ល្ខោនទំនើបចម្រុះ«អច្ឆរិយអង្គរ» នឹងសម្ដែងជូនទស្សនាឥតគិតថ្លៃ នៅថ្ងៃទី១ មិថុនា

ជាតិ

សិល្បះ

ល្ខោនទំនើបចម្រុះ«អច្ឆរិយអង្គរ» នឹងសម្ដែងជូនទស្សនាឥតគិតថ្លៃ នៅថ្ងៃទី១ មិថុនា

30, May 2018 , 7:19 pm

រូបភាព

តួអង្គសំខាន់ក្នុងរឿង អច្ឆរិយអង្គរ។ រូបថត ហ្វេសប៊ុក Tep Rindaro

ដោយ: ប៉ូ សាគុន

ដើម្បីអបអរប្រាសាទអង្គរវត្ត ជាប់ចំណាត់ថ្នាក់លេខ១ ជាសំណង់ប្រវត្តិសាស្ត្រល្អបំផុតរបស់ពិភពលោក ទស្សនីយភាពល្ខោនសម័យទំនើបចម្រុះរឿង«អច្ឆរិយអង្គរ» នឹងត្រូវចាក់បញ្ចាំងឲ្យសាធារណជនទស្សនាឥតគិតថ្លៃ ចំនួន២លើក នៅថ្ងៃទី១ ខែមិថុនាខាងមុខ នាសាលមហោស្រពកោះពេជ្រ។ ការចាក់បញ្ចាំងលើកទីមួយ នៅម៉ោង២រសៀល និងលើកទី២ នៅម៉ោង៥ល្ងាច ហើយអ្នកទស្សនាតម្រូវឱ្យទៅមុនការសម្ដែង១ម៉ោងមុន។

សូមជម្រាបថា ការចាក់បញ្ចាំងរឿង «អច្ឆរិយអង្គរ»ដែលឆ្លុះបញ្ចាំងពីប្រវត្តិនៃការកសាងអង្គរវត្ត ជំនឿ និងចំណេះដឹងជាច្រើនរបស់ដូនតាខ្មែរដែលកសាងអង្គរ។ នេះ រៀបចំដោយសហភាពសហព័ន្ធយុវជនកម្ពុជា សហការជាមួយក្រសួងវប្បធម៌ និងវិចិត្រសិល្បៈ និងស្ថានីយ៍ទូរទស្សន៍បាយ័ន។

សូមទំនាក់ទំនងទៅកាន់លេខទូរសព្ទ ០៩៨ ៩៩៩ ៨៩៤ ឬ ០៨៦ ៥១២ ៣២៣ ដើម្បីទទួលបានសំបុត្រចូលទស្សនាដោយឥតគិតថ្លៃ។

សង្ខេបរឿង អច្ឆរិយអង្គរ៖

អស់រយៈពេលជាង២០០០ឆ្នាំមកហើយ ជំនឿលើព្រហ្មញ្ញសាសនាបានរីកសាយមកលើចក្រភពខ្មែរបុរាណនិងបានធ្វើឲ្យមានការផ្លាស់ប្ដូរយ៉ាងខ្លាំងដល់របៀបរបររស់នៅ និងសិល្បៈវប្បធម៌របស់ម្ចាស់ស្រុកដែលបានរស់នៅលើទឹកដីនេះ។

បណ្តាព្រះមហាក្សត្រខ្មែរសម័យបុរាណបានបង្កើតនូវលទ្ធិទេវរាជ ដោយផ្អែកលើទស្សនៈមួយថា «មហាក្សត្រគឺជាទេវរាជ» ។ គេនាំគ្នាសាងសង់ទីសក្ការបូជាតាមបែបសាសនាឧទ្ទិសថ្វាយចំពោះអាទិទេពទាំងឡាយនិងឧទ្ទិសថ្វាយចំពោះព្រះមហាក្សត្រអង្គឯងផ្ទាល់ ពេលសោយទីវង្គត់ទៅនឹងយាងទៅកាន់ឋានអាទិទេពណាមួយ ដែលព្រះអង្គគោរពបូជា។ ដោយសារតែមានជំនឿដូចនេះទើបព្រះមហាក្សត្រខ្មែរគ្រប់អង្គចាប់ផ្តើមកសាងប្រាសាទនៅពេលដែលទ្រង់បានឡើងសោយរាជ្យ។

