កីឡាជាតិ៖ ក្រសួងមហាផ្ទៃឡើងឈរកំពូលតារាងមេដាយ ខណៈខេត្ត៤មិនទាន់រកបានមេដាយ

កីឡាជាតិ

ជាតិ

កីឡាជាតិ៖ ក្រសួងមហាផ្ទៃឡើងឈរកំពូលតារាងមេដាយ ខណៈខេត្ត៤មិនទាន់រកបានមេដាយ

30, May 2018 , 10:04 am

រូបភាព

ដោយ:

គិតត្រឹមថ្ងៃទី២៩ ឧសភា ឆ្នាំ២០១៨ ក្រសួងមហាផ្ទៃបានហក់ឡើងទៅឈរកំពូលតារាងមេដាយលើរាជធានីភ្នំពេញ និងក្រសួងការពារជាតិ ក្រោយអត្តពលិកឈ្នះមេដាយមាស២៥ ប្រាក់១១ និងសំរឹទ្ធ១៤។ ទន្ទឹមនឹងក្រសួងរាជធានី-ខេត្តប្រជែងគ្នាពីចំនួនមេដាយ ក៏មានខេត្តចំនួន៤ផងដែរ ដែលមិនទាន់រកបានមេដាយ។ ការប្រកួតកីឡាជាតិលើកទី២បានប្រព្រឹត្តទៅអស់រយៈពេល៥ថ្ងៃហើយ មានកីឡាមួយចំនួនបានបេសកកម្មរបស់ខ្លួន តែក៏មានកីឡាមួយចំនួនមិនទាន់ចាប់ផ្តើមផងដែរ។

រាជធានីភ្នំពេញ ដែលឈរកំពូលតារាងមេដាយកាលពីថ្ងៃទី២៧ ឧសភា បានធ្លាក់ទៅឈរលំដាប់ទី២ ដោយមានមេដាយមាស២៣ ប្រាក់១៩ និងសំរឺទ្ធ១៥។ តំណែងកំពូលតារាងនេះ បានធ្លាក់ទៅលើអង្គភាពក្រសួងមហាផ្ទៃ ក្រោយអត្តពលិករបស់អង្គភាពនេះដណ្តើមបានមេដាយមាស២៥ ប្រាក់១១ និងសំរឹទ្ធ១៤ គិតត្រឹមថ្ងៃទី២៩ ឧសភា ឆ្នាំ២០១៨។

ចំណែកក្រសួងការពារជាតិក្រោយអត្តពលិកដណ្តើមបានមេដាយមាស១២ ប្រាក់៦ និងសំរឹទ្ធ៦ បានបន្តឈរលំដាប់ទី៣ ខណៈខេត្តត្បូងឃ្មុំឡើងមកឈរលំដាប់ទី៤ ក្រោយអត្តពលិកដណ្តើមបានមេដាយមាស៥ ប្រាក់៥ និងសំរឹទ្ធ៣។ ក្រសួងសេដ្ឋកិច្ចនិងហិរញ្ញវត្ថុបានធ្លាក់ទៅឈរលំដាប់ទី៥ ជាមួយមេដាយមាស៥ ប្រាក់៥ និងសំរឹទ្ធ១ រីឯខេត្តស្ទឹងត្រែងឈរលេខរៀងបន្ទាប់ក្រោយឈ្នះមេដាយមាស៥ ប្រាក់៣ និងសំរឹទ្ធ៩។

ទន្ទឹមនឹងអត្តពលិកក្រសួង រាជធានី-ខេត្តមួយចំនួនអបអរនឹងជ័យជម្នះក្រោយដណ្តើមបានមេដាយ អត្តពលិកមកពីខេត្តប៉ៃលិន ក្រចេះ រតនគីរី និងមណ្ឌលគីរីមិនរកបានមេដាយនៅឡើយទេ ខណៈការប្រកួតខិតជិតដល់ថ្ងៃបញ្ចប់។ ការប្រកួតកីឡាជាតិលើកទី២ប្រព្រឹត្តទៅចាប់ពីថ្ងៃទី២៥ ឧសភា ដល់ថ្ងៃទី៤ មិថុនា។ ឆ្នាំនេះមានកីឡាករកីឡាការិនីជាង៤ពាន់នាក់មកពី២៨ក្រសួងរាជធានីខេត្តចូលរួម៕