ជាតិ
បោះឆ្នោត
នយោបាយជាតិ
សម រង្ស៊ី៖ បើអ្នកដេកផ្ទះច្រើនជាងអ្នកទៅបោះឆ្នោត គឺមានន័យថាសង្គ្រោះជាតិឈ្នះ
លោក សម រង្ស៊ី ថ្លែងនៅកាន់អ្នកគាំទ្រក្នុងទីក្រុងវែនឃួវើ ប្រទេសកាណាដា កាលពីថ្ងៃទី២០ ខែឧសភា ឆ្នាំ២០១៨
×![]()
ដោយ: ថ្មីៗ
ការផ្លាស់ប្តូរ តាមរយៈការបោះឆ្នោត មិនមែនជាជម្រើសរបស់លោក សម រង្ស៊ី និងក្រុមប្រឆាំងទៀតឡើយ សម្រាប់នីតិកាលទី៦នេះ។ ផ្ទុយទៅវិញ ក្រុមប្រឆាំង បាននាំគ្នាអំពាវនាវស្ទើររាល់ថ្ងៃ ឲ្យប្រជាពលរដ្ឋ បោះបង់ការបោះឆ្នោត ដោយពួកគេអះអាងថា ជាផ្លូវដែលអាចនាំឲ្យមានការផ្លាស់ប្តូរ។
លោក សម រង្ស៊ី ដែលជាជំហរធំជាងគេក្នុងក្រុមប្រឆាំង សន្មត់ថា អ្នកណាមិនទៅបោះឆ្នោត គឺបង្ហាញការគាំទ្រចំពោះគណបក្សសង្គ្រោះជាតិ ហើយអ្នកណាទៅបោះឆ្នោត គឺបង្ហាញការគាំទ្រចំពោះគណបក្សប្រជាជនកម្ពុជា។ យ៉ាងណាក៏ដោយ លោក មានជំនឿយ៉ាងខ្លាំងថា ប្រជាពលរដ្ឋភាគច្រើន ជាពិសេសអ្នកគាំទ្រអតីតគណបក្សសង្គ្រោះជាតិ នឹងមិនទៅបោះឆ្នោត តាមការអំពាវនាវរបស់លោក។
ក្នុងវេទិកាសាធារណៈ នៅទីក្រុងវែនឃូវើ ប្រទេសកាណាដា កាលពីថ្ងៃទី២០ ខែឧសភា ឆ្នាំ២០១៨ លោក សម រង្ស៊ី បានថ្លែងថា បើអ្នកមិនទៅបោះឆ្នោត មានចំនួនច្រើនជាងអ្នកទៅបោះឆ្នោត គឺស្មើនឹងជ័យជម្នះ បានទៅលើគណបក្សសង្គ្រោះជាតិ។ អតីតប្រធានគណបក្សប្រឆាំងរូបនេះ បញ្ជាក់យ៉ាងដូច្នេះថា៖«ខ្ញុំជឿថា ប្រជារាស្ត្រខ្មែរ អត់ទៅបោះឆ្នោតទេ។ អត់ទៅបោះឆ្នោត គឺថ្កោលទោសលោក ហ៊ុន សែន។ មិនទៅបោះឆ្នោត គឺប្រាប់លោក ហ៊ុន សែន ឲ្យចុះចេញ [ពីតំណែង]»។
បញ្ច្រាស់ពីលោក សម រង្ស៊ី និងក្រុមប្រឆាំង សម្តេចនាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជា ប្រឹងអំពាវនាវឲ្យប្រជាពលរដ្ឋ ទៅបោះឆ្នោត។ ក្នុងពិធីប្រគល់សញ្ញាបត្រដល់និស្សិតជាង៣ពាន់នាក់នៃសាកលវិទ្យាល័យនីតិសាស្ត្រ និងវិទ្យាសាស្ត្រសេដ្ឋកិច្ច នាព្រឹកថ្ងៃទី២២ ខែឧសភា ឆ្នាំ២០១៨ ប្រមុខរដ្ឋាភិបាល បានថ្លែងជាថ្មីថា ទោះគ្មានគណបក្សសង្គ្រោះជាតិ ក៏ការបោះឆ្នោត នៅតែប្រព្រឹត្តទៅតាមការគ្រោងទុក ដោយមិនមានការប្រែប្រួលអ្វីឡើយ។
