ប្រធាន គ.ជ.ប រម្លឹកអ្នកបោះឆ្នោតត្រៀមឯកសារឲ្យបានគ្រប់គ្រាន់ ខណៈការបោះឆ្នោតកាន់តែកៀក

ជាតិ

បោះឆ្នោត

ប្រធាន គ.ជ.ប រម្លឹកអ្នកបោះឆ្នោតត្រៀមឯកសារឲ្យបានគ្រប់គ្រាន់ ខណៈការបោះឆ្នោតកាន់តែកៀក

16, Jun 2018 , 9:59 pm

រូបភាព

រូបភាពពីហ្វេសប៊ុក គ.ជ.ប

ដោយ:

ភ្នំពេញ៖ ប្រធានគណៈកម្មាធិការរៀបចំការបោះឆ្នោត (គ.ជ.ប) បានប្រាប់ទៅប្រជាពលរដ្ឋដែលមានឈ្មោះក្នុងបញ្ជីបោះឆ្នោត ទាំងអស់ត្រៀមឯកសារឲ្យបានគ្រប់គ្រាន់ដើម្បីទៅបោះឆ្នោតជ្រើសតាំងតំណាងរាស្ត្រ នីតិកាលទី៦ ដែលនឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨។

ប្រធាន គ.ជ.ប លោក ស៊ិក ប៊ុនហុក បានរម្លឹកដូច្នេះថា ការបោះឆ្នោតជាតិ កាន់តែខិតជិតមកដល់ហើយ ដើម្បីទៅចូលរួមបោះឆ្នោតនេះបាន ប្រជាពលរដ្ឋដែលមានឈ្មោះក្នុងបញ្ជីបោះឆ្នោតឆ្នាំ២០១៧ ទាំងអស់ត្រូវមានអត្តសញ្ញាណបណ្ណសញ្ជាតិខ្មែរ (អ.ខ) ឬឯកសារបញ្ជាក់អត្តសញ្ញាណបណ្ណ (ឯ.អ)បម្រើឲ្យការបោះឆ្នោត។

សេចក្ដីអំពាវនាវ របស់ លោក ស៊ិក ប៊ុនហុក ចុះថ្ងៃទី១៣ ខែមិថុនា បានបញ្ជាក់ថា ៖«ប្រជាពលរដ្ឋដែលពុំទាន់មានអត្តសញ្ញាណបណ្ណសញ្ជាតិខ្មែរ ឬខូចអត្តសញ្ញាណសញ្ជាតិខ្មែរ ឬបាត់ ត្រូវរូសរាន់ទៅសុំឯកសារបញ្ជាក់អត្តសញ្ញាណបណ្ណពីគណៈកម្មការឃុំ-សង្កាត់រៀបចំការបោះឆ្នោត (គឃ.សប) និងអាជ្ញាធរឃុំ ឲ្យបានមុនថ្ងៃបោះឆ្នោតជាតិខាងមុខ»។

ប្រធាន គ.ជ.ប បានបន្តថា ប្រជាពលរដ្ឋខ្មែរដែលបានចុះឈ្មោះបោះឆ្នោត ដោយប្រើប្រាស់ ឯ.អ បម្រើឲ្យការចុះឈ្មោះបោះឆ្នោតឆ្នាំ២០១៧ និងមានឈ្មោះក្នុងបញ្ជីបោះឆ្នោតផ្លូវការឆ្នាំ២០១៧ ហើយពុំមាន អ.ខ អាចយក ឯ.អ បម្រើឲ្យការចុះឈ្មោះបោះឆ្នោតទៅជួប គឃ.សប ផ្ទាល់ខ្លួនត្រូវសុំ គឃ.សប បញ្ជាក់អំពីការមានឈ្មោះក្នុងបញ្ជីបោះឆ្នោត ចុះហត្ថលេខា និងថ្ងៃផ្ដល់សុពភាពលើឯកសារដើម្បីប្រើប្រាស់ក្នុងថ្ងៃបោះឆ្នោត។

លោក ស៊ិក ប៊ុនហុក បានបញ្ជាក់បន្ថែមថា ៖«ការចេញឯកសារបញ្ជាក់អត្តសញ្ញាណបណ្ណបម្រើការបោះឆ្នោត នឹងត្រូវបញ្ចប់ នៅថ្ងៃទី២៧ ខែកក្កដា ឆ្នាំ២០១៨»៕