ជាតិ
ចិន ជួយបង្កើតវិទ្យាស្ថានថ្នាក់ជាតិមួយឲ្យកម្ពុជា ដើម្បីពង្រឹងប្រព័ន្ធយុត្តិធម៌ លោក អង្គ វង្សវឌ្ឍានា និងគណៈប្រតិភូចិន ចុះកិច្ចព្រមព្រៀងក្នុងការបង្កើតវិទ្យាស្ថានយុត្តិធម៌ថ្នាក់ជាតិ កាលពីថ្ងៃទី២៤ ខែឧសភា ឆ្នាំ២0១៨។ រូបពីហ្វេសបុករបស់លោក ជិន ម៉ាលីន
× ចិន យល់ព្រមជួយកម្ពុជា ក្នុងការបង្កើតស្ថាប័នមួយ ដែលហៅថា «វិទ្យាស្ថានយុត្តិធម៌ថ្នាក់ជាតិ»។ ការបង្កើតវិទ្យាស្ថានថ្នាក់ជាតិនេះ ត្រូវបានចុះកិច្ចព្រមព្រៀងជាមួយគ្នារួចហើយរវាងលោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ និងគណៈប្រតិភូនៃសាកលវិទ្យាល័យវិទ្យាសាស្ត្រនយោបាយ និងនីតិសាស្ត្រភាគនិរតីរបស់ចិន កាលពីថ្ងៃទី២៤ ខែឧសភា ឆ្នាំ២០១៨។
លោក ជិន ម៉ាលីន អ្នកនាំពាក្យក្រសួងយុត្តិធម៌ បានសរសេរលើគណនីហ្វេសប៊ុកថា វិទ្យាស្ថានយុត្តិធម៌ថ្នាក់ជាតិ នឹងផ្តល់សេវាផ្នែកច្បាប់ ដូចជា ការពិគ្រោះយោបល់ផ្នែកច្បាប់ដល់សាធារណជន និងវិនិយោគិន រួមទាំងសេវាសម្រុះសម្រួលវិវាទផ្នែកពាណិជ្ជកម្មនៅកម្ពុជា។ លោក បន្តថា វិទ្យាស្ថាននេះ ក៏ជាកន្លែងសិក្សាស្រាវជ្រាវពីគោលនយោបាយ និងកំណែទម្រង់ប្រព័ន្ធយុត្តិធម៌ ព្រមទាំងបណ្តុះបណ្តាលពង្រឹងសមត្ថភាពមន្ត្រីរាជការក្នុងវិស័យយុត្តិធម៌ផងដែរ។
បើតាមលោក ជិន ម៉ាលីន កម្ពុជា និងចិន បានចំណាយពេលជិតមួយឆ្នាំឯណោះ ក្នុងការចរចាពីការបង្កើតវិទ្យាស្ថានយុត្តិធម៌ថ្នាក់ជាតិ។ អ្នកនាំពាក្យរូបនេះ សរសេរយ៉ាងដូច្នេះថា៖«តាមរយៈកិច្ចព្រមព្រៀងនេះ ភាគីចិននឹងផ្តល់ការគាំទ្រផ្នែកហិរញ្ញវត្ថុ និងបច្ចេកទេស ដល់ក្រសួងយុត្តិធម៌ ក្នុងការបង្កើតនិងដាក់ឲ្យដំណើរការវិទ្យាស្ថាននេះនៅកម្ពុជា»។
យ៉ាងណាក៏ដោយ មន្ត្រីជាន់ខ្ពស់របស់ក្រសួងយុត្តិធម៌ មិនបានលើកឡើងនោះទេថា វិទ្យាស្ថាននេះ នឹងត្រូវចាប់ផ្តើមបង្កើតនិងដាក់ឲ្យដំណើរការនៅពេលណា៕
Tag:
ចិន
វិទ្យាស្ថានយុត្តិធម៌ថ្នាក់ជាតិ
© រក្សាសិទ្ធិដោយ thmeythmey.com