លោក សម រង្ស៊ី ថ្វាយសុំព្រះមហាក្សត្រ ផ្សះផ្សារជាតិ ដែលកំពុងប្រេះស្រាំព្រោះរឿងបោះឆ្នោត

ជាតិ

បោះឆ្នោត

នយោបាយជាតិ

លោក សម រង្ស៊ី ថ្វាយសុំព្រះមហាក្សត្រ ផ្សះផ្សារជាតិ ដែលកំពុងប្រេះស្រាំព្រោះរឿងបោះឆ្នោត

25, May 2018 , 9:59 pm

រូបភាព

ដោយ: ថ្មីៗ

ភ្នំពេញ៖ លោក សម រង្ស៊ី សុំព្រះរាជអន្តរាគមន៍ពីព្រះមហាក្សត្រ ជុំវិញភាពចម្រូងចម្រាស់នៃការបោះឆ្នោត ដែលលោក យល់ថា កំពុងធ្វើឲ្យជាតិបែកបាក់។ ប៉ុន្តែលោក សុខ ឥសាន មើលឃើញថា អតីតមេដឹកនាំបក្សប្រឆាំងរូបនេះ ចង់បំបែកបំបាក់ស្ថាប័នព្រះមហាក្សត្រ និងស្ថាប័នរដ្ឋាភិបាល។

ក្រោយលះបង់កម្លាំងនិងពេលវេលាមួយរយៈធំ ក្នុងការខ្នះខ្នែងរកជំនួយពីសហគមន៍អន្តរជាតិរួចមក ឥឡូវ លោក សម រង្ស៊ី អតីតប្រធានគណបក្សសង្គ្រោះជាតិ ក៏ងាកមករកព្រះរាជអន្តរាគមន៍ពីព្រះមហាក្សត្រវិញម្តង ដើម្បីឲ្យព្រះអង្គជួយកែប្រែស្ថានការណ៍នយោបាយនៅកម្ពុជា។ អតីតប្រធានគណបក្សប្រឆាំងរូបនេះ ដែលកំពុងនិរទេស បានសរសេរសារលើទំព័រហ្វេសប៊ុកថា លោក បានថ្វាយលិខិតជាភាសាបារាំងមួយច្បាប់ ដែលផ្តោតលើភាពចម្រូងចម្រាស់នៃការបោះឆ្នោត មកកាន់ព្រះមហាក្សត្រ កាលពីថ្ងៃទី២៣ ខែឧសភា ឆ្នាំ២០១៨។ លិខិតនោះ ក៏ត្រូវបានបង្ហោះលើទំព័រហ្វេសប៊ុករបស់លោកដែរ។

លោក សម រង្ស៊ី ទូលថ្វាយព្រះមហាក្សត្រថា ការបោះឆ្នោតនាពេលខាងមុខ មិនមែនជាការបោះឆ្នោតពិតប្រាកដនោះទេ ហើយក៏កំពុងធ្វើឲ្យសង្គមប្រេះឆា។ បន្ទាប់មកលោក ក៏ស្នើឲ្យព្រះមហាក្សត្រ បង្រួបបង្រួមសង្គមឡើងវិញ ដែលកំពុងប្រទាំងប្រទើសគ្នាដោយសារបញ្ហាបោះឆ្នោតនេះ។

ខ្លឹមសារក្នុងលិខិតជាភាសាបារាំង ដែលថ្វាយមកព្រះមហាក្សត្រ ត្រូវបានលោក សម រង្ស៊ី សម្រាយមកជាភាសាខ្មែរ ហើយបង្ហោះលើទំព័រហ្វេសប៊ុកយ៉ាងដូច្នេះថា៖«ការបោះឆ្នោត នៅថ្ងៃទី២៩ ខែកក្កដា ឆ្នាំ២០១៨ ប្រកបដោយភាពចម្រូងចម្រាស់ និងភាពគ្រោះថ្នាក់ ពីព្រោះវាជាការរៀបចំមួយ ដែលសហគមន៍អន្តរជាតិ ថ្កោលទោសជាទូទៅ ហើយវា ក៏កំពុងតែធ្វើឲ្យសង្គមជាតិប្រេះស្រាំ គួរឲ្យបារម្ភ។ ក្នុងកាលៈទេសៈបែបនេះ [សូម] ព្រះមហាក្សត្រ ប្រមូលផ្តុំ និងបង្រួបបង្រួមកូនចៅរបស់ព្រះអង្គឡើងវិញ ដោយឈរលើគុណតម្លៃ និងគោលការណ៍ប្រកបដោយគតិយុត្តិធម៌ ដែលកូនចៅរបស់ព្រះអង្គទាំងអស់គោរព ស្រឡាញ់ និង ចង់បាន»។

