កាយសម្ព័ន្ធបើកវគ្គបច្ចេកទេសអាជ្ញាកណ្តាលចៅក្រម ដើម្បីបញ្ចៀសកំហុសក្នុងការដាក់ពិន្ទុ

កីឡាជាតិ

ជាតិ

កាយសម្ព័ន្ធបើកវគ្គបច្ចេកទេសអាជ្ញាកណ្តាលចៅក្រម ដើម្បីបញ្ចៀសកំហុសក្នុងការដាក់ពិន្ទុ

31, May 2018 , 2:13 pm

រូបភាព

ដោយ:

ដើម្បីចៀងវាងកំហុសកើតចេញពីការដាក់ពិន្ទុ សហព័ន្ធកីឡាកាយសម្ព័ន្ធ បានរៀបចំវគ្គបណ្តុះបណ្តាលបច្ចេកទេសដាក់ពិន្ទុដល់មន្ត្រីអាជ្ញាកណ្តាលចៅក្រម ដែលចូលរួមកាត់ក្តីក្នុងព្រឹត្តិការណ៍កីឡាជាតិឆ្នាំនេះ។ អត្តពលិកចំនួន៦២នាក់មកពី៥ក្រសួងរាជធានី-ខេត្ត ត្រូវប្រជែងគ្នាដណ្តើមជើងឯកពីថ្ងៃទី៣១ ឧសភា ដល់ថ្ងៃទី៤ មិថុនា នៅអគារកាយសម្ព័ន្ធក្នុងពហុកីឡដ្ឋានជាតិ។

កាលពីថ្ងៃទី៣០ ឧសភា ឆ្នាំ២០១៨ សហព័ន្ធកីឡាកាយសម្ព័ន្ធកម្ពុជាបានរៀបចំវគ្គបច្ចេកទេសអាជ្ញាកណ្តាលចៅក្រម ដើម្បីផ្តល់ទំនុកនិងបង្កើនចំណេះដឹងផ្នែកដាក់ពិន្ទុដល់មន្ត្រីអាជ្ញាកណ្តាលចៅក្រម ដែលចូលរួមកាត់ក្តីក្នុងការប្រកួតកីឡាជាតិឆ្នាំនេះ។ វគ្គបណ្តុះបណ្តាលនេះ រៀបចំឡើងក្នុងគោលបំណងបញ្ចៀសកំហុសកើតចេញពីការដាក់ពិន្ទុ ពិសេសដើម្បីផ្តល់ទំនុកចិត្តដល់កីឡាករកីឡាការិនី។

«យើងរៀបចំវគ្គបណ្តុះបណ្តាលនេះឡើង គឺដើម្បីជំរុញឲ្យអាជ្ញាកណ្តាលចៅក្រមមានការយល់ដឹងកាន់តែច្បាស់ពីការដាក់ពិនិត្យក្នុងការប្រកួតកីឡាជាតិ។ ម្យ៉ាងទៀត យើងទើបជាប់ជាអាជ្ញាកណ្តាលចៅក្រមអន្តរជាតិកាលពីពេលថ្មីៗនៅប្រទេសជប៉ុនផង ដូច្នេះយើងត្រូវពង្រឹងឲ្យពួកគាត់មានចំណេះដឹង និងទំនុកចិត្តក្នុងការដាក់ពិន្ទុ ដើម្បីចៀងវាងកំហុសក្នុងការប្រកួតកីឡាជាតិ»។ នេះជាការលើកឡើងរបស់លោក ណយ ផាណា អគ្គលេខាធិការសហព័ន្ធកីឡាកាយសម្ព័ន្ធ។

ទន្ទឹមនឹងនេះ លោកជំរុញឲ្យអាជ្ញាកណ្តាលចៅក្រមទាំងអស់កាត់ក្តី និងដាក់ពិន្ទុឲ្យបានត្រឹមត្រូវ ហើយចៀសវាងការប្រើមនោសញ្ចេតនាសិស្ស-គ្រូក្នុងការដាក់ពិន្ទុ។ ជាមួយគ្នានេះ លោកប្រាប់ឲ្យកីឡាករកីឡាការិនីប្រកួតឲ្យអស់ពីសមត្ថភាព និងគោរពវិន័យឲ្យបានខ្ជាប់ខ្ជួន ពិសេសត្រូវទទួលស្គាល់រាល់ការសម្រេចរបស់អាជ្ញាកណ្តាលចៅក្រម។

បើយោងតាមលោក ណយ ផាណា ការប្រកួតកីឡាជាតិឆ្នាំនេះ មានអត្តពលិកចំនួន៦២នាក់មកពី៥ក្រសួងរាជធានី-ខេត្តចូលរួម ដោយអត្តពលិកទាំងនេះប្រកួតប្រជែងលើ១៣ប្រភេទវិញ្ញាសា។ ការប្រកួតប្រព្រឹត្តទៅចាប់ពីថ្ងៃទី៣១ ឧសភា ដល់ថ្ងៃទី៤ មិថុនា នៅទីលានកាយសម្ព័ន្ធអគារដំបូលទូកក្នុងពហុកីឡដ្ឋានជាតិ៕