បឹងកេតមិនទាន់មានកីឡាករជំនួសតំណែង បូរ៉ាវី ដែលផ្ទេរទៅកាន់ក្លិបថៃនៅឡើយទេ

កីឡាជាតិ

ជាតិ

បឹងកេតមិនទាន់មានកីឡាករជំនួសតំណែង បូរ៉ាវី ដែលផ្ទេរទៅកាន់ក្លិបថៃនៅឡើយទេ

01, Jun 2018 , 9:41 am

រូបភាព

ដោយ:

ខ្សែប្រយុទ្ធពោរពេញដោយបទពិសោធន៍ ឃួន ឡាបូរ៉ាវី បានផ្ទេរទៅលេងឲ្យក្លិបលំដាប់ទី៣ថៃ Surat Thani ក្រោមលក្ខខណ្ឌខ្ចីជើង។ ការចាកចេញរបស់កីឡាករ ឃួន ឡាបូរ៉ាវី និងមិត្តរួមក្រុម សុខ សុវណ្ណ ទៅកាន់ក្លិបវិសាខា បានជះឥទ្ធិពលសម្រាប់បឹងកេតក្នុងការប្រជែងពានរង្វាន់សម្តេច ហ៊ុន សែន និងក្របខណ្ឌមិត្តហ្វូនខេមបូឌានលីគ។ មកទល់ពេលនេះ បឹងកេតមិនទាន់សម្លឹងឃើញកីឡាករមានសមត្ថភាព ដើម្បីជំនួសតំណែង ឡាបូរ៉ាវី នៅឡើយទេ។

ក្រោយការផ្ទេរកីឡាករ ឃួន ឡាបូរ៉ាវី ទៅកាន់ក្លិបក្របខណ្ឌលីគទី៣ថៃ Surat Thani ក្រោមលក្ខខណ្ឌខ្ចីជើង និងការចាកចេញរបស់ខ្សែការពារ សុខ សុវណ្ណ ទៅកាន់ក្លិបចំណូលថ្មីវិសាខា បឹងកេតមិនទាន់សម្លឹងឃើញកីឡាករមានសមត្ថភាពរូបណា ដើម្បីជំនួសតំណែងនេះនៅឡើយទេ។ ការបាត់បង់កីឡាករឆ្នើមទាំងពីររូបក្នុងពេលតែមួយ បានធ្វើឲ្យគ្រូបង្វឹកបឹងកេតមានក្តីកង្វល់យ៉ាងខ្លាំងក្នុងការប្រជែងដណ្តើមជើងឯកពានរង្វាន់សម្តេច ហ៊ុន សែន និងលីគកំពូលកម្ពុជា។

ក្នុងបទសម្ភាសជាមួយសារព័ត៌មាន Thmey Thmey លោក ហៅ សុជាតិ បានបង្ហាញក្តីកង្វល់យ៉ាងដូច្នេះថា៖«ការចាកចេញរបស់ ឡាបូរ៉ាវី វាមានផលប៉ះពាល់តិចតួចសម្រាប់ការប្រកួតលីគ តែបើពានរង្វាន់សម្តេច ហ៊ុន សែន ប៉ះពាល់ខ្លាំងសម្រាប់យើង។ បើយើងមើលពីគុណភាពរបស់កីឡាករខ្មែរក្នុងក្រុមបឹងកេត យើងឃើញ ឡាបូរ៉ាវី មានបទពិសោធច្រើន និងល្អជាងគេ»។

បឹងកេតមិនសម្លឹងឃើញកីឡាករកម្ពុជាថ្មីក្នុងក្រុមបឹងកេត ដើម្បីជំនួសតំណែងកីឡាករ ឃួន ឡាបូរ៉ាវី នៅឡើយទេ។ ពាក់ព័ន្ធបញ្ហានេះ គ្រូបង្វឹកបឹងកេតអះអាងថា លោកនឹងខិតខំអភិវឌ្ឍន៍យុវជនថ្នាល ដើម្បីមកជំនួសកន្លែងមួយនេះ។ «នៅតំបន់ការពារយើងអាចកីឡាករដើម្បីជំនួស សុខ សុវណ្ណ តែបើប្រយុទ្ធខ្ញុំមិនសម្លឹងឃើញអ្នកណាល្អជាង ឃួន ឡាបូរ៉ាវី នោះទេ។ ចំពោះពានរង្វាន់សម្តេច ហ៊ុន សែន ខ្ញុំនឹងព្យាយាមប្រើយុវជនថ្នាល ដើម្បីផ្តល់បទពិសោធដល់ពួកគាត់ក្នុងការអភិវឌ្ឍន៍សមត្ថភាព»។ នេះជាការបញ្ចាក់របស់លោក ហៅ សុជាតិ ដែលលោកបានបន្ថែមថា បឹងកេតមិនទាន់មានគម្រោងនាំចូលកីឡាករថ្មី ដើម្បីជំនួសកីឡាករដែលចាកចេញនៅឡើយទេ។ សម្រាប់ការដោះដូរកីឡាករក្នុងជើងទី២នេះ ក្លិបនីមួយៗអាចប្តូរកីឡាករកម្ពុជាបានតែ៣រូបនោះទេ។

ទោះបីការផ្ទេរនេះ ឃួន ឡាបូរ៉ាវី ទៅលេងឲ្យក្លិបក្របខណ្ឌទី៣របស់ថៃក៏ដោយ តែលោក ហៅ សុជាតិ យល់ថា វាជាឱកាសមួយដ៏ល្អសម្រាប់ ឡាបូរ៉ាវី ដែលជោគជាំដោយបទពិសោធបាល់ទាត់ ក្នុងការអភិវឌ្ឍសមត្ថភាពឲ្យកាន់តែប្រសើរឡើង។ គ្រូបង្វឹកបឹងកេតរូបនេះអះអាងថា សមត្ថភាពក្លិបក្របខណ្ឌទី៣ថៃ ដែល ឡាបូរ៉ាវី ទៅរួមរស់នេះមិនចាញ់លីគកំពូលកម្ពុជាប៉ុន្មាននោះទេ។

សម្រាប់ការចំណាយពេល៤ឆ្នាំពីឆ្នាំ២០១៤-២០១៧ រួមរស់ជាមួយក្លិបបឹងកេត កីឡាករ ឃួន ឡាបូរ៉ាវី បានជួយឲ្យបឹងកេតលើកពានលីគកំពូលចំនួន២ពីរលើក គឺនៅឆ្នាំ២០១៦ និង ២០១៧។ កីឡាករ ឃួន ឡាបូរ៉ាវី ជាអតីតកីឡាកររបស់ព្រះខ័នរាជស្វាយរៀង ដោយរូបគេបានចំណាយពេលរួមរស់ពីឆ្នាំ២០០៨ ដល់ឆ្នាំ២០១៤ ហើយបានជួយឲ្យក្រុមនេះលើកពានលីគកំពូលកម្ពុជាម្តងនៅឆ្នាំ២០១៣។ បច្ចុប្បន្ន ឃួន ឡាបូរ៉ាវី មានអាយុ៣០ឆ្នាំ៕