ជាតិ
សិល្បះ
អ្នកជំនាញ៖ អំបោះដៃពណ៌ក្រហមក្នុងពិធីមង្គលការ និងបុណ្យផ្សេងៗ មិនមែនជាប្រពៃណីខ្មែរឡើយ
× ភ្នំពេញ៖ តាំងពីបុរាណកាលមក ខ្មែរប្រកាន់ទំនៀមទម្លាប់ចងអំបោះដៃពណ៌ស ទាំងក្នុងពិធីមង្គលការ ពិធីបុណ្យសព និងពិធីបុណ្យផ្សេងៗទៀត ដោយមានជំនឿថា អំបោះស តំណាងឱ្យភាពបរិសុទ្ធ សុចរិត យុត្តិធម៌ និងសីលធម៌។ ប៉ុន្ដែមកដល់បច្ចុប្បន្ន ប្រជាពលរដ្ឋខ្មែរមួយចំនួន បែរជាកាន់យកអំបោះក្រហម មកចងដៃ ក្នុងពិធីមង្គលការ និងពិធីបុណ្យផ្សេងៗទៅវិញ។ តើនេះដោយសារមូលហេតុអ្វី?
អំបោះក្រហម ដែលប្រជាពលរដ្ឋខ្មែរកំពុងប្រើក្នុងពិធីមួយចំនួននាពេលបច្ចុប្បន្ន មិនមែនជាប្រពៃណីខ្មែរឡើយ។ នេះជាការអះអាង របស់ លោក វ៉ាយ វិបុល ទីប្រឹក្សាក្រសួងធម្មការ និងសាសនា និងជាសមាជិកគណៈកម្មការស្រាវជ្រាវវិជ្ជាហោរាសាស្ត្រ និងទំនៀមទម្លាប់ខ្មែរ នៃគណៈកម្មាធិការជាតិរៀបចំបុណ្យជាតិ និងអន្តរជាតិ។
លោក វ៉ាយ វិបុល បញ្ជាក់ថា តាំងពីបុរាណមក ខ្មែរមានទម្លាប់ប្រើតែអំបោះដៃពណ៌ស ប៉ុណ្ណោះ សម្រាប់ចងដៃកូនកំលោះកូនក្រមុំ សាច់ញាតិជិតឆ្ងាយក្នុងពិធីមង្គលការ និងក្នុងពិធីបុណ្យទានផ្សេងៗ ហើយខ្មែរក៏មានសេចក្ដីសុខចម្រើនខ្លាំងដែរ។
បើតាមការសិក្សាស្រាវជ្រាវរបស់លោក ការចងដៃអំបោះសសម្រាប់ខ្មែរបុរាណ គឺតំណាងឱ្យភាពបរិសុទ្ធ សុចរិត យុត្តិធម៌ និងសីលធម៌ជាដើម និងជាផ្នែកមួយ នាំឱ្យខ្មែរបុរាណបានសុខចម្រើន និងរុងរឿងផងដែរ។លោក វ៉ាយ វិបុល បញ្ជាក់៖« ខ្មែរបុរាណមុននឹងធ្វើអ្វី ឬកំណត់អ្វីមួយជាគោល សម្រាប់ឱ្យមនុស្សច្រើនជំនាន់គោរពតាមនោះ បានគិតយ៉ាងច្បាស់លាស់ណាស់ មិនចេះតែធ្វើនោះទេ។ បើមិនអ៊ីចឹង មិនមែនខ្មែរបុរាណរុងរឿង សម្បូរសប្បាយនោះទេ។ ដូច្នេះការចងដៃអំបោះសនេះដូចគ្នា។ លោក បានរកធាតុល្អ ដែលសក្តិសមនឹងយកមកជាតំណាងឱ្យពណ៌នេះ យ៉ាងច្បាស់ និងត្រឹមត្រូវហើយ ទើបគាត់កំណត់យក»។
តែយ៉ាងណាក៏ដោយ លោក វ៉ាយ វិបុល មិនបានដឹងថា ការប្រើប្រាស់អំបោះពណ៌ក្រហមនេះ កើតមានពីពេលណាឱ្យប្រាកដនោះទេ តែលោកសន្និដ្ឋានថា ទំនងកើតមាន តាំងពីជនជាតិចិនដណ្ដើមបានទីផ្សារក្នុងស្រុកខ្មែរ នាសម័យមុនម្ល៉េះ។ លោក បន្ថែមថា ខ្មែរមួយចំនួន មិនបានដឹង និងសិក្សាពីទំនៀមទម្លាប់ ប្រពៃណីរបស់ខ្លួនឯងច្បាស់ឡើយ។ ដូច្នេះចេះតែធ្វើតាមគ្នា ដោយគ្មានការពិចារណា ថ្លឹងថ្លែងឱ្យបានច្បាស់លាស់ ហើយខ្លះថែមទាំងបោះបង់ចោលអ្វីដែលជាទំនៀមល្អៗរបស់ខ្លួនដោយមិនដឹងខ្លួន ហើយ ទៅប្រកាន់យករបស់គេ មកដាក់ក្នុងខ្លួនទៅវិញ៕
Tag:
វប្បធម៌
ប្រពៃណី
ទំនៀម
© រក្សាសិទ្ធិដោយ thmeythmey.com