ជាតិ
ចិនគ្រោងបង្កើតសាកលវិទ្យាល័យធំមួយ នៅកម្ពុជា លោក អ៊ិន សំហេង ជួបជាមួយលោកស្រី Lian Jie។ រូបក្រសួងការងារ
× ចិន មានគម្រោងបង្កើតសាកលវិទ្យាល័យធំមួយ នៅតំបន់អភិវឌ្ឍន៍ជ្រោយចង្វារ រាជធានីភ្នំពេញ។ នេះបើយោងតាមការចុះផ្សាយក្នុងគេហទំព័ររបស់ក្រសួងការងារ និងបណ្តុះបណ្តាលវិជ្ជាជីវៈ។
ព្រឹកថ្ងៃទី៥ ខែមិថុនា លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានជួបជាមួយគណៈប្រតិភូនៃសាកលវិទ្យាល័យពហុបច្ចេកទេសធានជីង (Tianjin Polyethnic University) ប្រទេសចិន ដែលដឹកនាំដោយលោកស្រី Lian Jie លេខាគណៈកម្មាធិការបក្សកុម្មុយនីស្តចិន។ មន្ត្រីក្រសួងការងារ បានស្រង់ប្រសាសន៍របស់លោក អ៊ិត សំហេង ទៅសរសេរលើគេទំព័រនៃក្រសួងការងារថា៖«ភាគីចិន មានគម្រោងបង្កើតសាកលវិទ្យាល័យធំមួយ និងឈ្វេងយល់អំពីស្ថានភាព គោលនយោបាយ នៃការអប់រំបណ្តុះបណ្តាលធនធានមនុស្សនៅកម្ពុជា»។
បើតាមប្រភពខាងលើ លោករដ្ឋមន្ត្រី បានអះអាងថា ចិន នឹងសហការជាមួយក្រុមហ៊ុន OCIC ដែលស្ថិតនៅក្រោមការគ្រប់គ្រងរបស់លោក ពុង ឃាវសែ និងជាប្រធានសមាគមសម្ព័ន្ធខ្មែរ-ចិន ដើម្បីបង្កើតសាកលវិទ្យាល័យមួយនេះ។
សាលកវិទ្យាល័យនេះ មានបណ្តុះបណ្តាលលើកម្រិត បណ្ឌិត អនុបណ្ឌិត រហូតដល់វិជ្ជាជីវៈ។ ភាសាខ្មែរ ចិន និងអង់គ្លេស ជាដើម នឹងត្រូវប្រើប្រាស់ក្នុងសាកលវិទ្យាល័យនេះ។
ប្រភពពីក្រសួងការងារ មិនបានបញ្ជាក់នោះទេ សាកលវិទ្យាល័យខាងលើ នឹងត្រូវចាប់ផ្តើមសាងសង់នៅពេលណា ដោយគ្រាន់លើកឡើងថា ភាគីចិន នឹងជំរុញគម្រោងនេះ ឲ្យសម្រេចនាពេលឆាប់ៗ៕
Tag:
អ៊ិត សំហេង
ពុង ឃាវសែ
ចិន
© រក្សាសិទ្ធិដោយ thmeythmey.com