ការសុំព្រះរាជអន្តរាគមន៍ពីព្រះមហាក្សត្រ ធ្វើឲ្យលោក សម រង្ស៊ី រងប្រតិកម្មខ្លាំងៗពីលោក សុខ ឥសាន អ្នកនាំពាក្យគណបក្សប្រជាជនកម្ពុជា។ លោក សុខ ឥសាន ចាត់ទុកខ្លឹមសារក្នុងលិខិតរបស់លោក សម រង្ស៊ី ថាជាការញុះញង់ និងជាការបំបែកបំបាក់រវាងស្ថាប័នព្រះមហាក្សត្រ និងរដ្ឋាភិបាលកម្ពុជា។

អ្នកនាំពាក្យគណបក្សកាន់អំណាច បានសរសេរសារក្នុងបណ្តាញទំនាក់ទំនងតេឡេក្រាម ទៅកាន់ក្រុមអ្នកកាសែតយ៉ាងដូច្នេះថា៖«វា ផ្ទុយទាំងស្រុង ដែលមានអ្នកខ្លះនិយាយថា រាជរដ្ឋាភិបាលកម្ពុជា បំបែកបំបាក់ប្រជាជនមិនឲ្យសាមគ្គីគ្នា។ រាជរដ្ឋាភិបាលកម្ពុជារបស់គណបក្សប្រជាជនកម្ពុជា គឺមានគោលនយោបាយសុខដុមនីយកម្ម ដើម្បីកសាងសង្គមកម្ពុជា ឲ្យរឹងមាំ មានសាមគ្គី ឯកភាពប្រជាជនទូទាំងប្រទេស និងរួមគ្នាអភិវឌ្ឈប្រទេសឲ្យរីកចម្រើន»។

លោក សម រង្ស៊ី រួមទាំងក្រុមប្រឆាំងនៅក្រៅប្រទេស ប្រឹងប្រែងសម្បើមណាស់ ដើម្បីឲ្យសហគមន៍អន្តរជាតិ ដាក់សម្ពាធមកលើរដ្ឋាភិបាលកម្ពុជា។ បំណងរបស់ពួកគេ គឺចង់ឲ្យដោះលែងលោក កឹម សុខា អតីតប្រធានគណបក្សសង្គ្រោះជាតិ និងទាមទារឲ្យគណបក្សនេះ រស់ឡើងវិញដើម្បីបានចូលរួមបោះឆ្នោតជាមួយគេឯង។

ប៉ុន្តែ នៅទីបំផុត អតីតគណបក្សសង្គ្រោះជាតិ មិនមានឱកាសបានដាក់ពាក្យនៅគណៈកម្មាធិការជាតិរៀបចំការបោះឆ្នោត (គ.ជ.ប.) ដើម្បីចូលរួមប្រកួតប្រជែងយកអាសនៈរដ្ឋសភា នៅនីតិកាលទី៦នេះឡើយ។ មានតែគណបក្សកាន់អំណាច រួមទាំងគណបក្ស១៩ទៀតប៉ុណ្ណោះ ដែលបានយកពាក្យទៅដាក់នៅគ.ជ.ប.។

លោក សម រង្ស៊ី បានអំពាវនាវកុំឲ្យប្រជាពលរដ្ឋ ទៅបោះឆ្នោត។ លោក បានហៅការបោះឆ្នោត ដែលគ្មានគណបក្សប្រឆាំង ថាជាការបោះឆ្នោតក្លែងក្លាយ ហើយស្នើឲ្យសហគមន៍អន្តរជាតិ កុំទទួលស្គាល់។

បញ្ច្រាស់ពីលោក សម រង្ស៊ី និងក្រុមប្រឆាំង សម្តេច ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជា បានប្រឹងអំពាវនាវឲ្យប្រជាពលរដ្ឋទៅបោះឆ្នោត។ ប្រធានគណបក្សកាន់អំណាច ចាត់ទុកការអំពាវនាវរបស់លោក សម រង្ស៊ី និងក្រុមអ្នកប្រឆាំង ថាជាទង្វើដែលផ្ទុយនឹងច្បាប់ និងជាការបំផ្លាញប្រជាធិបតេយ្យនៅកម្ពុជា។

ចំណែកគ.ជ.ប.បានស្នើឲ្យក្រសួងមហាផ្ទៃ ចាត់វិធានការចំពោះក្រុមណាដែលរារាំងមិនឲ្យប្រជាពលរដ្ឋទៅបោះឆ្នោត។ ក្រោយមានសំណើពីគ.ជ.ប. ក្រសួងមហាផ្ទៃ ក៏ព្រមានប្តឹងទៅតុលាការ ដើម្បីសុំឲ្យបិទសិទ្ធិនយោបាយរបស់គណបក្សប្រឆាំងរយៈពេល៥ឆ្នាំបន្ថែមទៀត និងបង្កកទ្រព្យសម្បត្តិរបស់ពួកគេ ដែលមាននៅកម្ពុជា៕