ជាតិ
អង្គការជាង១០០ លើកឡើងរួមគ្នាថា ការគ្រប់គ្រងបណ្តាញសង្គម ធ្វើឲ្យប៉ះពាល់យ៉ាងខ្លាំងដល់សិទ្ធិបញ្ចេញមតិ
× ភ្នំពេញ៖ អង្គការសង្គមស៊ីវិល ១១៧ បានចេញសេចក្ដីថ្លែងការណ៍រួមគ្នាមួយ ដោយសម្ដែងការសោកស្ដាយជាខ្លាំង ចំពោះរដ្ឋាភិបាលកម្ពុជា ដែលគ្រប់គ្រងលើប្រព័ន្ធអ៊ីនធឺណិត បង្កើនការឃ្លាំមើល និងការផ្ដន្ទាទោស ដល់ម្ចាស់គេហទំព័រ និងអ្នកប្រើប្រាសបណ្តាញសង្គម។
ក្រុមអង្គការសង្គមស៊ីលវិលខាងលើ បានលើកឡើងក្នុងសេចក្ដីថ្លែងការណ៍ថា ចំណាត់ការបែបនេះរបស់រដ្ឋាភិបាល គឺជាការរំលោភបំពានលើរដ្ឋធម្មនុញ្ញកម្ពុជា និងច្បាប់សិទ្ធិមនុស្សអន្តរជាតិ ដែលជាសិទ្ធសេរីភាពក្នុងការបញ្ចេញមតិ។
ក្រុមអង្គការសង្គមស៊ីវិល បានបន្តថា ប្រកាសអន្តរក្រសួង ដែលចេញកាលពីថ្ងៃទី២៨ ខែឧសភា កន្លងទៅ បានគំរាមកំហែងដល់ឯកជនភាព និងសិទ្ធសេរីភាពក្នុងការបញ្ចេញមតិនៃអ្នកប្រើប្រាស់អ៊ីនធឺណិត តាមបណ្ដាញសង្គមទាំងអស់នៅកម្ពុជា ក៏ដូចជារឹតត្បិតកាន់តែខ្លាំងឡើងៗ ចំពោះលំហសេរីភាពក្នុងការពិភាក្សាជាសាធារណៈ បន្ទាប់ពីធ្វើទុក្ខបុកម្នេញជាបន្តបន្ទាប់ រយៈពេលប៉ុន្មានខែចុងក្រោយនេះ។
ក្រុមអង្គការសង្គមស៊ីវិល បានរិះគន់ចំពោះវិធានការរដ្ឋាភិបាលថា ភាពមិនច្បាស់លាស់នៃអត្ថន័យ ខ្លឹមសារព័ត៌មាន «ល្មើសច្បាប់» គឺសបញ្ជាក់ពីការត្រួត្រា និងភាពទូលំទូលាយ នៃការចាត់វិធានការរបស់អាជ្ញាធរ ដែលអាចបកស្រាយលើសពីភាពសមហេតុផល ក្នុងន័យចាំបាច់ដើម្បីថែរក្សាសណ្ដាប់ធ្នាប់សាធារណៈ និងសន្តិសុខ។ ហើយរាល់យោបល់ណាដែលអាជ្ញាធរចាត់ទុកថា មិនអាចទទួលយកបាន អាចត្រូវបានអាជ្ញាធរចាត់វិធានការតាមរយៈបទបញ្ញត្តិមិនច្បាស់លាស់ និងភាពទូលំទូលាយនៃលក្ខណៈវិនិច្ឆ័យដូចជា «បំបែកបំបាក់សាមគ្គីភាព» ឬ «បង្កអន្តរាយដល់សណ្ដាប់ធ្នាប់សង្គម» ជាដើម។
សេចក្ដីថ្លែងការណ៍រួម នៃក្រុមអង្គការសង្គមស៊ីល បានលើកហេតុផលដោយការមិនពេញចំពោះវិធានរដ្ឋភិបាល យ៉ាងដូច្នេះថា៖«បទបញ្ញតិ្តនេះ អាចត្រូវបានប្រើប្រាស់ ដើម្បីបំបិទសំឡេង និងដាក់ទោសអ្នកបង្ហោះព័ត៌មាន ឬចែកចាយព័ត៌មានបន្តលើប្រព័ន្ធអ៊ីនធឺណិត ដែលមានការរិះគន់ដល់រាជរដ្ឋាភិបាល»។