ក្នុងរជ្ជកាលព្រះបាទសូរិយាវរ្ម័នទី២ ប្រាសាទអង្គរវត្តដ៏ល្បីល្បាញត្រូវបានសាងសង់ឡើងដើម្បីឧទ្ទិសទៅដល់ព្រះនរាយណ៍។ ប្រាសាទដ៏អស្ចារ្យនេះជានិមិត្តរូបនៃ “ ភ្នំព្រះសាម៉ែ ” នៅឋាន កណ្តាល ជាចំនុចកណ្ដាលនៃចក្រវាល និងជាទីឋាននៃអាទិទេពទាំងឡាយ។ មហាប្រាសាទនេះជានិមិត្តរូបនៃមហាអំណាចរបស់ព្រះមហាក្សត្រខ្មែរសម័យបុរាណ គឺជាអំណាចដែលឋិតឋេរជារៀង    រហូត។ ក្រោយពីការដួលរលំនៃចក្រភពខ្មែរក្នុងស.វទី៥ ដោយបរទេសាបានឈ្លានពាន ប្រាសាទអង្គរវត្តនេះត្រូវបានបោះបង់ចោលអស់រយៈពេលរាប់រយឆ្នាំ ។

រហូតដល់ឆ្នាំ១៨៦០ លោកហង់រីម៉ូអូដ អ្នកធម្មជាតិវិទូជនជាតិបារាំង បានធ្វើដំណើស្រាវជ្រាវចូលមកក្នុងតំបន់នានានៃប្រទេស សៀម ខ្មែរ និងលាវ ពេលដែលក្រុមស្រាវជ្រាវរបស់ពួកគាត់ចូលមកដល់ប្រទេសកម្ពុជា លោកហង់រីបានលឺអ្នកស្រុកភូមិនិយាយអំពីមហាប្រាសាទដែលមានសម្រស់ស្អាត ដែរគេជឿថាអាទិទេពជាអ្នកសាងឡើង។ ក្រុមអ្នកស្រាវជ្រាវរបស់លោកហង់រីបានចូលមកកាន់តំបន់នេះតាមការរៀបរាប់របស់អ្នកស្រុក ក្នុងបំណងស្វែងរកប្រាសាទដ៏ល្បីប្រកបដោយអាថ៌កំបាំងដែលស្ថិតនៅក្នុងព្រៃជ្រៅ និងធ្វើអោយក្រុមលោក ហង់រី មានការភ្ញាក់ផ្អើល និងចាប់អារម្មណ៍យ៉ាងខ្លាំងពីរចនាបទ ជាពិសេសគឺបច្ចេកទេសនៃការកសាងប្រាសាទដែលមិនគួរអោយជឿថាអាចកើតមានបានដោយសារស្នាដៃមនុស្សលោក ។

បារមីនៃដួងព្រលឹងរបស់ អប្សរា មួយដួងបាននិមិត្តមកជួបលោក ហង់រី និងបាននាំអារម្មណ៍របស់លោក ហង់រី ទៅកាន់ឋាននៃបុព្វកាលដើម្បីបានឃើញពីអរិយធមីខ្មែរនាសម័យនោះ ជាពិសេសគឺការកសាងប្រាសាទអង្គរវត្ត នាសម័យព្រះបាទ សូរិយាវរ្ម័នទី២ ។

មុននឹងបែកពីនាងអប្សរា និងវិលត្រឡប់មកកាន់ភពដើមវិញ លោក ហង់រី បានយល់ព្រមតាមសំណើររបស់នាងអប្សរាក្នុងការផ្សព្វផ្សាយពីអច្ឆរិយអង្គរទៅកាន់ពីលោកអោយគេបានស្គាល់។ អង្គរវត្ត ត្រូវបានល្បីល្បាញនៅក្នុងឆាកអន្តរជាតិ ដែលបានទាញស្រូបយកភ្ញៀវទេសចរណ៍មកទស្សនាយ៉ាងច្រើនឡើងៗ ជាពិសេសនៅក្នុងបច្ចុប្បន្នកាល ៕