ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
សង្រ្កាន្តឆ្នាំថ្មី
អត្ថបទពាណិជ្ជកម្ម
បទយកការណ៍/សម្ភាស
ជាតិ
បទយកការណ៍ / បទសម្ភាសន៍
អារ៉ែង និងព្រៃឡង់ ជាតំបន់កម្សាន្តបែបធម្មជាតិដែលអ្នកទេសចរមិនគួររំលង
26, May 2018 ,
8:39 pm
រូបភាព
×
ដោយ:
ប៉ូ សាគុន
វាគ្មិនដែលជាតំណាងសហគមន៍តំបន់អារ៉ែង និងតំណាងអ្នកការពារព្រៃឡង់ បានណែនាំយុវជនក្នុងកម្មវិធីបោះជំរំកោងកាង ឱ្យធ្វើដំណើរកម្សាន្តនៅក្នុងតំបន់របស់ខ្លួន ដើម្បីបានឃើញសម្រស់ធម្មជាតិដ៏ស្រស់ត្រកាល ដែលជាតំបន់មានសក្ដានុពលទេសចរណ៍ខ្ពស់។
បទបង្ហាញស្ដីពីតំបន់ទេសចរណ៍នៅតាមតំបន់ព្រៃធម្មជាតិអារ៉ែងនិងព្រៃឡង់ ដែលរៀបចំឡើងដោយក្រុមកង់ខ្មែរ ក្នុងកម្មវិធីបោះជំរំកោងកាង កាលពីពេលកន្លងទៅ បង្ហាញយុវជន ឲ្យសិក្សាបន្ថែមពីតំបន់ទេសចរណ៍ ដែលពួកគេមិនធ្លាប់បានទៅដល់។
លោក ពក វ៉ាន់ ជនជាតិដើមភាគតិចជង តំណាងសហគមន៍អារ៉ែង ដែលរស់នៅក្នុងស្រុកថ្មបាំង ខេត្តកោះកុង បានលើកឡើងថា ស្រុករបស់លោកមានកន្លែងកម្សាន្តច្រើន ដូចជាទឹកធ្លាក់ឆាយតាហីង ឆាយតាប៉ាង ឆាយយោយោង និងទឹកធ្លាក់ឆាយពោរ៩ ដែលមានកម្ពស់១០០ម៉ែត្រ និង៥០ម៉ែត្រ។ ក្រៅពីនេះអ្នកទេសចរអាចឡើងទៅលេងលើភ្នំម្រេចកង្កែប ភ្នំខ្នងក្រពើ មើលព្រៃឈើធំៗ សត្វព្រៃ និងកន្លែងមួយចំនួនទៀត ដែលមានចម្ងាយពីភូមិប្រមាណ១០គីឡូម៉ែត្រ។
សម្ដីបែបរដឺនបន្តិច លោក វ៉ាន់ រៀបរាប់ថាសត្វនៅតំបន់ដែលលោករស់នៅមានប្រមាណ ៤០ប្រភេទនេះដូចជា ខ្លាធំ ខ្លាដំបង ខ្លាឃ្មុំ ក្រពើភ្នំ ត្រីនាគ ដំរី ជាដើម។ លោក ពក វ៉ាន់ បញ្ជាក់ថា៖«បើគេទៅលេងលើភ្នំពេលព្រឹក មើលអ័ព្ទនិងមើលថ្ងៃរះស្អាត មើលចុះទៅក្រោមដូចយើងកំពុងជិះលើយន្តហោះអ៊ីចឹង។ កន្លែងទៅដើរលេងឆ្ងាយពីភូមិបើជិះម៉ូតូប្រហែល៣ម៉ោង បើដើរ១ថ្ងៃពេញ។ ខ្ញុំធ្លាប់ជួបខ្លាធំម្ដងដែរ ពេលឃើញគ្នាខ្ញុំក៏រត់វាក៏រត់ វាមិនស៊ីយើងទេ នៅទីនេះបើយើងមិនខុសត្រណមដើរព្រៃនោះ សត្វវាមិនធ្វើអីយើងទេ»។
មិនខុសគ្នាដែរ លោក សុខ ប្លោក ជនជាតិដើមភាគតិចគួយ តំណាងបណ្ដាញអ្នកការពារព្រៃឡង់ ក៏បានខំផ្សព្វផ្សាយពីតំបន់ទេសចរណ៍ដែលមានក្នុងតំបន់របស់ខ្លួនដែរ។ បណ្ដាញអ្នកការពារព្រៃឡង់ក្នុងតំបន់អភិរក្សជាង៤ម៉ឺន៣ពាន់ហិកតា គ្របដណ្ដប់៤ខេត្ត កំពង់ធំ ក្រចេះ ព្រះវិហារ ស្ទឹងត្រែង រូបនេះ ឱ្យដឹងបែបស្មានថា ព្រៃឡង់មានសត្វព្រៃប្រហែលជាង២០០ប្រភេទដូចជា ខ្លាធំ ដំរី ខ្ទីង ទន្សោង ឈ្លូស ជ្រូកព្រៃ និងសត្វស្លាប ជាដើម។
