ល្បុក្កតោ៖ ជើងខ្លាំងប្រចាំកីឡាជាតិលើកទី២ មានឱកាសជាប់ជម្រើសជាតិ

កីឡាជាតិ

ជាតិ

ល្បុក្កតោ៖ ជើងខ្លាំងប្រចាំកីឡាជាតិលើកទី២ មានឱកាសជាប់ជម្រើសជាតិ

27, May 2018 , 8:59 am

រូបភាព

ដោយ:

អ្នកលេងគុនល្បុក្កតោមកពី៨ក្រសួង រាជធានី-ខេត្តប្រមាណជាង១០០នាក់ នឹងមកជួបជុំគ្នានៅពហុកីឡដ្ឋានជាតិមរតកតេជោ ដើម្បីប្រកួតប្រជែងគ្នាដណ្តើមជើងឯកប្រចាំព្រឹត្តិការណ៍កីឡាជាតិលើកទី២ ចន្លោះពីថ្ងៃទី១-៤ មិថុនា ឆ្នាំ២០១៨។ កីឡាករជើងខ្លាំងមួយចំនួនក្នុងការប្រកួតនេះ អាចនឹងក្លាយជាកីឡាករជម្រើសជាតិបម្រុងប្រចាំសហព័ន្ធកីឡាគុនល្បុក្កតោកម្ពុជា។ នេះបើតាមការអះអាងរបស់អគ្គលេខាធិការសហព័ន្ធ លោក អ៊ួ តារា។

ជាការប្រកួតដណ្តើមជើងឯកប្រចាំព្រឹត្តិការណ៍កីឡាជាតិក៏ពិតមែន។ តែវាជាការប្រកួត ដើម្បីចម្រាញ់រកធនធានជម្រើសជាតិ ដើម្បីត្រៀមការប្រកួតកីឡាស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះ។ លោក អ៊ួ តារា អគ្គលេខាធិការសហព័ន្ធកីឡាគុនល្បុក្កតោកម្ពុជាបានបញ្ជាក់ថា កីឡាករជើងខ្លាំងមួយចំនួនក្នុងការប្រកួត អាចនឹងទទួលបានឱកាសក្លាយជាកីឡាករជម្រើសជាតិប្រចាំសហព័ន្ធ។

«សហព័ន្ធយើងត្រូវការកីឡាករយុវជនថ្នាល និងជម្រើសជាតិប្រមាណ១០នាក់បន្ថែម។ ដូច្នេះសម្រាប់ការប្រកួតកីឡាជាតិលើកទី២នេះ យើងនឹងសម្លឹងរកកីឡាករខ្លាំងៗមកពីរាជធានី-ខេត្ត ឲ្យចូលរួមជាមួយកីឡាករជម្រើសយើង។ បន្ទាប់មកយើងនឹងដាក់ឲ្យពួកគាត់ហ្វឹកហាត់ជាមួយក្រុមជម្រើសជាតិ ដោយឲ្យធ្វើជាកីឡាករជម្រើសជាតិបម្រុង មុនឲ្យពួកគាត់ក្លាយជាជម្រើសជាតិ»។ នេះជាការលើកឡើងរបស់លោក អ៊ួ តារា អគ្គលេខាធិការសហព័ន្ធកីឡាគុនល្បុក្កតោកម្ពុជា។

សម្រាប់ការប្រកួតកីឡាគុនល្បុក្កតោជ្រើសរើសជើងឯកកីឡាជាតិឆ្នាំនេះ មានកីឡាករកីឡាការិនីមកពី៨ក្រសួង រាជធានី-ខេត្តចំនួន១១៦នាក់ចូលរួម ដោយអត្តពលិកទាំងនេះប្រកួតប្រជែងគ្នាលើ១៧ប្រភេទវិញ្ញាសា។ ការប្រកួតប្រព្រឹត្តទៅចាប់ពីថ្ងៃទី១-៤ មិថុនា ឆ្នាំ២០១៨ នៅពហុកីឡដ្ឋានជាតិមរតកតេជោ៕