នៅចំពោះមុខនិស្សិត សម្តេច ហ៊ុន សែន បានសង្កត់ធ្ងន់ថា៖«កម្ពុជាមិនមែនជាចំណាប់ខ្មាំងរបស់ក្រុមណាមួយ ឬមនុស្សណាម្នាក់ ឬបក្សនយោបាយនោះទេ។ ដំណើរការបោះឆ្នោត នឹងត្រូវដំណើរការដោយគ្មានការពន្យាពេល»។ កន្លងមក ប្រធានគណបក្សកាន់អំណាច បានចាត់ទុកការអំពាវនាវមិនឲ្យប្រជាពលរដ្ឋ ទៅបោះឆ្នោត ថាជាទង្វើដែលខុសនឹងច្បាប់ ហើយបំផ្លាញប្រជាធិបតេយ្យនៅកម្ពុជា។
ចំណែកឯ លោក សុខ ឥសាន អ្នកនាំពាក្យគណបក្សប្រជាជនកម្ពុជា បានរិះគន់លោក សម រង្ស៊ី ថា បានរំលោភច្បាប់ផ្ទួនៗ។ លោក និយាយថា ការអំពាវនាវមិនឲ្យប្រជាពលរដ្ឋទៅបោះឆ្នោត គឺជាអំពើល្មើសច្បាប់ ដែលអាចនាំឲ្យសមត្ថកិច្ចចាត់វិធានការ ដូចជារឹបអូសទ្រព្យសម្បត្តិ ជាដើម។
អ្នកនាំពាក្យគណបក្សកាន់អំណាច បានសរសេរសារក្នុងបណ្តាញទំនាក់ទំនងតេឡេក្រាម បែបនេះថា៖«ការរឹបអូសទ្រព្យសម្បត្តិរបស់ជនល្មើសច្បាប់ គឺសមស្របតាមបទល្មើស មិនមែនដូចអ្នកនយោបាយ និងអ្នកវិភាគខ្លះ និយាយយករួចខ្លួននោះទេ»។
គណៈកម្មាធិការជាតិរៀបចំការបោះឆ្នោត (គ.ជ.ប.) បានស្នើឲ្យក្រសួងមហាផ្ទៃ ចាត់វិធានការលើក្រុមណា ដែលរារាំងប្រជាពលរដ្ឋ មិនឲ្យទៅបោះឆ្នោតនាពេលខាងមុខ។ ទោះជាមិនបញ្ជាក់ឲ្យចំក៏ដោយ ប៉ុន្តែបំណងដែលចង់ឲ្យក្រសួងមហាផ្ទៃចាត់វិធានការនេះ ទំនងជាមិនមានក្រុមណាផ្សេង ក្រៅតែពីក្រុមប្រឆាំងឡើយ។
ក្រោយទទួលបានសំណើពីគ.ជ.ប. ក្រសួងមហាផ្ទៃ ក៏ចាប់ផ្តើមព្រមានទៅកាន់ក្រុមប្រឆាំងនៅក្រៅប្រទេសភ្លាមៗ ជុំវិញការអំពាវនាវឲ្យប្រជាពលរដ្ឋ ធ្វើពហិការមិនទៅបោះឆ្នោត។ នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ បង្ហើបប្រាប់សារព័ត៌មានថ្មីៗ កន្លងមកថា ក្រសួងមហាផ្ទៃ អាចនឹងដាក់បណ្តឹងទៅតុលាការ ដើម្បីសុំឲ្យបិទសិទ្ធិនយោបាយរបស់ក្រុមប្រឆាំងរយៈពេល៥ឆ្នាំទៀត ហើយក៏អាចស្នើឲ្យបង្កកទ្រព្យសម្បត្តិរបស់ពួកគេ ដែលមាននៅក្នុងប្រទេសកម្ពុជាផងដែរ។
