មហាធៀ ថា លោកនឹងចរចាឡើងវិញលើលក្ខខណ្ឌកិច្ចព្រមព្រៀងសង់ផ្លូវរថភ្លើងតម្លៃ ១៤ពាន់លានដុល្លារជាមួយចិន

អន្តរជាតិ

នយោបាយអន្តរជាតិ

មហាធៀ ថា លោកនឹងចរចាឡើងវិញលើលក្ខខណ្ឌកិច្ចព្រមព្រៀងសង់ផ្លូវរថភ្លើងតម្លៃ ១៤ពាន់លានដុល្លារជាមួយចិន

27, May 2018 , 1:05 pm

រូបភាព

ដោយ: ថ្មីៗ

នាយករដ្ឋមន្ត្រីម៉ាឡេស៊ីលោក មហាធៀ មហាម៉ាត់ បានអះអាងរដ្ឋាភិបាលលោកនឹងចរចាឡើងវិញលើលក្ខខណ្ឌនៃគម្រោងកសាងផ្លូវរថភ្លើងនៅតំបន់សមុទ្រភាគខាងកើត (East Cost Rail Link) ស្ថិតក្រោមគម្រោងខ្សែក្រវាត់មួយវិថីមួយរបស់ចិន។ លោកអះអាងថា ការដកខ្លួនចេញពីកិច្ចព្រមព្រៀងធំៗបែបនេះនឹងអាចឲ្យម៉ាឡេស៊ីកាត់បន្ថយបំណុលបានច្រើនពាន់លានដុល្លារដែរ។

ដូចបានសន្យាមុនការបោះឆ្នោត លោក មហាធៀ មហាម៉ាត់ នឹងត្រួតពិនិត្យ និងចរចាឡើងវិញលើលក្ខខណ្ឌមានចែងក្នុងកិច្ចព្រមព្រៀងកសាងផ្លូវរថភ្លើងតំបន់សមុទ្រភាគខាងកើត (ECRL) ដែលចុះជាមួយមហាយក្សចិនដែលនឹងចំណាយថវិកាប្រមាណ ១៤ពាន់លានដុល្លារអាមេរិកនោះ។

បើតាមការចុះផ្សាយរបស់ទីភ្នាក់ងារព័ត៌មាន Reuters ក្នុងសន្និសីទសារព័ត៌មានថ្ងៃសៅរ៍ទី ២៦ ខែឧសភា នាយករដ្ឋមន្ត្រី មហាធៀ បានបង្ហើបថា លក្ខខណ្ឌដែលមានកំណត់នោះធ្វើឲ្យប៉ះពាល់ខ្លាំងដល់សេដ្ឋកិច្ចម៉ាឡេស៊ី ហើយម្យ៉ាងវិញទៀតវាក៏គ្មានផលចំណេញច្រើនដែរដែលត្រូវកសាងគម្រោងហេដ្ឋារចនាសម្ព័ន្ធទ្រង់ទ្រាយធំបែបនេះ។

«យើងកំពុងចរចាលក្ខខណ្ឌ។ លក្ខខណ្ឌដែលមាននោះគឺប៉ះពាល់ខ្លាំងណាស់ដល់សេដ្ឋកិច្ចយើង។ លោក ណាជីប ដឹងច្បាស់ណាស់ថា គម្រោងផ្លូវរថភ្លើងដ៏ធំនេះមិនមែនជាអ្វីដែលយើងមានលទ្ធភាពកសាងឡើយ។ វាក៏មិនមានបម្រើប្រយោជន៍អ្វីធំដុំដែរ ហើយវាក៏នឹងមិនផ្តល់ផលចំណេញមកយើងដូចគ្នា»។ នេះជាការលើកឡើងរបស់លោក មហាធៀ។

គម្រោងផ្លូវរថភ្លើង(ECRL) ដ៏ធំនេះមានតម្លៃសរុបជិត ១៤ ពាន់លានដុល្លារហើយវាស្ថិតនៅក្រោមគម្រោងខ្សែក្រវាត់មួយវិថីមួយរបស់ចិន និងត្រូវកសាងដោយក្រុមហ៊ុនសំណង់របស់ចិនដូចគ្នា។ វាមានចម្ងាយ ៦៨៨ គីឡូម៉ែត្រ ដែលភ្ជាប់ព្រំដែនភាគខាងកើតប្រទេសថៃទៅកាន់ច្រក ពាណិជ្ជកម្មយុទ្ធសាស្ត្រភាគខាងលិចជ្រោយម៉ាឡាកាផងដែរ។

ការប្រកាសពីបំណងចរចាលក្ខខណ្ឌឡើងវិញនេះ កើតឡើងចំពេលដែលរដ្ឋាភិបាលម៉ាឡេស៊ី បង្ហាញកង្វល់ពាក់ព័ន្ធនឹងការកើនឡើងបំណុលសាធារណៈគួរឲ្យបារម្ភក្រោមអាណត្តិលោក ណាជីប រ៉ាហ្សាក់។ លោក មហាធៀ បានអះអាងផ្ទាល់មាត់ថា បំណុលរដ្ឋកើនឡើងដល់កម្រិតប្រកាសអាសន្នពោលគឺជាង ២៥១ពាន់លានដុល្លារឯណោះ ហើយវាចាំបាច់សម្រាប់រដ្ឋាភិបាលដែលត្រូវរកវិធីបន្ថយបំណុលនេះ។

ក្រៅពីគម្រោងរបស់មហាយក្សចិន លោក មហាធៀ បានលើកឡើងផងដែរពីគោលបំណងរបស់រដ្ឋាភិបាលលោកក្នុងការពិចារណាឡើងវិញលើគម្រោងកសាងផ្លូវរថភ្លើងល្បឿនលឿនភ្ជាប់ពីសិង្ហបុរីមកកាន់គូឡាឡាំពួរនោះ។ គម្រោងសាងសង់នេះត្រូវចំណាយថវិកាប្រហែល ១៧ ពាន់លានដុល្លារ ហើយគម្រោងនេះនឹងត្រូវបញ្ចប់នៅឆ្នាំ ២០២៦ផងដែរ។

នាយករដ្ឋមន្ត្រីវ័យ ៩២ ឆ្នាំខាងលើបានអះអាងថា លក្ខខណ្ឌនៃកិច្ចព្រៀមធ្វើឲ្យម៉ាឡេស៊ីត្រូវចំណាយច្រើនក្នុងករណីខ្លួនសម្រេចលុបចោលកិច្ចព្រមព្រៀងជាមួយសិង្ហបុរីនេះដែរ។ ដូច្នេះហើយរដ្ឋាភិបាលកំពុងសិក្សាបន្ថែមដើម្បីធានាថា វានឹងមានការបន្ថយការចំណាយនៅពេលដែលម៉ាឡេស៊ីសម្រេចដកខ្លួនចេញនោះ។

យ៉ាងណាក៏ដោយ លោក មហាធៀ នៅតែអះអាងថា ការដកខ្លួនចេញពីកិច្ចព្រមព្រៀងធំៗទាំងនេះអាចនឹងជួយឲ្យម៉ាឡេស៊ីកាត់បន្ថយបំណុលរដ្ឋបានប្រហែល ៥០ពាន់លានដុល្លារដែរ ហើយវាជារឿងដែលអាទិភាពសម្រាប់រដ្ឋាភិបាលលោក។