ជាតិ
បោះឆ្នោត
សម្តេច ហ៊ុន សែន៖ អ្នកអាចជាប់គុក បើយកថ្នាំលាបសក់មកលាបម្រាមដៃ ដើម្បីបន្លំថាទៅបោះឆ្នោត
× ត្រូវប្រឈមនឹងទោសព្រហ្មទណ្ឌ និងអាចជាប់ពន្ធនាគារ បើអ្នកណា មិនទៅបោះឆ្នោត ហើយបែរជាយកទឹកថ្នាំខ្មៅផ្សេងៗ ដូចជាទឹកថ្នាំលាបសក់ ជាដើម យកមកលាបចង្អុលដៃ ដើម្បីបន្លំថាបានទៅបោះឆ្នោត។ នេះជាការព្រមានរបស់សម្តេច ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជា។
ក្នុងពិធីសម្ពោធដាក់ឲ្យប្រើប្រាស់រោងចក្រស៊ីម៉ងត៍មួយនៅខេត្តបាត់ដំបង នៅព្រឹកថ្ងៃទី៣១ ខែឧសភា ឆ្នាំ២០១៨នេះ ប្រមុខរដ្ឋាភិបាល បានចាត់ទុក ការយកថ្នាំលាបសក់ មកលាបចង្អុលដៃបែបនេះ ថាជាផែនការ ដែលធ្វើឲ្យមានការភាន់ច្រឡំពីការបោះឆ្នោត។ ប្រធានគណបក្សកាន់អំណាច បានប្រកាសខ្លាំងៗយ៉ាងដូច្នេះថា៖«អ្នកកុំបង្កើតទោសព្រហ្មទណ្ឌ ទៅលើអ្វីដែលអ្នកចង់ធ្វើ។ មានផែនការថា ថ្ងៃបោះឆ្នោតអត់ទៅបោះឆ្នោតទេ តែយកទឹកថ្នាំលាបសក់យកមកលាបដៃ។ នេះជាការបង្កើតទោសផ្នែកព្រហ្មទណ្ឌនៃការក្លែងបន្លំ»។
បន្ទាប់មក សម្តេច ហ៊ុន សែន ក៏និយាយសំដៅទៅរកលោក សម រង្ស៊ី អតីតប្រធានគណបក្សសង្គ្រោះជាតិ ថាជាអ្នកអប់រំប្រជាជនកម្ពុជា ឲ្យត្រៀមធ្វើបែបនេះនៅថ្ងៃបោះឆ្នោត។ សម្តេច ហ៊ុន សែន បានហៅការឃោសនារបស់លោក សម រង្ស៊ី ថា ដូចជារុញប្រជាពលរដ្ឋ ឲ្យទៅជាប់ពន្ធនាគារ។
នាយករដ្ឋមន្ត្រីកម្ពុជា បានសង្កត់ធ្ងន់បែបនេះថា៖«អ្នកឯង [លោក សម រង្ស៊ី] ជាប់គុក ហើយរត់គេចពីគុក ហើយមកអប់រំអ្នកក្នុងស្រុក ឲ្យជាប់គុកតាមខ្លួន។ អ្នកកុំមកចង្អុលណែនាំអ្នកក្នុងស្រុក ឲ្យជាប់គុកដោយសារតែការបន្លំ។ មិនទៅបោះឆ្នោតអត់ជាប់គុកទេ តែធ្វើផែនការបន្លំ គឺជាប់គុក។ ត្រូវច្បាស់រឿងហ្នឹង កុំបង្កើតកំហុស»។
លោក សម រង្ស៊ី និងក្រុមប្រឆាំង ដែលកំពុងនិរទេស បានអំពាវនាវកុំឲ្យជាពលរដ្ឋទៅបោះឆ្នោត ដោយសារតែគ្មានគណបក្សសង្គ្រោះជាតិ។ លោក សម រង្ស៊ី បានប្រកាសពីក្រៅប្រទេសមកថា ប្រជាពលរដ្ឋ ត្រូវធ្វើជាជាប់រវល់នឹងការងារផ្សេងៗ ដើម្បីធ្វើជាលេស ក្នុងការមិនទៅបោះឆ្នោត នៅថ្ងៃទី២៩ ខែកក្កដា ឆ្នាំ២០១៨។
អតីតប្រធានគណបក្សប្រឆាំងរូបនេះ បាននិយាយទៀតថា ប្រសិនបើរងការគំរាមកំហែងពីអាជ្ញាធរ ប្រជាពលរដ្ឋ អាចយកទឹកថ្នាំលាបសក់ មកលាបចង្អុលដៃ ដើម្បីបន្លំថា បានទៅបោះឆ្នោត។ លោក បានបង្កើតពាក្យថា «ដេកផ្ទះឈ្នះឯង»៕
Tag:
បោះឆ្នោត
ហ៊ុន សែន
សម រង្ស៊ី
© រក្សាសិទ្ធិដោយ thmeythmey.com