គួររម្លឹកថា គណបក្សកាន់អំណាច រួមទាំងគណបក្ស១៩ទៀត បានដាក់ពាក្យនៅគ.ជ.ប. ដើម្បីចូលរួមប្រកួតប្រជែងក្នុងការបោះឆ្នោតនៅថ្ងៃទី២៩ ខែកក្កដា ឆ្នាំ២០១៨៕
លោក សម រង្ស៊ី ដែលជាជំហរធំជាងគេក្នុងក្រុមប្រឆាំង សន្មត់ថា អ្នកណាមិនទៅបោះឆ្នោត គឺបង្ហាញការគាំទ្រចំពោះគណបក្សសង្គ្រោះជាតិ ហើយអ្នកណាទៅបោះឆ្នោត គឺបង្ហាញការគាំទ្រចំពោះគណបក្សប្រជាជនកម្ពុជា។ យ៉ាងណាក៏ដោយ លោក មានជំនឿយ៉ាងខ្លាំងថា ប្រជាពលរដ្ឋភាគច្រើន ជាពិសេសអ្នកគាំទ្រអតីតគណបក្សសង្គ្រោះជាតិ នឹងមិនទៅបោះឆ្នោត តាមការអំពាវនាវរបស់លោក។
ក្នុងវេទិកាសាធារណៈ នៅទីក្រុងវែនឃូវើ ប្រទេសកាណាដា កាលពីថ្ងៃទី២០ ខែឧសភា ឆ្នាំ២០១៨ លោក សម រង្ស៊ី បានថ្លែងថា បើអ្នកមិនទៅបោះឆ្នោត មានចំនួនច្រើនជាងអ្នកទៅបោះឆ្នោត គឺស្មើនឹងជ័យជម្នះ បានទៅលើគណបក្សសង្គ្រោះជាតិ។ អតីតប្រធានគណបក្សប្រឆាំងរូបនេះ បញ្ជាក់យ៉ាងដូច្នេះថា៖«ខ្ញុំជឿថា ប្រជារាស្ត្រខ្មែរ អត់ទៅបោះឆ្នោតទេ។ អត់ទៅបោះឆ្នោត គឺថ្កោលទោសលោក ហ៊ុន សែន។ មិនទៅបោះឆ្នោត គឺប្រាប់លោក ហ៊ុន សែន ឲ្យចុះចេញ [ពីតំណែង]»។
បញ្ច្រាស់ពីលោក សម រង្ស៊ី និងក្រុមប្រឆាំង សម្តេចនាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជា ប្រឹងអំពាវនាវឲ្យប្រជាពលរដ្ឋ ទៅបោះឆ្នោត។ ក្នុងពិធីប្រគល់សញ្ញាបត្រដល់និស្សិតជាង៣ពាន់នាក់នៃសាកលវិទ្យាល័យនីតិសាស្ត្រ និងវិទ្យាសាស្ត្រសេដ្ឋកិច្ច នាព្រឹកថ្ងៃទី២២ ខែឧសភា ឆ្នាំ២០១៨ ប្រមុខរដ្ឋាភិបាល បានថ្លែងជាថ្មីថា ទោះគ្មានគណបក្សសង្គ្រោះជាតិ ក៏ការបោះឆ្នោត នៅតែប្រព្រឹត្តទៅតាមការគ្រោងទុក ដោយមិនមានការប្រែប្រួលអ្វីឡើយ។
នៅចំពោះមុខនិស្សិត សម្តេច ហ៊ុន សែន បានសង្កត់ធ្ងន់ថា៖«កម្ពុជាមិនមែនជាចំណាប់ខ្មាំងរបស់ក្រុមណាមួយ ឬមនុស្សណាម្នាក់ ឬបក្សនយោបាយនោះទេ។ ដំណើរការបោះឆ្នោត នឹងត្រូវដំណើរការដោយគ្មានការពន្យាពេល»។ កន្លងមក ប្រធានគណបក្សកាន់អំណាច បានចាត់ទុកការអំពាវនាវមិនឲ្យប្រជាពលរដ្ឋ ទៅបោះឆ្នោត ថាជាទង្វើដែលខុសនឹងច្បាប់ ហើយបំផ្លាញប្រជាធិបតេយ្យនៅកម្ពុជា។