សេចក្ដីថ្លែងការណ៍ខាងលើបានបន្ថែមទៀតថា ប្រកាសអន្តរក្រសួង នៃរដ្ឋាភិបាលបានកម្រិតសេរីភាព អ្នកប្រើប្រាស់ប្រព័ន្ធអ៊ីនធឺណិតទាំងអស់នៅកម្ពុជាឲ្យស្ថិតក្រោមការត្រួតពិនិត្យ និងវិស័យឯកជនផងដែរ ទាំងនេះបានបង្ហាញផលប៉ះពាល់ជាខ្លាំងដល់សិទ្ធិឯកជនភាព និងសេរីភាពក្នុងការបញ្ចេញមតិ ដែលត្រូវបានធានាដោយរដ្ឋធម្មនុញ្ញនៃកម្ពុជា។ ប៉ុន្តែសេរីភាពដែលធានាដោយរដ្ឋធម្មនុញ្ញ អាចត្រូវបានកម្រិតពីព្រោះតែកត្តាសណ្ដាប់ធ្នាប់សាធារណៈ និងសន្តិសុខជាតិ។ ទោះជាយ៉ាងនេះក្តី ករណីនេះអាចធ្វើទៅបាននៅក្នុងស្ថានភាពធ្ងន់ធ្ងរ ចាំបាច់ និងសមហេតុផលតែប៉ុណ្ណោះ។ នេះបើតាមការទាញទឡ្ហីករណ៍ នៃក្រុមអង្គការសង្គមស៊ីវិលទាំង១១៧។
យ៉ាងណាក៏ដោយ លោក សុខ ឥសាន អ្នកនាំពាក្យគណបក្សប្រជាជនកម្ពុជា បានចេញមកការពារវិធានការរបស់រដ្ឋាភិបាល ក្នុងការគ្រប់គ្រងគេហទំព័រ និងបណ្តាញសង្គម។ លោក បានប្រតិកម្មនឹងមជ្ឈដ្ឋានមួយចំនួន ដែលបកស្រាយថា ការបង្កើតគណៈកម្មាធិការអន្តរក្រសួងនេះ ថាជាការរឹតបន្តឹងសិទ្ធិសេរីភាពបញ្ចេញមតិ។
អ្នកនាំពាក្យបក្សកាន់អំណាច បានសរសេរសារក្នុងបណ្តាញទំនាក់ទំនងតេឡេក្រាម យ៉ាងដូច្នេះថា៖«ការវាយតម្លៃលើការរៀបចំសណ្តាប់ធ្នាប់នៃការប្រើប្រាស់ហ្វេសប៊ុក គឺជាចេតនាទុច្ចរិតរបស់ពួកអគតិ ដែលចង់បង្កអំពើអនាធិបតេយ្យនៅក្នុងសង្គម»។
គួររម្លឹកថា ក្រសួងមហាផ្ទៃ ក្រសួងព័ត៌មាន និងក្រសួងប្រៃសណីយ៍ បានចេញប្រកាសរួមគ្នា ក្នុងការចាត់វិធានការលើគេទំព័រ និងអ្នកប្រើប្រាស់បណ្តាញសង្គម ដូចជាហ្វេសបុក ជាដើម ប្រសិនបើក្រសួងមានសមត្ថកិច្ចទាំងបី រកឃើញថា គេហទំព័រ និងអ្នកប្រើប្រាស់បណ្តាញសង្គម បានផ្សព្វផ្សាយ ឬចែកចាយព័ត៌មាន ដែលធ្វើឲ្យប៉ះពាល់ដល់សង្គម៕
Tag:
អង្គការសង្គមស៊ីលវិល
អ៊ីនធឺណិត
សិទ្ធិ
© រក្សាសិទ្ធិដោយ thmeythmey.com