កីឡាជាតិ
ជាតិ
អ្នកចាំទីប៉ូលិស ខែក ច័ន្ទសម្បត្តិ របួសថ្ងាស៤ថ្នេរ ក្នុងជំនួបប៉ូលិសយកឈ្នះវិសាខា
× អ្នកចាំទីរបស់ក្រុមអគ្គស្នងការនគរបាលជាតិ(ប៉ូលិស)កីឡាករ ខែក ច័ន្ទសម្បត្តិ បានរងរបួសថ្ងាសដេរ៤ថ្នេរ នាជំនួបប៉ូលិសយកឈ្នះក្រុមវិសាខា ៣-១ នៅកីឡដ្ឋានអាស៊ីអឺរ៉ុបកាលពីរសៀលថ្ងៃទី២៧ ឧសភា ឆ្នាំ២០១៨។ នៅថ្ងៃអាទិត្យនេះដែរ ក្រុមម្ចាស់ផ្ទះភ្នំពេញក្រោនបានវាយបកតាមស្មើក្រុមភ្ញៀវអាស៊ីអឺរ៉ុបក្នុងលទ្ធផល ១-១។
អ្នកចាំទីអគ្គស្នងការនគរបាលជាតិ ខែក ច័ន្ទសម្បត្តិ ត្រូវបានផ្លាស់ប្តូរចេញភ្លាមៗជំនួសដោយកីឡាករ ប្រាក់ មុន្នីភារុន នៅត្រឹម១២នាទីដំបូងក្នុងតង់ទី១ ក្រោយរងរបួសថ្ងាសដេរប្រមាណ៤ថ្នេរ។ បញ្ហារបួសនេះ កើតឡើងពេលអ្នកចាំទីរូបនេះ ព្យាយាមតាមចាប់បាល់់ដែលផ្លាតចេញពីជើងរបស់ប្រធានក្រុម សាយ ពិសិដ្ឋ ក្រោយការស៊ុតរបស់កីឡាករ សាន គឹមហេង តែបានទៅបុកនឹងជង្គង់កីឡាករ អ៊ុល រ៉ាវី ដែលព្យាយាមទាត់បាល់ចេញតំបន់គ្រោះថ្នាក់។
បើតាមការវាយបឋមរបស់គ្រូពេទ្យនៅទីលាន កីឡាករ ខែក ច័ន្ទសម្បត្តិ ត្រូវចំណាយពេលយ៉ាងហោចណាស់ពីរសប្តាហ៍ ដើម្បីសម្រាកព្យាបាលរបួសឲ្យជាសះស្បើយ។ ទោះបីអ្នកចាំទីដៃទី១រងរបួស អគ្គស្នងការនគរបាលជាតិនៅតែអាចយកឈ្នះវិសាខា ៣-១ ដើម្បីឡើងឈរលេខរៀងទី៤ដោយមាន១៣ពិន្ទុជាបណ្តោះអាសន្នក្នុងសប្តាហ៍ទី៧នៃក្របខណ្ឌបាល់ទាត់កំពូលកម្ពុជា។
នាការប្រកួតនៅកីឡដ្ឋានអាស៊ីអឺរ៉ុបកាលពីរសៀលថ្ងៃទី២៧ ឧសភា ឆ្នាំ២០១៨ កីឡាករ នួន បូរី បានរកគ្រាប់បាល់នាំមុខ ១-០ សម្រាប់ប៉ូលិសនៅនាទីទី២២ មុនខ្សែបម្រើវ័យក្មេង សាន គឹមហេង បានរកគ្រាប់បាល់តាមស្មើ ១-១ សម្រាប់វិសាខានៅនាទីទី៤២។ បន្ទាប់មកកីឡាករ Noh Sangmin បានសម្រេចគ្រាប់ទី២ឲ្យអគ្គស្នងការនគរបាលជាតិនៅនាទីទី៧៣ មុនកីឡាករ ទិត្យ ឌីណា បន្ថែម១គ្រាប់ទៀតនៅនាទីទី៩០ ដើម្បីនាំជ័យជម្នះ ៣-១ សម្រាប់ប៉ូលិស។
នាការប្រកួតនៅកីឡដ្ឋាន RSN ថ្ងៃអាទិត្យនេះដែរ ក្រុមម្ចាស់ផ្ទះភ្នំពេញក្រោនតាមត្រឹមស្មើ ១-១ ជាមួយក្រុមភ្ញៀវអាស៊ីអឺរ៉ុប។ កីឡាករ Momoh Degule Sumaila បានរកគ្រាប់បាល់នាំមុខ ១-០ សម្រាប់ភ្ញៀវអាស៊ីអឺរ៉ុបនៅនាទីទី៥៥ មុនម្ចាស់ផ្ទះភ្នំពេញក្រោនវាយបកតាមស្មើ ១-១ នៅនាទីទី៧៨ ដែលសម្រេចដោយកីឡាករ អ៊ិន សូដាវីដ៕
Tag:
Cambodian League 2018
ខែក ច័ន្ទសម្បត្តិ
ប៉ូលិស
វិសាខា
© រក្សាសិទ្ធិដោយ thmeythmey.com