អ្នកស្រុកសណ្ដាន់ ខេត្តកំពង់ធំ ដែលពោលសម្ដីច្បាស់ៗរូបនេះ បានបញ្ជាក់ថា អ្នកទេសចរអាចទៅមើលព្រៃឈើធំៗក្នុងតំបន់ព្រៃឡង់ មើលដើមឈើជ័រ ឬទៅសិក្សាពីជីវភាពនិងជំនឿរបស់ជនជាតិដើមភាគតិចគួយ។ លោក សុខ ប្លោក បញ្ជាក់យ៉ាងដូច្នេះ៖«នៅស្រុកខ្ញុំគេអាចចូលទៅព្រៃមើលដើមឈើធំៗ មើលសត្វព្រៃកម្រៗច្រើនប្រភេទ និងទៅសិក្សាពីជីវភាពរស់នៅរបស់ជនជាតិដើមផង។ ខ្ញុំឧស្សាហ៍បានជួបសត្វទន្សោង និងខ្ទីង ពេលដើរចូលព្រៃ តែខ្ញុំមិនបានថតទុកទេ ព្រោះពេលនោះខ្ញុំមិនទាន់មានទូរស័ព្ទទំនើបប្រើ»។
លោក ម៉ូត គីមរី តំណាងក្រុមកង់ខ្មែរ បានលើកឡើងថា ការធ្វើដំណើរទេសចរណ៍ទៅតំបន់ធម្មជាតិ ជាពិសេសតំបន់ដែលមិនសូវមានអ្នកទៅដល់គឺជាការចូលរួមផ្សព្វផ្សាយតំបន់ទេសចរណ៍ទាំងនោះ។ លោកថា ក្រុមយុវជនកង់ខ្មែរ មានគោលដៅបង្កើតកម្មវិធីបោះជំរំទៅតំបន់ដែលមានសក្តានុពលទេសចរណ៍ ដែលមិនសូវមានអ្នកទៅដល់ នៅឆ្នាំបន្តបន្ទាប់ផងដែរ។ លោកថា តំបន់អារ៉ែង និងតំបន់ព្រៃឡង់គឺជាកន្លែងទេសចរណ៍បែបធម្មជាតិមួយដ៏ស្រស់ស្អាត។ ក្នុងចំណោមយុវជនប្រមាណ១០០នាក់ លោកបានបញ្ជាក់ថា៖«យើងចង់ឱ្យយុវជនបានទៅកម្សាន្តនៅតំបន់ដែលមានសក្តានុពលបែបធម្មជាតិឱ្យបានច្រើន ដើម្បីបានឃើញសម្បត្តិធម្មជាតិនៅក្នុងប្រទេសយើង បានផ្សព្វផ្សាយបន្ត និងបានជួយដល់ជីវភាពប្រជាសហគមន៍នៅទីនោះផង»។
សូមបញ្ជាក់ថា ការធ្វើបទបង្ហាញនេះ ត្រូវបានធ្វើឡើងនៅឆ្នេរបាក់ខ្លង ដើម្បីបញ្ជ្រាបការយល់ដឹងពីតំបន់ទេសចរណ៍បែបធម្មជាតិ នៅតំបន់ផ្សេងៗដល់យុវជន។ បទបង្ហាញនេះ ក៏បានផ្ដល់ចំណេះដឹងពីប្រពៃណី ទំនៀមទម្លាប់ ជនជាតិដើមភាគតិចផងដែរ៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
Tag:
កោះកុង
ទេសចរណ៍
ព្រៃឡង់
អារ៉ែង
© រក្សាសិទ្ធិដោយ thmeythmey.com
អត្ថបទពេញនិយម
ថ្ងៃ១៧ មេសា កាល៤៩ឆ្នាំមុន កងទ័ពខ្មែរក្រហមដណ្តើមបានទីក្រុងភ្នំពេញ
2 ថ្ងៃ
តើពាក្យ«បច្ច័យ»មានន័យច្បាស់លាស់ដូចម្តេច?
3 ថ្ងៃ
សមត្ថកិច្ចខេត្តកែប ធ្វើកិច្ចសន្យាអាជីវករ២រូប ឱ្យឈប់ទារលុយពីភ្ញៀវទេសចរដែលអង្គុយតាមឆ្នេរ
7 ថ្ងៃ
«បុរាណ»និង«បូរាណ» មានអត្ថន័យដូចគ្នា
7 ថ្ងៃ
«ភេរវកម្ម» មិនមែន «ភេវរកកម្ម» ឬ «ភារវកម្ម» ឡើយ
5 ថ្ងៃ
អត្ថបទពេញនិយមបន្ថែម