ជាតិ
បោះឆ្នោត
លោក ញឹក ប៊ុនឆៃ ជំរុញឲ្យពលរដ្ឋ ទៅបោះឆ្នោត ដើម្បីបំពេញសិទ្ធិជាម្ចាស់អំណាច លោក ញឹក ប៊ុនឆៃ ស្ថាបនិកគណបក្សខ្មែររួបរួមជាតិ កាលពីឃោសនាបោះឆ្នោតឃុំ-សង្កាត់ ឆ្នាំ២0១៧។ រូបពីទំព័រហ្វេសបុករបស់លោក ញឹក ប៊ុនឆៃ
× លោក ញឹក ប៊ុនឆៃ ស្ថាបនិកគណបក្សខ្មែររួបរួមជាតិ ដែលខាងមុខទំនងក្លាយជាប្រធានគណបក្សនេះវិញ ចាត់ទុកការទៅបោះឆ្នោតរបស់ប្រជាពលរដ្ឋ ថាជាការបំពេញតួនាទីក្នុងនាមជាម្ចាស់អំណាច ក្នុងសង្គមប្រជាធិបតេយ្យ។
លោក ញឹក ប៊ុនឆៃ បានសរសេរលើទំព័រហ្វេសប៊ុកយ៉ាងដូច្នេះថា៖«បោះឆ្នោតដើម្បីបំពេញសិទ្ធិ ជាម្ចាស់អំណាច ម្ចាស់ប្រទេស ម្ចាស់អ្នកនយោបាយ និងជាអ្នកតម្រង់ទិស អ្នកដឹកនាំនយោបាយ ឲ្យដើរលើមាគ៌ាត្រឹមត្រូវ លើកស្ទួយផលប្រយោជន៍ជាតិ នាំនាវាកម្ពុជា ឆ្ពោះទៅកាន់ភាពសុខសាន្ត រុងរឿង រីកចម្រើន ស្មើមុខ ស្មើភាពគ្នា ជាមួយប្រទេសទាំងអស់នៅក្នុងសាកលលោក»។
គណបក្សខ្មែររួបរួមជាតិ ស្ថិតនៅលំដាប់លេខរៀងទី១ លើសន្លឹកឆ្នោត សម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៦ នៅថ្ងៃទី២0១៩ ខែកក្កដា ឆ្នាំ២0១៨។ លោក ញឹក ប៊ុនឆៃ បានសរសេរយ៉ាងដូច្នេះទៀតថា៖«គណបក្សខ្មែររួបរួមជាតិ មានលំដាប់លេខរៀងទី១ ដែលស្ថិតនៅលេខរៀងនាំមុខគេបង្អស់នៅក្នុងសន្លឹកឆ្នោត។ លេខរៀងទី១ គឺល្អ ត្រង់ងាយចាំ ងាយគូស ហើយវាក៏ជា គោលដៅធំបំផុត ដែលគណបក្សខ្មែររួបរួមជាតិ ត្រូវការ»។
គណៈកម្មាធិការជាតិរៀបចំការបោះឆ្នោត (គ.ជ.ប) បានរៀបចំពិធីចាប់ឆ្នោត ដើម្បីកំណត់លំដាប់លេខរៀងគណបក្សនយោបាយលើសន្លឹកឆ្នោត ដែលមានសម្តេចសង្ឃទាំងពីរគណៈ ជាអ្នកចាប់ នៅព្រឹកថ្ងៃទី២៩ ខែឧសភា ឆ្នាំ២០១៨។
បើតាមលទ្ធផលនៃការចាប់លេខរៀង គណបក្សមាតុភូមិយើង លេខរៀងទី២ គណបក្សពន្លឺថ្មី លេខរៀងទី៣ គណបក្សសញ្ជាតិកម្ពុជា លេខរៀងទី៤ គណបក្សខ្មែរក្រោក លេខរៀងទី៥ គណបក្សសំបុកឃ្មុំសង្គមប្រជាធិបតេយ្យ លេខរៀងទី៦ គណបក្សប្រជាធិបតេយ្យមូលដ្ឋាន លេខរៀងទី៧ គណបក្សសាធារណរដ្ឋប្រជាធិបតេយ្យ លេខរៀងទី៨ គណបក្សរស្មីខេមរា លេខរៀងទី៩ គណបក្សសម្ព័ន្ធដើម្បីប្រជាធិបតេយ្យ លេខរៀងទី១០ គណបក្សខ្មែរសាធារណរដ្ឋ លេខរៀងទី១១ គណបក្សខ្មែរឈប់ក្រ លេខរៀងទី១២ គណបក្សហ្វ៊ុនស៊ិនប៉ិច លេខរៀងទី១៣ គណបក្សខ្មែរអភិវឌ្ឍន៍សេដ្ឋកិច្ច លេខរៀងទី១៤ គណបក្សយុវជនកម្ពុជា លេខរៀងទី១៥ គណបក្សធម្មាធិបតេយ្យ លេខរៀងទី១៦ គណបក្សឆន្ទៈខ្មែរ លេខរៀងទី១៧ គណបក្សជនជាតិដើមប្រជាធិបតេយ្យកម្ពុជា លេខរៀងទី១៨ គណបក្សខ្មែរតែមួយ លេខរៀងទី១៩ និងគណបក្សប្រជាជនកម្ពុជា លេខរៀងទី២០៕
Tag:
បោះឆ្នោត
ញឹក ប៊ុនឆៃ
© រក្សាសិទ្ធិដោយ thmeythmey.com