ជាតិ
បោះឆ្នោត
គ.ជ.ប. ថា តំណាង UN និយាយគ្មានមូលដ្ឋានស្តីពីសិទ្ធិសេរីភាពសារព័ត៌មាននៅកម្ពុជា
× ភ្នំពេញ៖ គណៈកម្មាធិការជាតិរៀបចំការបោះឆ្នោត(គ.ជ.ប.) បានចេញសេចក្ដីថ្លែងការណ៍ សម្ដែងការសោកស្ដាយមួយ ចំពោះការយល់ខុសរបស់តំណាងអង្គការសហប្រជាជាតិប្រចាំកម្ពុជាលោកស្រី Rhona Smith។ បន្ទាប់ពីតំណាងUN នៅកម្ពុជារូបនេះ ចេញសេចក្ដីថ្លែងការណ៍ថា ក្រមសីលធម៌អ្នកសារព័ត៌មានរបស់ គ.ជ.ប. គឺរឹតត្បិតសិទ្ធិសេរីភាពរបស់អ្នកសារព័ត៌មានក្នុងពេលបោះឆ្នោតខាងមុខ។
សេចក្ដីថ្លែងការណ៍របស់អង្គការសហប្រជាជាតិប្រចាំប្រទេសកម្ពុជា ត្រូវបាន គ.ជ.ប. ឲ្យតម្លៃថា ជាសេចក្ដីថ្លែងការណ៍ ដែលគ្មានមូលដ្ឋាន និងមិនបានសិក្សាឲ្យបានស៊ីជម្រៅ។ ទន្ទឹមនិងការសោកស្ដាយចំពោះសេចក្ដីថ្លែងការណ៍នេះ គ.ជ.ប. បានលើកអំណះអំណាងចំនួន២ចំណុច និយាយពីក្រមសីលធម៌នៃអ្នកសារព័ត៌មានរបស់ គ.ជ.ប. ដែលចេញដោយអ្នកជំនាញផ្នែកច្បាប់បោះឆ្នោត នៅឆ្នាំ១៩៩៨ និង២០០២។
សេចក្ដីថ្លែងការណ៍ដដែលបានបញ្ជាក់ថា ក្រមសីលធម៌សម្រាប់អ្នកសារព័ត៌មានរបស់ គ.ជ.ប. ធ្វើឡើងតាមបទដ្ឋានជាតិ និងអន្តរជាតិ ព្រមទាំងកតិការសញ្ញាអន្តរជាតិ ស្ដីពីសិទ្ធិពលរដ្ឋ និងសិទ្ធិនយោបាយ ក្នុងមាត្រា១៩ ដែលមានចែងថា «ការប្រើប្រាស់សេរីភាពនៃការបញ្ចេញមតិ តម្រូវឲ្យមានករណីកិច្ច និងការទទួលខុសត្រូវដោយពិចារណា ទៅលើសិទ្ធិអ្នកដទៃ សន្តិសុខជាតិ និងសណ្ដាប់ធ្នាប់សាធារណៈ»។
ដោយលើកយកក្រមសីលធម៌ទាំង២ចំណុចនេះ គ.ជ.ប. បានអះអាង គ.ជ.ប. មិនបានរំលោភលើសិទ្ធិរបស់អ្នកសារព័ត៌មានឡើយ ផ្ទុយទៅវិញ គឺជាការជួយសម្រួលឲ្យមានព័ត៌មានដែលមានតម្លាភាព និងទំនួលខុសត្រូវក្នុងពេលបោះឆ្នោត ដូចអ្វីដែលលោកស្រីRhona Smith ចង់បានទៅវិញទេ។ នេះបើតាមសេចក្ដីថ្លែងការណ៍ដែលចេញផ្សាយនៅថ្ងៃទី១៦ ខែមិថុនា។
ក្រោយបញ្ជាក់ពីភាពច្បាស់លាស់របស់ខ្លួន ក្នុងការគោរពសិទ្ធិសារព័ត៌មាន គ.ជ.ប. ក៏បានបន្ថែមថា កន្លងមកលោក ស៊ិក ប៊ុនហុក ប្រធាន គ.ជ.ប. ក៏ធ្លាប់ស្នើឲ្យលោកស្រី Rhona Smith នាំពាក្យទៅប្រាប់ UN ឲ្យបង្កើតការិយាល័យ UN នៅ គ.ជ.ប. ផ្ទាល់តែម្ដង នៅក្នុងជំនួបកាលពីថ្ងៃទី ១៣ ខែមីនា ឆ្នាំ២០១៨។
នៅមិនទាន់អស់សេចក្ដី គ.ជ.ប. បានចេញនូវសេចក្ដីថ្លែងការណ៍បន្ថែមអំពីតួនាទី និងក្រមសីលធម៌អ្នកសារព័ត៌មានចំនួន៤ទំព័រ នៅថ្ងៃទី១៧ ខែមិថុនា ឆ្នាំ២០១៨។
សូមបញ្ជាក់ថា សេចក្ដីថ្លែងការណ៍របស់ គ.ជ.ប. ធ្វើឡើងបន្ទាប់ពីតំណាងអង្គការសហប្រជាជាតិប្រចាំនៅកម្ពុជាចេញសេចក្ដីថ្លែងការណ៍កាលពីថ្ងៃទី១៥ ខែមិថុនា ព្រួយបារម្ភពីសិទ្ធិសេរីភាពអ្នកសារព័ត៌មាន ក្នុងអំឡុងពេលបោះឆ្នោតខាងមុខ៕
Tag:
គ.ជ.ប
អ្នកព័ត៌មាន
ក្រមសីលធម៌
បោះឆ្នោត
© រក្សាសិទ្ធិដោយ thmeythmey.com