ស្វាយរៀងត្រូវការឈ្នះទ័ពល្ងាចនេះ ដើម្បីប្រជែងដណ្តើមលេខ៤ជាមួយភ្នំពេញក្រោន

កីឡាជាតិ

ជាតិ

ស្វាយរៀងត្រូវការឈ្នះទ័ពល្ងាចនេះ ដើម្បីប្រជែងដណ្តើមលេខ៤ជាមួយភ្នំពេញក្រោន

03, Jun 2018 , 2:19 pm

រូបភាព

ដោយ:

ក្រុមព្រះខ័នរាជស្វាយរៀងត្រូវប្រជែងតទល់ជាមួយក្រសួងការពារជាតិ(ទ័ព)សម្រាប់សប្តាហ៍ទី៨នៃពានរង្វាន់ក្របខណ្ឌកំពូលកម្ពុជានៅម៉ោង៦ល្ងាចថ្ងៃទី៣ ខែមិថុនា នាកីឡដ្ឋានខេត្តស្វាយរៀង។ ចំណែកក្រុមមិនដែលឈ្នះសោះវេស្ទើនភ្នំពេញស្វាគមន៍ភ្ញៀវភ្នំពេញក្រោននាម៉ោង៣រសៀល ខណៈអគ្គិសនីតតាំងជាមួយសូលទីឡូអង្គរ។

ក្រុមព្រះខ័នរាជស្វាយរៀងត្រូវការឈ្នះក្រសួងការពារជាតិ នាការប្រកួតក្របខណ្ឌមិត្តហ្វូនខេមបូឌានលីគនៅលើទឹកដីរបស់នៅល្ងាចថ្ងៃអាទិត្យនេះ ដើម្បីប្រជែងដណ្តើមឈរលេខរៀងទី៤ប្រចាំសប្តាហ៍ទី៨ជាមួយភ្នំពេញក្រោន។ ការប្រកួតនេះ នឹងក្លាយជាជំនួបដ៏តានតឹងនិងជក់ចិត្តសម្រាប់អ្នកគាំទ្រ ព្រោះក្រសួងការពារជាតិក៏ត្រូវការឈ្នះដូចគ្នា ដើម្បីស្តារមុខមាត់ឡើងវិញ ក្រោយបរាជ័យ៣ប្រកួតជាប់គ្នា ក្រោមថ្វីជើងបឹងកេត វិសាខា និងណាហ្គាវើលក្នុងលទ្ធផល ២-០ ដូចគ្នា។

បច្ចុប្បន្នក្រុមព្រះខ័នរាជស្វាយរៀងឈរលេខរៀងទី៥ ខណៈភ្នំពេញក្រោនឈរលេខរៀងទី៦មាន១១ពិន្ទុដូចគ្នា។ យ៉ាងណាមិញភ្នំពេញក្រោនអាចមានភាគរយៈឈ្នះគូប្រជែងនៅថ្ងៃនេះខ្ពស់ជាង ព្រោះក្រុមនេះជួបជាមួយក្រុមមិនដែលស្គាល់ជ័យជម្នះវេស្ទើនភ្នំពេញ។ ភ្នំពេញក្រោនត្រូវតទល់ជាមួយក្រុមវេស្ទើនភ្នំពេញនាម៉ោង៣រសៀលថ្ងៃអាទិត្យនេះ នាកីឡដ្ឋានវេស្ទើនភ្នំពេញ។

ចំណែកការប្រកួតនៅកីឡដ្ឋានអគ្គិសនីក្រុមសូលទីឡូអង្គរត្រូវការឈ្នះម្ចាស់ផ្ទះអគ្គិសនីដាច់ខាត ដើម្បីគេចចេញពីតំបន់ត្រូវកាត់ចេញពីក្របខណ្ឌបាល់ទាត់កំពូលកម្ពុជា។ ការប្រកួតនឹងប្រព្រឹត្តទៅនៅម៉ោង៣រសៀលនេះ។ បច្ចុប្បន្នក្រុមចំណូលថ្មីសូលទីឡូអង្គរឈរលេខរៀងទី១០មាន៤ពិន្ទុ ខណៈអគ្គិសនីកម្ពុជាឈរលេខរៀងទី១១មាន៤ពិន្ទុដូចគ្នា៕