ជាតិ
សិល្បះ
ភាពខុសគ្នារវាងល្ខោននិយាយទាំង៣ទម្រង់ ទស្សនីយភាពល្ខោននិយាយកាលពីចុងខែឧសភាកន្លងទៅ
× ភ្នំពេញ៖ មនុស្សមួយចំនួនយល់ច្រឡំថា ល្ខោននិយាយមានតែមួយទម្រង់ប៉ុណ្ណោះ គឺល្ខោននិយាយតាមវិទ្យុ។ ប៉ុន្ដែធាតុពិត ល្ខោននិយាយ មានដល់ទៅ៣ទម្រង់ គឺល្ខោននិយាយលើឆាក ល្ខោននិយាយតាមវិទ្យុ និងល្ខោននិយាយជាវីដេអូ។ ល្ខោននិយាយទាំង ៣ ទម្រង់នេះ មានភាពខុសគ្នាបន្តិច ទៅលើការដឹកនាំសម្ដែង តែអត្ថន័យ និងខ្លឹមសារដូចគ្នា។
សាស្ត្រាចារ្យផ្នែកនាដកម្ម លោក អន សុភៈ បានពន្យល់ថា ល្ខោននិយាយទាំងបីទម្រង់ យកសំដីជាធំ និងបង្ហាញគំនិតអប់រំស៊ីជម្រៅ ក្នុងបញ្ហាសង្គមដូចគ្នា ខុសគ្នាតែត្រង់ការដឹកនាំ និងការរៀបចំឆាកប៉ុណ្ណោះ។ តាមសាស្ត្រាចារ្យដដែល ល្ខោននិយាយលើឆាកអ្នកទស្សនាអាចមើលឃើញលើឆាកទាំងមូលហើយទាំងអ្នកសម្ដែង និងអ្នកទស្សនា មើលឃើញគ្នាដោយផ្ទាល់។ ចំណែកល្ខោននិយាយតាមវិទ្យុវិញ ត្រូវការបញ្ចូលការបកស្រាយ ដោយប្រើរូបារម្ភ និងបន្ថែមពាក្យពោលច្រើន ព្រោះអ្នកស្ដាប់មិនបានឃើញរូបភាព តែខ្លឹមសារ និងគំនិតអប់រំរក្សាដដែល។
ចំពោះល្ខោននិយាយបែបវីដេអូវិញ(TV drama) តួសម្ដែងលើឆាកដូចគ្នា ប៉ុន្ដែគេយកកាមេរ៉ាមកថតជាវីដេអូ រួចយកទៅកាត់ត។ ដូច្នេះ អ្នកទស្សនា មើលតាមតែប្លង់ដែលគេកាត់តតែប៉ុណ្ណោះ ហើយពួកគាត់អាចមើលឃើញសកម្មភាពតួ នឹងសម្ភារផ្សេងៗបានច្បាស់ និងលម្អិត ជាងល្ខោននិយាយសម្ដែងលើឆាក។ សាស្ត្រាចារ្យ អន សុភៈ បញ្ញាក់ថា ល្ខោននិយាយបែបវីដេអូ (VT Drama) នាពេលបច្ចុប្បន្ននេះ មានការពេញនិយមខ្លាំងនៅប្រទេសឥណ្ឌា និងប្រទេសចិន ដោយប្រជាជនគេ នៅតែគាំទ្រខ្លាំង៕
Tag:
ល្ខោននិយាយ
ភ្នំពេញ
© រក្សាសិទ្ធិដោយ thmeythmey.com