គ.ជ.ប. ចាប់ផ្តើមចែកបណ្ណព័ត៌មានអំពីការបោះឆ្នោត ទៅឲ្យពលរដ្ឋ

ជាតិ

បោះឆ្នោត

គ.ជ.ប. ចាប់ផ្តើមចែកបណ្ណព័ត៌មានអំពីការបោះឆ្នោត ទៅឲ្យពលរដ្ឋ

06, Jun 2018 , 11:59 am

រូបភាព

លោក ហង្ស ពុទ្ធា អ្នកនាំពាក្យគ.ជ.ប.។ រូបពីគ.ជ.ប.

ដោយ: ថ្មីៗ

នៅថ្ងៃទី៦ ខែមិថុនានេះ គឺជាថ្ងៃទី១ ដែលមន្ត្រីគណៈកម្មាធិការជាតិរៀបចំការបោះឆ្នោត (គ.ជ.ប.) ចាប់ផ្តើមចុះធ្វើប្រតិបត្តិការក្នុងការចែកបណ្ណព័ត៌មានពាក់ព័ន្ធនឹងការបោះឆ្នោត ទៅឲ្យប្រជាពលរដ្ឋ ដែលមានឈ្មោះក្នុងបញ្ជីបោះឆ្នោត។ ការចែកបណ្ណព័តមាននេះ នឹងត្រូវបញ្ចប់នៅថ្ងៃទី៥ កក្កដា ឆ្នាំ២០១៨។

លោក ហង្ស ពុទ្ធា អ្នកនាំពាក្យគ.ជ.ប. ប្រាប់សារព័តថ្មីៗតាមទូរសព្ទថា ចំនួនបណ្ណព័តមាន ដែលត្រូវបានផលិត គឺស្មើនឹងចំនួនប្រជាពលរដ្ឋជាង៨លាន៣សែននាក់ ដែលមានឈ្មោះក្នុងបញ្ជីបោះឆ្នោត។ អ្នកនាំពាក្យរូបនេះ បញ្ជាក់យ៉ាងដូច្នេះថា៖«បណ្ណព័ត៌មាននេះ នឹងជួយឲ្យប្រជាពលរដ្ឋ ងាយស្រួលក្នុងស្វែងរកការិយាល័យបោះឆ្នោត។ ហើយមន្ត្រីបោះឆ្នោតនៅតាមការិយាល័យបោះឆ្នោត ក៏ងាយស្រួលក្នុងការស្វែងរកឈ្មោះរបស់អ្នកបោះឆ្នោតដែរ»។

បើតាមសេចក្តីប្រកាសព័ត៌មានពីគ.ជ.ប. បណ្ណព័ត៌មានទាំងនោះ មានបង្ហាញពីកាលបរិច្ឆេទនៃការបោះឆ្នោត និងឈ្មោះ ភេទ ថ្ងៃខែឆ្នាំកំណើត លំនៅដ្ឋានរបស់អ្នកបោះឆ្នោត រួមទាំង លេខរៀងក្នុងបញ្ជីបោះឆ្នោត លេខកូដក្នុងការិយាល័យបោះឆ្នោត និងទីតាំងការិយាល័យបោះឆ្នោត។

សូមបញ្ជាក់ថា ការបោះឆ្នោតជ្រើសតាំងតំណាងរាស្ត្រនីតិកាលទី៦ នឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ ដោយមានគណបក្ស២០ ចូលរួមប្រកួតប្រជែង៕