លោក កែវ រ៉េមី៖ ស្អប់បំផុតអាជ្ញាកណ្តាល ចៅក្រមកាត់ក្តីលម្អៀង ដោយប្រើមនោសញ្ចេតនាគ្រូនិងសិស្ស

កីឡាជាតិ

ជាតិ

លោក កែវ រ៉េមី៖ ស្អប់បំផុតអាជ្ញាកណ្តាល ចៅក្រមកាត់ក្តីលម្អៀង ដោយប្រើមនោសញ្ចេតនាគ្រូនិងសិស្ស

27, May 2018 , 3:40 pm

រូបភាព

ដោយ:

កីឡាតេក្វាន់ដូ ITF ត្រូវបានក្រសួងអប់រំយុវជននិងកីឡា សម្រេចដាក់ឲ្យចូលរួមប្រកួតលើកដំបូងក្នុងព្រឹត្តិការណ៍កីឡាជាតិលើកទី២ឆ្នាំនេះ។ ដើម្បីរក្សាកិត្តិយស និងផ្តល់ទំនុកចិត្តដល់កីឡាករ ប្រធានសហព័ន្ធកីឡាតេក្វាន់ដូ ITF លោក កែវ រ៉េមី ជំរុញឲ្យអាជ្ញាកណ្តាលចៅក្រមដាក់ពិន្ទុនិងកាត់ក្តីឲ្យបានត្រឹមត្រូវដោយឈរលើភាពយុត្តិធម៌។ បន្ថែមលើនេះ លោកស្នើឲ្យសមាជិក ប្រតិភូមកពីតាមខេត្តនានា ត្រូវចេះគោរពស្រលាញ់គ្នាតាមតួនាទីនិងភារកិច្ចរៀងៗខ្លួន។

លោក កែវ រ៉េមី ប្រធានសហព័ន្ធកីឡាតេក្វាន់ដូ ITF កម្ពុជា ប្រាប់ឲ្យមន្ត្រីអាជ្ញាកណ្តាលចៅក្រម ដែលកាត់ក្តីក្នុងការប្រកួតកីឡាជាតិលើកទី២ ត្រូវយកចិត្តទុកដាក់ក្នុងការដាក់ពិន្ទុដល់កីឡាករ ពិសេសចៀសវាងការដាក់ពិន្ទុដោយប្រើមនោសញ្ចេតនាគ្រូនិងសិស្ស។ ការជំរុញនេះ គឺដើម្បីផ្តល់ភាពត្រឹមត្រូវនិងទំនុកចិត្តដល់កីឡាករកីឡាការិនី ដែលបានខិតខំប្រឹងប្រែងប្រកួត ពិសេសដើម្បីរក្សាកិត្តិយស សេចក្តីថ្លៃថ្នូរ សម្រាប់ការចូលរួមលើកដំបូងក្នុងព្រឹត្តិការណ៍កីឡាជាតិរបស់កីឡាតេក្វាន់ដូ ITF។

«ខ្ញុំសូមផ្តាំទៅអាជ្ញាកណ្តាលចៅក្រមទាំងអស់ ត្រូវដាក់ពិន្ទុដោយយកចិត្តទុកដាក់ប្រកបដោយយុត្តិធម៌ មិនលម្អៀងថាកូនសិស្ស អ្នកនេះ ឬអ្នកនោះឡើយ។ និយាយតាមត្រង់ ខ្ញុំស្អប់បំផុតអ្នកដាក់ពិន្ទុលម្អៀងដោយប្រើមនោសញ្ចេតនាគ្រូនិងសិស្ស។ ដូច្នេះយើងត្រូវកាត់ក្តីឲ្យយុត្តិធម៌ ដើម្បីផ្តល់ភាពត្រឹមដល់កីឡាករដែលគ្នាបានខិតខំ»។ នេះជាបញ្ជាក់របស់លោក កែវ រ៉េមី។

ប្រធានសហព័ន្ធរូបនេះ ក៏ស្នើឲ្យកីឡាករកីឡាការិនី គ្រូបង្វឹក និងប្រធានប្រតិភូមកពីតាមបណ្តាខេត្តនានា គោរពវិន័យ គោលការណ៍នៃការប្រកួត និងការសម្រេចរបស់មន្ត្រីការប្រកួត ដោយចៀសវាងការតវ៉ាភ្លាមៗនៅលើទីលាន ដែលនាំឲ្យប៉ះពាល់ដល់សណ្តាប់ធ្នាប់នៃការប្រកួត។

លោកបន្ថែមថា៖«ខ្ញុំសូមហាមដាច់ខាតចំពោះការតវា់នៅលើទីលាន ពេលអាជ្ញាកណ្តាលចៅក្រមកាត់ក្តីឲ្យកីឡាករណាម្នាក់ឈ្នះ ហើយគិតថាមិនយុត្តិធម៌។ យើងត្រូវចេះគោរពវិន័យ គោរពឋានានុក្រម តួនាទីភារកិច្ចរបស់ខ្លួន ហើយត្រូវចេះទទួលស្គាល់រាល់ការសម្រេចរបស់គណៈកម្មការប្រកួត។ បើមានភាពមិនប្រក្រតីអ្វី អាចតវ៉ាគ្នាក្រោយការប្រកួតចប់ តែហាមតវ៉ាលើទីលាន»។

ទោះបីវាជាការប្រកួតដណ្តើមជើងឯកកីឡាជាតិក៏ពិតមែន តែសហព័ន្ធនឹងសម្លឹងមើលយុវជនល្អៗ ដើម្បីធ្វើជាយុវជនថ្នាលរបស់សហព័ន្ធកីឡាតេក្វាន់ដូ ITF កម្ពុជា សម្រាប់ត្រៀមការប្រកួតកីឡាស៊ីហ្គេមនាឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ សម្រាប់ការប្រកួតកីឡាជាតិលើកទី២នេះ មានកីឡាករចំនួន១២៨នាក់មកពី១១ក្រសួងរាជធានីខេត្តចូលរួម។ ការប្រកួតប្រព្រឹត្តទៅចាប់ពីថ្ងៃទី២៥-២៩ ឧសភា ឆ្នាំ២០១៨៕