ជាតិ
បទយកការណ៍ / បទសម្ភាសន៍
សិល្បះ
សិល្បករសម្ដែងក្នុងរឿង«អច្ឆរិយអង្គរ»មានមោទកភាព ព្រោះបានសម្ដែងរឿងឯកសារសម្រាប់កូនខ្មែរ
× ភ្នំពេញ៖ ទស្សនីយភាពល្ខោនទំនើបចម្រុះរឿង «អច្ឆរិយអង្គរ» ប្រជុំសិល្បករល្បីៗទាំងបុរាណ និងសម័យ ជាង២០០នាក់។ សិល្បករជាច្រើន បានពោលដូចៗគ្នាថា ខ្លួនមានមោទកភាពខ្លាំងពេលបានសម្ដែងរឿង «អច្ឆរិយអង្គរ» ដែលសម្ដែងជាសាធារណៈ នៅល្ងាចថ្ងៃ ទី១ ខែមិថុនាកន្លងទៅ។
តារាសម្ដែង លោក អ៊ុន សិទ្ធា បានលើកឡើងថារឿង «អច្ឆរិយអង្គរ» គឺជារឿងបង្ហាញពីប្រវត្តិសាស្ត្រកសាងអង្គរ និងបង្ហាញពីបញ្ញារបស់ដូនតាខ្មែរ ដ៏អស្ចារ្យដែលបានកសាងអង្គរ។ លោកថា ប្រសិនបើមានការសម្ដែងលើកក្រោយទៀត លោកស្នើឱ្យជនរួមជាតិខ្មែរ ចូលទស្សនាឱ្យបានច្រើន ដើម្បីបានដឹងពីប្រវត្តិសាស្ត្រខ្លួន។ លោក សិទ្ធា បញ្ជាក់ថា៖«ខ្ញុំរំភើបមែនទែនពេលបានសម្ដែង។ វាដូចជាខ្ញុំមិនមែនជាសិទ្ធាទេ តែដូចជាតួរអង្គ(ព្យែ) កាលពីសម័យអង្គរអ៊ីចឹង។ ខ្ញុំយល់ថាក្នុងនាមជាខ្មែរ គួរតែសិក្សាពីប្រវត្តិសាស្ត្រជាតិខ្លួន ឱ្យដឹងថាគ្រប់ប្រាសាទទាំងអស់ កសាងឆ្នាំណា?ដោយស្ដេចអង្គណា? ហើយយើងចូលរួមថែរក្សាទាំងអស់គ្នា»។
កញ្ញា ដួង សូរីម៉ា ជាតួសម្ដែងមួយរូបទៀតក្នុងរឿង «អច្ឆរិយអង្គរ» ក៏រំភើបចិត្តខ្លាំងដែរ ដែលបានសម្តែងក្នុងរឿងនេះ។ តារា កាន់តែរំភើបខ្លាំង នៅត្រង់ឈុតអប្សរា ប្រាប់ពីប្រវត្តិសាស្ត្រសាងអង្គរ ទៅកាន់ភ្ញៀវបរទេស។ កញ្ញា ដួង សូរីម៉ា ក៏ស្នើឱ្យកូនខ្មែរ ចូលរួមលើកតម្កើងសិល្បៈបុរាណខ្មែរគ្រប់រូបភាព តាមរយៈការស្លៀកសម្លៀកបំពាក់បុរាណ ការចូលរួមទស្សនាការសម្ដែង និងការថែរក្សាគ្រប់ទម្រង់សិល្បៈខ្មែរ។
សិល្បករមួយរូបទៀត លោក យ៉ែម សំអូន លើកឡើងថា ការសម្ដែងនេះ ផ្ដល់ចំណេះដឹងមួយផ្នែកបន្ថែមទៀតដល់កូនខ្មែរ ឱ្យបានស្វែងយល់ពីការកកើតប្រាសាទអង្គរ និងវប្បធម៌អរិយធម៌ខ្មែរ។ លោកថា ការសម្ដែងនេះ ជាផ្នែកមួយចូលរួមអភិរក្ស និងថែទាំប្រាសាទអង្គរផងដែរ។ លោក យ៉ែម សំអូន បញ្ជាក់៖«ការសិក្សាពីអក្សរសិល្ប៍ ដូចជារឿងព្រះថោងតោងស្បៃនាងនាគ រឿងកូរសមុទ្រទឹកដោះ សុទ្ធតែមានក្នុងរឿងអច្ឆរិយអង្គរនេះ។ ប្រវត្តិប្រាសាទអង្គរវត្ត កូនខ្មែរខ្លះគាត់មិនទាន់បានដឹងអស់ទេ។ ដូច្នេះរឿងនេះ អាចឱ្យគាត់ស្វែងយល់បន្ថែម»។
លោក ទិត្យ ថាវរិទ្ធ តំណាងសហភាពសហព័ន្ធយុជនកម្ពុជា បានឱ្យដឹងថា ទស្សននីយភាពល្ខោនទំនើបចម្រុះ«រឿងអច្ឆរិយអង្គរ»នេះធ្លាប់សម្ដែងម្ដងរួចមកហើយ កាលពីជាង១០ឆ្នាំមុន ។ ប៉ុន្តែដោយប្រព័ន្ធផ្សព្វផ្សាយ នៅមិនទាន់ទូលំទូលាយខ្លាំង ទើបបានជាក្រុមរបស់លោករៀបចំការសម្ដែងនេះឡើងវិញ។ លោកថាសិល្បករទាំងបុរាណ និងសម័យជាង២០០នាក់ ត្រូវហាត់សមផ្សេងៗគ្នាច្រើនថ្ងៃ តែសមជាមួយគ្នាតែ២ថ្ងៃតែប៉ុណ្ណោះ មុនថ្ងៃសម្ដែង។
លោកបញ្ជាក់ថា ការចូលរួមសម្ដែងរបស់សិល្បករទាំងអស់ ដោយការស្ម័គ្រចិត្ត គឺគ្រាន់តែជូនថ្លៃសាំងតិចតួចប៉ុណ្ណោះ។ លោក ទិត្យ ថាវរិទ្ធ បញ្ជាក់៖«សិល្បករទាំងអស់ ដែលបានចូលរួមសុទ្ធតែមកដោយការស្ម័គ្រចិត្តទាំងអស់។ បើពួកគាត់មកយកតម្លៃតាមទីផ្សារដែលពួកគាត់ទទួលបាននោះ អស់ច្រើនណាស់។ តែនេះដោយចិត្តស្រឡាញ់ចង់លើកស្ទួយសិល្បៈខ្មែរ ទើបគាត់មកជួយសម្ដែង យើងគ្រាន់តែជូនថ្លៃសាំងតិចតួច និងរៀបចំអាហារជូនពួកគាត់»៕
Tag:
ភាពយន្ត
សិល្បៈ
វប្បធម៌
អង្គរ
អច្ឆរិយអង្គរ
© រក្សាសិទ្ធិដោយ thmeythmey.com