ជាតិ
បោះឆ្នោត
នយោបាយជាតិ
សម្ដេច ហ៊ុន សែន ថា អ្នកហាមពលរដ្ឋបោះឆ្នោត គឺប្រឆាំងព្រះមហាក្សត្រ
× ភ្នំពេញ៖ ការចេញព្រះរាជសាររបស់ព្រះមហាក្សត្រ អំពាវនាវឲ្យពលរដ្ឋទៅបោះឆ្នោតនោះ គឺជាឱកាសល្អមួយ សម្រាប់សម្ដេចនាយករដ្ឋមន្ត្រី ហ៊ុន សែន វាយប្រហារទៅលើអតីតគណបក្សសង្គ្រោះជាតិ។
ព្រះរាជសាររបស់ព្រះមហាក្សត្រនេះ ហាក់ដូចជាកំពុងទះកំផ្លៀងក្រុមមេដឹកនាំអតីតគណបក្សប្រឆាំង ដែលហាមពលរដ្ឋទៅបោះឆ្នោត។ នេះជាការបញ្ជាក់របស់សម្ដេច ហ៊ុន សែន ដែលបានចំអកទៅអតីតបក្សប្រឆាំងថា បើពួកគេនៅតែអំពាវនាវហាមពលរដ្ឋបោះឆ្នោតទៀត គឺមានន័យថាប្រឆាំងព្រះមហាក្សត្រ។
ថ្លែងចំពោះមុខកម្មកររោងចក្រជាង២ម៉ឺននាក់ នៅខេត្តកំពង់ចាម នៅថ្ងៃទី៦ មិថុនានេះ ប្រមុខរដ្ឋាភិបាល បានបញ្ជាក់ដូច្នេះថា៖«ឥឡូវនេះតើគេ(សម រង្ស៊ី) ហ៊ានចេញមុខប្រឆាំងជាមួយព្រះរាជសាររបស់ព្រះមហាក្សត្រឬទេ។ បើគេចេញមុខប្រឆាំងសូមកុំភ្លេចថា នេះជាទោសពានវាំងតែម្ដង ប្រោះទង្វើបែបនេះច្បាស់ណាស់ថា ថ្ងៃណាមួយគេនឹងបំផ្លាញរបបរាជានិយម អាស្រ័យធម្មនុញ្ញ និងផ្ដួលរំលំរាជបល្ល័ងតែម្ដង។ ព្រះមហាក្សត្រអំពាវនាវតាមព្រះរាជសារ ឲ្យប្រជាពលរដ្ឋដែលមានសិទ្ធបោះឆ្នោតទៅបោះឆ្នោតទាំងអស់គ្នា បើសិនគេអំពាវនាវឲ្យប្រជាជនកុំទៅបោះឆ្នោត គឺច្បាស់ណាស់ថា នេះជាការប្រឆាំងព្រះមហាក្សត្រតែម្ដង មិនប្រឆាំងរដ្ឋាភិបាល ហ៊ុន សែន ទេគឺប្រឆាំងស្ដេចផែនដីតែម្ដង។ អ្នកឯងត្រូវកំផ្លៀងធ្ងន់ធ្ងរ»។
ជាមួយគ្នានេះនាយករដ្ឋមន្ត្រី បានចាត់ទុកការលើកឡើងរបស់អតីតមេបក្សប្រឆាំង ដែលរិះគន់បក្សដទៃជាបក្សអាប បក្សទប់ជើងគ្រែ បក្សអំពិលអំព័ក បក្សរណបរដ្ឋាភិបាលនោះ ជាការប្រមាថដល់សិទ្ធចូលរួមនយោបាយរបស់ពលរដ្ឋ។
កន្លងមកអតីតគណបក្សសង្គ្រោះជាតិ លោក សម រង្ស៊ី បានអំពាវនាវហាមពលរដ្ឋ និងអ្នកគាំទ្រ ទៅបោះឆ្នោត ក្រោមពាក្យស្លោកមួយថា «ដេកផ្ទះ ឈ្នះឯង» ដើម្បីបង្ហាញការមិនពេញចិត្តចំពោះការបោះឆ្នោត។
តាមរយៈការអំពាវនាវនេះ ក៏មានពលរដ្ឋគាំទ្រអតីតបក្សប្រឆាំងមួយចំនួន ធ្វើយុទ្ធនាការ«ដេកផ្ទះ ឈ្នះឯង» ដើម្បីប្រឆាំងដំណើរការបោះឆ្នោត ។ ប៉ុន្តែយុទ្ធនាការនេះ ត្រូវបានឆ្លើយតបវិញ ដោយអ្នកគាំទ្រគណបក្សកាន់អំណាច ធ្វើយុទ្ធនាការ«តោះ! ទៅបោះឆ្នោត ដើម្បីប្រទេសជាតិខ្ញុំ» ។ វាជាការប្រទាំងគ្នាមួយ សម្រាប់ប្រជាពលរដ្ឋ ដែលមាននិន្នាការនយោបាយ។
សម្រាប់អ្នកវិភាគវិញ ការបោះឆ្នោតនៅពេលខាងមុខ អាចនឹងមានពលរដ្ឋទៅបោះឆ្នោតមិនដល់៥០ភាគរយឡើយ ដែលវាអាចជារូបភាពអាក្រក់មួយ សម្រាប់ការបោះឆ្នោតនៅនីតិកាលទី៦នេះ។ ផ្ទុយពីការលើកឡើងរបស់អ្នកវិភាគនេះ គណៈកម្មាធិការជាតិរៀបចំការបោះឆ្នោត (គ.ជ.ប) ធ្លាប់បានបញ្ជាក់ប្រាប់សារព័ត៌មានថ្មីៗថា បើទោះជាពលរដ្ឋទៅបោះឆ្នោតក្រោម៥០ភាគរយ ក៏សន្លឹកឆ្នោតទាំងអស់ ចាត់ទុកជាបានការ សម្រាប់ការបោះឆ្នោតជ្រើសតាំងតំណាងរាស្ត្រ ដែលឈ្នះឆ្នោតដឹកនាំរដ្ឋាភិបាលដែរ ព្រោះកម្ពុជាគ្មានច្បាប់កំណត់ចំនួនអ្នកបោះឆ្នោតនោះទេ៕
Tag:
ហ៊ុន សែន
ព្រះមហាក្សត្រ
© រក្សាសិទ្ធិដោយ thmeythmey.com