ចំណែកឯ លោក សុខ ឥសាន អ្នកនាំពាក្យគណបក្សប្រជាជនកម្ពុជា បានរិះគន់លោក សម រង្ស៊ី ថា បានរំលោភច្បាប់ផ្ទួនៗ។ លោក និយាយថា ការអំពាវនាវមិនឲ្យប្រជាពលរដ្ឋទៅបោះឆ្នោត គឺជាអំពើល្មើសច្បាប់ ដែលអាចនាំឲ្យសមត្ថកិច្ចចាត់វិធានការ ដូចជារឹបអូសទ្រព្យសម្បត្តិ ជាដើម។
អ្នកនាំពាក្យគណបក្សកាន់អំណាច បានសរសេរសារក្នុងបណ្តាញទំនាក់ទំនងតេឡេក្រាម បែបនេះថា៖«ការរឹបអូសទ្រព្យសម្បត្តិរបស់ជនល្មើសច្បាប់ គឺសមស្របតាមបទល្មើស មិនមែនដូចអ្នកនយោបាយ និងអ្នកវិភាគខ្លះ និយាយយករួចខ្លួននោះទេ»។
គណៈកម្មាធិការជាតិរៀបចំការបោះឆ្នោត (គ.ជ.ប.) បានស្នើឲ្យក្រសួងមហាផ្ទៃ ចាត់វិធានការលើក្រុមណា ដែលរារាំងប្រជាពលរដ្ឋ មិនឲ្យទៅបោះឆ្នោតនាពេលខាងមុខ។ ទោះជាមិនបញ្ជាក់ឲ្យចំក៏ដោយ ប៉ុន្តែបំណងដែលចង់ឲ្យក្រសួងមហាផ្ទៃចាត់វិធានការនេះ ទំនងជាមិនមានក្រុមណាផ្សេង ក្រៅតែពីក្រុមប្រឆាំងឡើយ។
ក្រោយទទួលបានសំណើពីគ.ជ.ប. ក្រសួងមហាផ្ទៃ ក៏ចាប់ផ្តើមព្រមានទៅកាន់ក្រុមប្រឆាំងនៅក្រៅប្រទេសភ្លាមៗ ជុំវិញការអំពាវនាវឲ្យប្រជាពលរដ្ឋ ធ្វើពហិការមិនទៅបោះឆ្នោត។ នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ បង្ហើបប្រាប់សារព័ត៌មានថ្មីៗ កន្លងមកថា ក្រសួងមហាផ្ទៃ អាចនឹងដាក់បណ្តឹងទៅតុលាការ ដើម្បីសុំឲ្យបិទសិទ្ធិនយោបាយរបស់ក្រុមប្រឆាំងរយៈពេល៥ឆ្នាំទៀត ហើយក៏អាចស្នើឲ្យបង្កកទ្រព្យសម្បត្តិរបស់ពួកគេ ដែលមាននៅក្នុងប្រទេសកម្ពុជាផងដែរ។
គួររម្លឹកថា គណបក្សកាន់អំណាច រួមទាំងគណបក្ស១៩ទៀត បានដាក់ពាក្យនៅគ.ជ.ប. ដើម្បីចូលរួមប្រកួតប្រជែងក្នុងការបោះឆ្នោតនៅថ្ងៃទី២៩ ខែកក្កដា ឆ្នាំ២០១៨៕
អត្ថបទទាក់ទង
Tag:
បោះឆ្នោត
សម រង្ស៊ី
ហ៊ុន សែន
សុខ ឥសាន
គជប
© រក្សាសិទ្ធិដោយ thmeythmey.com
