាលលោក ម៉ាឌូរ៉ូ បានប្រើប្រាស់លុយទិញសន្លឹកឆ្នោត ដោយពង្រាយក្រុមអ្នកគាំទ្រខ្លួន ១៣០០០នាក់ទៅជិតមណ្ឌលបោះឆ្នោតទូទាំងប្រទេស។ ក្រុមនោះបានបញ្ចុះបញ្ចូលឲ្យប្រជាជនក្រីក្រឲ្យបោះឆ្នោតគាំទ្រលោក ម៉ូឌូរ៉ូ ជាថ្នូរនឹងការទទួលបានប្រយោជន៍មួយចំនួន។ ពួកគេតម្រូវឲ្យប្រជាជនស្កែនកាតមានឈ្មោះថា Fatherlandដែលរដ្ឋាភិបាលចេញឲ្យ ក្រោយពេលបោះឆ្នោត ហើយប្រជាជនទាំងនោះនឹងទទួលបានកាដូរពីរដ្ឋាភិបាលលោក ម៉ាឌូរ៉ូ ក្នុងនោះមានកញ្ចប់ចំណីអាហារ និងលុយផងដែរ។

តាមពិតទៅក្រៅពីប្រើប្រាស់លុយទិញសំឡេងឆ្នោត លោក ម៉ាឌូរ៉ូ ទទួលបានសំឡេងឆ្នោតច្រើនដោយសារបក្សប្រឆាំងពហិកាចូលរួមប្រកួត ហើយមួយទៀតគឺការហាមបេក្ខជនដែលមានប្រជាប្រិយភាពខ្ពស់ចូលរួមក្នុងការប្រជែងតំណែងប្រធានាធិបតីនេះផងដែរ។

ដោយឡែកលោក ម៉ាឌូរ៉ូ ដែលកាន់អំណាចចាប់ពីឆ្នាំ ២០១៣ ហើយធ្វើឲ្យសេដ្ឋកិច្ចវេណេស៊ុយអេឡាខ្ទេចខ្ទាំស្ទើរដួលរលំនោះ បានព្យាយាមពិពណ៌នាខ្លួនឯងថាជាកូនមេដឹកនាំសង្គមនិយម ហ៊ូហ្គោ ឆាវេស។ លោកប្រកាសថា លោកកំពុងច្បាំងចលនាចក្រពត្តិនិយមដែលប៉ុនប៉ងកម្ទេចរបបសង្គមនិយមនៅវេណេស៊ុយអេឡា និង ដណ្តើមកាន់កាប់ប្រេងដែលប្រទេសនេះមានផង។ ទោះមានការអះអាងបែបនេះក៏ដោយ ប្រជាជនវេណេស៊ុយអេឡា មើលឃើញផ្ទុយពីនេះ។ ពួកគេរងទុក្ខវេទនាកាន់តែខ្លាំងដោយសារគ្មានការងារធ្វើ និងគ្មានស្បៀងអាហារហូប ដោយសារវិបត្តិសេដ្ឋកិច្ចធ្ងន់ធ្ងរ។

ជ័យជម្នះរបស់លោក ប្រហែលជានឹងត្រូវទទួលបានការស្វាគមន៍ដោយការបន្ថែមទណ្ឌកម្មពីសំណាក់បណ្តាប្រទេសលោកខាងលិចផងដែរ។ រដ្ឋបាលអាមេរិករបស់លោក ត្រាំ បានគំរាមរួចហើយថា នឹងប្រើប្រាស់វិធានការសេដ្ឋកិច្ចដើម្បីដាក់គំនាបលើរបបដឹកនាំក្រុងការ៉ាកាសពាក់ព័ន្ធនឹងវិបត្តិនយោបាយដែលកើតឡើងក្នុងប្រទេសនោះ៕