សម្ដេច ហ៊ុន សែន៖ កម្ពុជា មិនមែនជាចំណាប់ខ្មាំងរបស់ក្រុមណាឡើយ

ជាតិ

នយោបាយជាតិ

សម្ដេច ហ៊ុន សែន៖ កម្ពុជា មិនមែនជាចំណាប់ខ្មាំងរបស់ក្រុមណាឡើយ

22, May 2018 , 9:46 am

រូបភាព

ដោយ: ថ្មីៗ

ភ្នំពេញ៖ សម្ដេចនាយករដ្ឋមន្ត្រី ហ៊ុន សែន បានប្រកាសជាថ្មីថា កម្ពុជា មិនមែនជាប្រទេសដែលស្ថិតនៅក្នុងចំណាប់ខ្មាំងរបស់ក្រុមណាមួយឡើយ។ ការប្រកាសរបស់ប្រមុខរដ្ឋាភិបាលនេះ ធ្វើឡើងស្របពេលមជ្ឈដ្ឋានទូទៅកំពុងរង់ចាំមើលស្ថានការណ៍នយោបាយ នៃការបោះឆ្នោតមកដល់នាពេលខាងមុខ។

សម្ដេច ហ៊ុន សែន បាននិយាយថា ការបោះឆ្នោតនឹងប្រព្រឹត្តទៅធម្មតា ដោយគ្មានការប្រែប្រួលអ្វីឡើយ បើទោះជាគ្មានអតីតគណបក្សសង្គ្រោះជាតិក្តី ពោលគឺមានគណបក្សដទៃ ចូលរួមការបោះឆ្នោតនេះ។ ក្នុងន័យនេះ ប្រមុខរដ្ឋាភិបាល ចង់សំដៅថា ប្រទេសកម្ពុជា មានអធិបតេយ្យ និងមិនមែនជាចំណាប់ខ្មាំងអ្នកណាឡើយ។

ថ្លែងចំពោះមុខនិស្សិតជាង៣ពាន់នាក់ នៃសាកលវិទ្យាល័យនីតិសាស្ត្រ និងវិទ្យាសាស្ត្រសេដ្ឋកិច្ច នាយករដ្ឋមន្ត្រីកម្ពុជា បាននិយាយថា៖«យើងបន្តជាមួយគ្នានូវ សុខសន្តិភាព និងដំណើរការប្រជាធិបតេយ្យរបស់យើង តាមរយៈការបោះឆ្នោតនៅថ្ងៃទី២៩ កក្កដា ឆ្នាំ២០១៨នេះ ហើយកម្ពុជាមិនមែនជាចំណាប់ខ្មាំងរបស់ក្រុមណាមួយ ឬមនុស្សណាម្នាក់ ឬបក្សនយោបាយនោះទេ ដំណើរការបោះឆ្នោត នឹងត្រូវដំណើរការដោយគ្មានការពន្យាពេល»។

ការលើកឡើងរបស់សម្ដេច ហ៊ុន សែន នេះ គឺជាឆ្លើយតបទៅអតីតមេដឹកនាំគណបក្សសង្គ្រោះជាតិ ដែលអំពាវនាវឲ្យប្រជាពលរដ្ឋ កុំទៅចូលរួមបោះឆ្នោត និងទាមទារឲ្យសហគមអន្តរជាតិ ដាក់សម្ពាធមកលើរដ្ឋាភិបាលកម្ពុជា ជុំវិញការបោះឆ្នោត ដែលគ្មានគណបក្សខ្លួនចូលរួម។

កន្លងមកគណៈកម្មាធិការជាតិរៀបចំការបោះឆ្នោត បានប្រកាសថា បើទោះអន្តរជាតិមិនទទួលស្គាល់ការបោះឆ្នោតនៅកម្ពុជាក្តី ប៉ុន្តែកម្ពុជា ក៏គ្មានការរៀបចំការបោះឆ្នោតម្ដងទៀត ដើម្បីផ្គាប់ចិត្តបរទេសដែរ។

គិតត្រឹមថ្ងៃទី២២ ឧសភានេះ មានគណបក្សនយោបាយចំនួន១៦ហើយ ដែលត្រូវបានគណៈកម្មាធិការជាតិរៀបចំការបោះឆ្នោត ទទួលស្គាល់ជាផ្លូវការ សម្រាប់ការបោះឆ្នោតខាងមុខនេះ៕